Tun tum chu hmeichhiate tana ngaih pawimawh tul nia ka hriat te, ka doctor-puite titi leh damlo ka lo en ve te atanga ka ngaimawh zualte ziah ka’n tum ange. Mipa leh hmeichhiate hian hormones inang kan nei a, chung zingah chuan hmeichhiate tihmeichhiatu hormones bik, Estrogen leh Progesterone te hi an pawimawh hle. Thi neih (menstruation) atana hormones pawimawh tak an ni a, an chibawm (ovaries) atanga insiam a ni. Tin, nu nau nei tana pawimawh tak mai, hnute tui siamtu, Prolactin hormones a la awm hrang leh bawk. Hormones dang, a bik takin Thyroid hormones te nen hian a inkungkaih thuk a, chutiang avang chuan thyroid fel lo hian thi neih buaite a siam duh hle a ni.

Hmeichhe hormones-te mumal taka an function hi a pawimawh a, chumi tibuaitu common ang reng tak mai chu thau lutuk (overweight) hi a ni. Nula/tleirawl thau lutukah hian thi neih buai kan lo hmu fo thin a; tin, overweight vang hian fa nei thei lo an awm fo bawk. Diet leh exercise tih uluka rihna tlahniam vanga nau pai thei lo pai ta nawlhte pawh an awm fo mai. Chuvangin, diet uluk leh taksa sawizawi that, chet tamte hi a pawimawh hle. Depression (rilru hah tite pawhin sawi ta ila) hi hmeichhiaah a common zawk mah a, hetiang neite tan hian taksa sawizawi hi a tangkai em em bawk.

Chibawm (ovaries) hi kan tar lan tak angin a pawimawh khawp mai a. Chi insiam dan fel tawk lo, bawk te reuh tete insiamte a lo awm chuan Polycystic Ovarian Disease/Syndrome an nei thei a, chu chuan thi neih buai bakah hmai bawl nasa takte a siam thei a ni. Chhul (Uterus) bik hi lo sawi chhunzawm ta ila. Chhul hmawr (cervix) cancer hi a common khawp mai a, a tir tê-a hriat chhuah chuan a enkawl dam hmak theih a, chuvang chuan kum 30 hnu lamah phei chuan Pap Smear hi kum tin tih ziah theih a duhawm hle. Pasal fanau neih hnua inthen leh, fate tulpui, mipa kawp chhunzawm lote zingah a awm duh phian mai a, a hriat chhuah awlsamna  sex hman laia na tithar leh te, sex hman laia bleeding awm angte an lo insawisel si lo va, a tlai hnuah hre chhuak an awm fo mai. 

Hnute cancer pawh hi hriat chhuah hma chuan enkawlna te a tha tawh a, mahni in-monitor nachang hriat a tha hle. A lem han entir a rem chiah lo va, google-ah Self Breast Exam tihin zawng ila, a lem tha tak tak a awm a. Hetiang hian mahni in-monitor thin a tha hle. Bawk emaw, sakhat deuh nia kan feel a awm chuan Surgeon-te entir thuai ni thin se. Mammography khawl, hnute screen-na pawh a awm a, hma taka hriat chhuah chuan enkawlna dampui tam tak an awm a ni. Chibawm (ovaries) cancer hi hriat har tak mai a ni a, a thawm a zawi a, hriat chhuah meuh chuan a lo tlai fo tawh thin. Chuvangin, tleirawl hun lai atang hian ultrasound hmanga in-check theih nise (kum tin ni thei tal se) a tha khawp ang.

Sex hman chungchangah hian tleirawl leh la thalaite zingah invenna hman nachang hre lo an tam hle mai. Condom hman hian HIV mai bakah sexually transmitted infections (STI) chi hrang hrang lakah min veng a, sex kan hmang lo thei lo anih si chuan condom hman mai hi a him ber a ni. STI thenkhat hi thawm zawi tak tak a awm a, chi kawngte a lo tiping hman thei a, nau pai thei lo an awm phah fo a ni. Inngaizawng sex hmangte hian condom hman hi inrinhlelhna angah an ngai fo mai a, he ngaihdan hi thlak tur a ni. Condom hman hi inrinhlelhna lam ni lovin kan kawppuite himna kan duh vang zawka hmang kan ni tih kan hriat a tul hle. Hepatitis B leh C te pawh hi sex hman atanga kai an awm fo a; chuvangin, condom hman hi safe sexual practice a ni tih i hre thar bawk ang u.