Kan hriat angin hmeichhia ti hmeichhia tu chu thlabi a thi an neih "menstruation" hi a ni a. He an thi neih hun chhung hian nau an pai theih lai a ni a, an taksa inenkawlna atan thi neih hi a pawimawh em em bawk a ni. Engvang ber emaw a thi neih buai a lo awm hian harsatna hrang hrang an nei thei a, a nasa ah phei chuan nunphung buai vek khawpin harsatna a siam thei a ni. 

Pathian siam dan angin he thi neih hian hunbi a nei a, tawp chin pawh a awm bawk a, chu thihul hun chu saptawng chuan Menopause an ti a, average chuan kum 45-50 bawr vel hi thihul huna ngaih a ni. Amaherawhchu mihring an in an loh avangin kum 38 emaw kum 60 dawn a thihul te pawh an awm fo bawk. Hmeichhe thineih hi a control tu ber chu an chi bawm (ovaries) a insiam hormones te an ni a. Chibawm ah hian hmeichhe chi a insiam a, an thi neih hunbi menstrual cycle chhung hian naupai thei turin chhul leh taksa te a buatsaih thin a ni. An kum a lo tam hian chibawm a chi (ovum) insiam a lo tlem tial tial a, chibawm pawhin hna a thawk nep tial tial a, a hnathawh a lo chawlhsan chiah hnu hian kan sawi tak hormones ho kha a lo insiam ta lova, nau pawh an pai thei ta lova, an thi a hul chhunzawm ta thin bawk a ni. 

Chibawm hi paih anih chuan an thi a hul nghal thei a, chu chu Surgical Menopause tiin an sawi thin. Chibawm paih tel lova chhul chauh an paih erawh chuan thi nei tawh lo mahse an chibawm khan hormones a la siam tho a, chuvang chuan thi nei thei tawh lo mahse thihul vanga harsatna thleng thei te an nei kher lo. Cancer enkawlna Chemotherapy emaw Radiation treatment an lak a ngaih chuan chibawm hi a function lo thut thin a, thihul leh a kaihhnawih harsatna an nei thei bawk. 

Chibawm siam hormones te hi hmeichhe tan a pawimawh em em mai a, ruh an veng bawk a, chutiang avang chuan thihul hnu hian hmeichhe ruh hi a mawih/pan ta thin a, chu chu Osteoporosis an ti a, ruhtliak te an nei hma thin a ni. Hei vang hian hmeichhe thi hul hnu hian Calcium Supplements pek an ngai fo thin. Taksa a lo upat bawk si chuan an rit hma a, ruh tliak leh ruh lam fel lo hi an nei hma bik em em bawk a ni. 

Thihul hian harsatna hrang hrang a keng tel a, thi hul hma hauh, a hul dawn lai (perimenopause) atangin heng harsatna te hi an nei thei a ni. Chung zinga a common zual te chu mumal lo taka thi put (irregular vaginal bleeding) te, taksa sa up up (hot flashes) leh zan lama thlan vak (night sweats) te an ni a, tam takin ke sa an nei fo bawk. Hemi bakah hian rilru danglam thut thut (mood swings) hi an nei duh em em bawk a. A then phei chu mahni pasal haw tlat te an awm fo bawk. 

Hetiang ah hian mipa hian an nupuite hi hriatthiampui a ngai hle a ni. Heng bakah hian hormones tlakchhamna hian zunkawng pan leh ro a thlen thei a, chu chuan zunkawng infection (UTI) a thlen fo bawk. Ril chet a tihbuai tel thin avangin ek mumal lo, a changa kawthalo, a chang ek khal te an nei thei bawk. A dang leh, buaithlak ang reng tak chu an thihul hnu hian nupa nun hman chakna (libido) a tlahniam a, chu bakah chuan serh chhung bang a lo ro in a ti nal tu vaginal fluids a lo tlem bawk a, chu chuan nupa nun hman hrehawm/na (Dyspareunia) a thlen fo bawk a ni. 

Lung that lohna (heart attack) lakah an derthawng zual bawk a, in check up that a pawimawh hle. Kan hriat belh atana pawimawh tak mai chu thihul hnu hian chhul hmawr fel lo, a bik takin cancer (Cervical Cancer) hian chhul kaw pawn a ti ping thei a, chu chuan chhul chhungah thi tlem a dang khawl a, insawiselna an nei fo thin. Chuvang tak chuan thihul tawh te chuan kum khatah vawi hnih tal chhul check up - Pap Smear leh Colposcopy te hi ti thei se, chu bakah chuan Ultrasound hmangin an chhul leh a bul bawr endik tir thei bawk se a tha hle a ni. 

Thihul vanga harsatna kan tarlan tak te hi i lo nei ve anih chuan hmeichhe doctor pan ngei thei la, harsatna thuk zawk lakah invenna chang i lo hre dawn nia.