Hindi film lar tak, ‘3 idiots’ kha kan en fur tawh awm e. Mizo tawnga lehlin pawh a awm kha. Kha movies ah khan thian inkawmngeih tak pathum- Rancho, Farhan leh Raju te chuan engineer nih tumin engineering college-ah an zir ho a, hostel- khatah an awm ho a ni. Rancho chu lehkha thiam thei tak a ni a, mi hausa tak fapa a ni bawk a. A thiante pahnih erawh an chhung te’n harsa tak chung leh neih thinglung khawnga lehkha an zirtir hram hram te an ni.

Farhan chuan engineer nih chu a chak lo a, a tuina a ni hek lo. Thlalak nuam a ti em em a, wildlife photographer nih chu a thil chak ber a ni thin. A chhung te erawhin engineer nise, company lian takah thawkin sum tam tak la lut ruih ruih se an duh a. Chutiang tur chuan harsa chung chungin engineering college a kal tir a, tha taka lehkha a zir theih nan a room-ah air conditioner an dah sak hram hram a ni. Engineer nih chu chak mawlh hek lo, a tawpah Farhan-a chuan a huaisenna zawng zawng sawmkhawmin a nu leh pa hnenah chuan wildlife photographer nih a duh thu chu a sawi chhuak ta a, a pa chu a thinrim kher mai. A ang tun tun a, a thinrim chu a puak keh lo chauh a ni. Chuta Farhan chhanna chu, “Ka pa, enge lem chuang ang? Engineer ni loa wildlife photographer ka nih chuan ka sum lakluh pawh a tlem ang a, kan in pawh a te ang a, ka car pawh a te ang a, mahse ka hlim zawk ang” a ti a ni.

Mihring hian tuina zawng, chemkalna zawng kan nei theuh a, kan tuina kan bawh fuh chuan nuam kan ti a, miin hna hrehawm tak anga an ngaih pawh nuam ti takin kan thawk thei thin. ‘Sum a tam, a hlawk’ tih vanga kan tuina ni miah lo kan bawh hian kan hlim tak tak lo a, sum lakluh chu tam mahse, in leh lo tha tak pawh din mah ila, chu chuan hlimna tak min pe lo. Hlawh duh vang chuaha sawrkar hna thawk, mahni hnaa tui si lo, tui tuma tan la peih chuang bawk si lo, kawla ni chhuah chhiara pisa kai ngai ve si, tlai ban hun nghakhlel em em, hlawh vang chuaha hna ban san phal chiah si lo te hi mi vanduai an ni.  Hetiang mite tan hian sawrkar hna hi hna hrehawm a ni a, an vanglai hun tha zawng zawng chu hrehawm ti takin, ning reng rengin an hmang ral thin. 

Zirtirtu hna te hi khawvela hna pawimawh leh hna zahawm a ni a, zirnaa tui tak leh naupang zirtir nuam ti tak tan lo chuan thawh mai mai chi a ni lo. Zirtirtu hna hi a pawimawh teh lul nen, kan ramah erawh politician thil ti thei te’n an chhungkhat hnaivai te duhsakna remchangah an hmang mai mai thin a, thil pawi tak a ni. Zirnaa tui hlek lo, zirtirtu pawimawhna pawh hre lo, nungchang leh chetziaa inthlahdah tak, zirlai te tana entawn tur awm chuang lo leh ruihtheih thila fihlim lo te hi zirtirtu an nih tlat chuan ram ropui kan thleng har khawp ang. Zirtirtu inthlahdah, zirnaa tui miah lo kan tam vang a ni mahna, heti taka kan ramah sawrkar sikul a awngrawp a, a kumtela zirlai an tlem tial tial mai ni. Damlohna leh rokhawlhna lian tak vang pawh ni loa zirtirtuin aikal an han la ringawt mai te hi a zialo thin ngawt mai. Hetiang mi hian zirtirtu hna hi hlawh hmuh nan bak an ti lo tihna a ni.

High School kan kal laia kan zirtirtu pakhat, English min zirtir thintu (a hming pawh han sawi ila, C Biaknguri) chu English thiam tak a ni a, zirnaah a tui em em bawk a. English prose min zirtir thin a, sap tawng vekin min zirtir thin. Uluk em emin period khatah paragraph khat min zirtir a, paragraph khata word awm zawng zawng chu a tlukpui word dang synonyms leh antonyms nen chipchiar takin a hrilhfiah thin. A zirtirna kan man a, kan hriatthiam chuan nuam a ti a, a hmelah pawh a lang chhuak thin. “Ka zirtirna in hriatthiam hian nuam ka ti a, ka tan chuan lawmman hlu tak a ni. Ka hlawh (salary) hi chu a ve lek a ni” a ti a, ka hre reng thin. Hetiang mi, hlawh (salary) leh hamthatna aia mahni hna ngai pawimawh zawk, mahni hnaa tui bawk si te hian zirtirtu ni ta vek se, kan zirna chuan nasa takin hma a sawn ngei ang le. Mahni hnaa tui lo lo hi hlawh leh hamthatna buaipui peih tak, DA pung tur hre thei tak leh chhut peih tak an ni si a, a buaithlak lam deuh a ni.

Tunlai khawvelah sum loin kan nung thei tawh lo a, sum hi kan zawng tur a ni a, thawhchhuah pawh kan tum tur a ni. Chutih rualin kan hnathawh leh kan hlawh hi a in phu em, kan hlawh milin kan thawk em, kan sum lakluh dan hi a felfaiin a thianghlim tak zet em tih erawh kan chhut fo a pawimawh khawp mai. Mi tam takin sum ngah te, hausak te hi kan chak huam huam a, sum hmuhna a nih dawn pawt chuan thil dik lo leh mi tana pawi tur pawh kan pawi sa ta mang lo. Amaherawhchu, a loa luata hausak hi enge a tangkaina? Hausa uchuak te sum hman dan hi han belchiang ila, ho deuh a sin. Rangkachak zungbun an bun lawk bur a, rangkachak thi an awrh a, an thi awrh a lansarh nan an kawr hma an kilh pum tha duh lo a, tham nalh deuh an sa a, huan an nei a, picnic spot an siam a, ram an lei leh ringawt a, a bak sum hman ngaihna vak an hre chuang lo. Mukhesh Ambabi fanuin pasal a neih dawn khan inneih sawmna card pakhat kha cheng nuai khat man a ni. Invitation card man to leh wedding cake tel miah lo pawhin damchhungin a inneih ve theih tho.

Kan damchhung hian hlawkna um reng rengin kan hun kan hmang ang a, nuam chen thei tawh lo khawpa tar chhia kan nih thlengin suma duhamna hian min sal bet ang a, thlana kan luh thlengin kan duham ral thak mai ang tih mawlh a hlauhawm. Sum mena meng, sum ringawt ngaihtuah, sum hmuhna tur a nih dawn chuan tih hreh nei lo, hlim chuang si lo nih ai chuan nuam ti taka mahni tui zawng tak hna thawh hi a tha ber.  Farhan-a tih dan takin, kan tui zawng hna kan thawh avanga kan sum lak luh a tlem ta deuh a nih a, mi in anga in lian leh ropui kan nei ve ta chiah lo a nih pawhin kan hlim a, kan lungawi miau chuan chu tluka hlu a awm lo ve.