Hmanni lawk khan ka zirlai hlui pakhat, pâwl 10 a zir laia Country hla thu mawi leh tha tak tak ka hrilh zauh zauh thin chuan tûnlai Country hla mawi tak lyrics video min rawn thawn pek a. Tûnlai Country hla ka ngaihthla tam lo tih leh ka tuipui lêm lo tih hre reng chungin, ‘Sir, hei hi chu lo ngaithla hrâm teh,’ min rawn ti a. Chu hla chu Brad Paisley sak, ‘Part 2’ tih a ni. Ka’n ngaithla chu ka duh ta hle mai a. A video edit-in WhatsApp status-ah ka hmang ta hial a.

‘Hollywood movie hlawhtling reng reng hi a chhunzawmna (sequel) an siam châwk thin. Mahse, hmangaihna hian eng vângin nge “Part 2” a neih ve loh?’ tih lam a ni—chû hla chu. Ka ngaihtuah ta zêl a. Ka piancham ni duhawm tak (September 20) lo thleng tûr ka hmuah lai hian, he ‘Part 2’ hian ka rilru a va’n luah kâr tluan chiang tak!

Vawi tam piancham chu ka lo lâwm ve tawh ngei mai a; lawm nawn leh atâna ka duh ngai tawh loh dâna lawm tum pawh ka ngah viau mai. Tin, ka nun lo hman tawh zozaiah khan, thai chhiat hlen hmak tûra ka duh ngawih ngawih, mite pawn min theihnghilh hlensak hmak tûra duh ka va’n ngah hman tak! Computer-a file duh loh ka delete a, kháwl bawlhhlawh bâwm (recycle bin)-a lût atân pawha ka duh loh, lang nawn leh thei tawh miah lo tûra ka paih hlen hmak (Shift + Del) ang hian paih hlen thei tak tak ni ila, naupang mai ka ni tha leh ngei ang. Mahse, ka ziah tawh chu ka ziak zo tawh si a! Ka dam lai ngei hian, ka hun hman tawhte kha ka hmang nawn leh thei tawh ngai lo ang; mahse, ka siam tha leh thei thung.

Pian cham nei ve hrim hrima ka lo piang chhuak ve hi ka lâwm a; ‘birthday hre ve kiau’ ka ni thei hrim hrim pawh hi, ngaihtuah chian chuan thil lâwmawm tak a va’n ni tehlul êm!

Piang nawn leh dâwn tawh lo mah ila, ka dam lai ngei hian ‘Ka Hringnun Thawnthu Part 2’ chu, keimah ngei hian ka lo ziak thei reng alâwm le, tih te ka ngaihtuah chhuak zêl a. Thu hmahruai atang ringawt pawn, ngaihnawm leh chhiar chhunzawm zêl châkawm tûr khawpa ka ziah a ngai a; chu chu vawiin atanga ka ziah tan a lo ngai reng mai.

Thawnthu tha, mite zir tlâk leh ngaihnawm tih tûra ziah chhunzawm chu, ka pian chhan leh ka dam chhan, ‘birthday ka neih chhan dik tak’ a lo ni zâwk dâwn a nih hi, tih te thleng thlengin ka ngaihtuah chhuak zêl a. Ni e tiraw, vawiina kan thawnthu hi, nimin aia ngaihnawm leh duhawm zâwka kan ziah a lo ngai zêl dâwn a lo nih hi. Naktûk nghah a ngai lo a, vawiina bul tan hi a pawimawh lai chu a lo ni.

Thawnthua putar pakhat, a ina tui far ang maia ‘ruah sûr hun’ nghah kher kha nih a hlauhawm mang e. ‘Ruah sûr apiangin a in chung pawp atanga tui rawn far ziah mai chu a ningin a phun nasa thei hle mai a. Mahse, thawm that a tum chuang hlei lo a. Khua a that apiangin a thenawmte chuan, “I in chung chu thawm tha tawh la,” an tih pawn, “Ruah a sûr loh hi. Tui a far hlei nêm!” a ti zêl e,’ an tih chu!

Vawiin hi, tûkin ni chhuah atang khân ni duhawm ber a ni a. Ni thianghlim, la hman miah loh, khawvêla mi hausa ber leh hmel tha ber pawna an la hman loh, la chen chhin miah loh ‘ni virgin’ a ni tih te hi chhûtin a hlutzia kan ngaihtuah ngai em le? Nimin aia mawi leh duhawm zâwk, ngaihnawm leh ngaihawm zâwka hman tumin zîng kan tho thin em aw? Nge, ‘A ngai tê bawkin maw!’ tiin peih lo tak chungin kan zi chhuak tuih tuih thin zâwk le? Hna ngai tho pawh thawk leh dâwn pawh ni ila, nimin aia tha leh hlâwk zâwka thawh tumna rilru pu rân chunga zîng kan thawh chhuah atang ringawt pawn, kan hringnun thawnthu thar hi kan ziak tan thei dâwn a; chu chu a hma aiin a ngaihnawm zâwk ngei dâwn a ni, tih te hi hriat thiam a va tûl êm!

‘Hringnun Thawnthu Part 2’ han tih ngawt hian, mi tam tak chuan upat lam leh tar lam chanchin ziak tûrah riak kan inngai maithei. A ni hauh lo a nia. Kan la naupan viau laia ziah tan nachâng hria apiang kan vânnei mai dâwn a lo ni a. Kan duh loh min duh luihtîr tlattu chu keimahni vêk hi kan lo ni zêl a. Mî, atu-ate mai pawh hian thil tih sual leh inchhîrna kan nei theuh ngei ang. Naupang tê tê te pawn tha an tih miah loh thil tih luih châng leh inchhîr châng an neih ve ngei ka ring thin. Kum a tam poh leh kan ngah ang. Chu chu ni tin kan ziah that a ngai a ni.

Ka hringnun thawnthu lo ziah tawhah khan, vawi tam tak ka thiante kawm zui tlâk loh dinhmunah te dingin, khawtlâng leh vântlâng pawi sawiin emaw an hmaa mualphoin emaw ka lo awm tawh pawh a ni thei a; eirûkna khurah mualpho takin ka tlu tawh pawh a ni thei e; uirêna leh tualthahna hial pawh ka thlen tawh a ni thei. Mahse, vawiin hi—kan hringnun Part 1 ngaihnawm lo tak avânga lungngaia beidawng mai loa, kan hringnun part 2 kan ziah tan nî—kan vaia birthday ni thei se la. Liam tawh chu liam mawlh rawh se; inzir nân bâk an hman tlâk hleih nêm maw le tiraw? Nimin aia tha zâwk leh ngaihnawm zâwkin, kan hringnun thawnthu hi, vawiin atang hian a Part 2 ziah tan i tum theuh ang u khai—naktûk nghâk kher loin.