Ka tap reng a, u Ruati chu ka kuah ngawih ngawih mai. ‘U Ruat …’ sawi zawm tùr ka hria; mahse, sawi zawm tùrin ka tawng thei si lo!

U Ruati chuan, ‘Khatia ka pa’n min chhuahsan hnu khán a rilru a na êm êm mai a, a thinrim a, a hel a. Nun hi a ning a. Thian tha lo a kawp a, damdawiah a tlän ta a. Kan hriat tirh chuan kan rilru a ná a, kan thlep hnâwp a ni. Mahse, báng loin kan tawngtai a …’ A sawi chhunzawm zêl. Mahse, ka hre vek peih lo! Sawi chhàwn leh pawh ka duh lo!

Mahse, he thu a sawi hian min déng nawn leh a ni: ‘Nang hi awm loin tawng lo ta che se la chuan, a thi daih tawh ang! Damdawi hi a ti satliah lo a, a rûkin a tawlh bawk thìn! Saw’ng a bike te, kan car te saw, a damdawi tawlh rûkna atanga a neih a nih saw. Mahse, tûnah chuan a tawlh rûk emaw a zawrh emaw kan hre ngai ta lo. Sum tam tak aiin nang hi a duh zâwk thu min hrilh a; ka nu paw’n a hria. Mahse, a nghei tak erawh hi chu a la harsat rih a ni. Tanpuitu a mamawh ngawih ngawih a, nang hi a chhar hlauh che a, i tel loin … engtin nge a hring nun a hman tâk ang le?’

“Lo kîr rawh!”

Chumi zàn chuan ka mu lo! Mawitea mawlh chu ka mutpui a. A ni lo e a—amah avànga ka rilrua inzawm zata zawhna lo kal chu a ni ka mutpui zâwk ni. Mi pahnih hi ka ni hawt a. Chûng keimaha mi pahnihte chu an insual tlaivár zak!

Engati nge min lo bum? Engtin nge a ngam pawh a ngam rêng rêng? Mahse, khati khawpa kan college-a hmeichheho star rawn khân hmeichhe dang lakah vawi te khat mah min la bum lo a, a thil tih hi sim duhin a tang ve a, kei hi amah tanpuia däwm tùrin min lo thlang a ni si a maw!? Keimah lo mi dang auh a tum si lo em ni? A dam lehna tùra a beiseina meichher chhitsaktu ka lo ni reng zâwk em ni ang? Ka ni lo ang! A nih—ni lo ila, tu nge ni chuang ang? A chhúngte an ni mai alâwm. A nih leh, a chhúngte chu lo ni ta se, U Ruati khân khatiang thu kha min fah duh dáwn em ni?

Ka harh ta! Ka pindan banga sana intár chu ka en zawk a. Zíng dár lí a pèl det. Mawitea hnênah, “Lo kîr rawh,” tih nán ka la tlai lo e. A beiseina meichher chhitu, kei lehzêl hi a nun ata thi hlen ta ila, mei chu alh tawh lo se la, Mawitea chu, mei thih rualin a thi ve mai dáwn a ni tih ka hre chhuak ta!

Ka rizai ka hlîm a. Hmai ka phih sawk sawk a. Choka banga scooty chabi inkhai chu ka la a, Mawiatea te in lam panin ka tlän ta tawp mai a nih chu!

“Thil inkhai saw!”

‘Mawite, harh rawh! Mawite … hawng teh!’

A pindan tukverh atanga bihin ka ko leh thìn a. Khua a la thim êm êm mai si. A mu nge mu lo tih pawh a parda phèn atang chuan ka hmu thei mai lo. Mahse, a pindan ceiling fan inkhainaa kawnghrèn inkhai chu ka hmu ta! Amah tak erawh a la inkhai lo tih ka hre thei hlauh. Mahse, vawi tam Mawitea tukverh ka kik hnu pawh chuan a la harh thei si lo. 

Zíng dár nga a ri dáwn tawh! Khaw vàr a hnai tial tial a, ka mang a ang tual tual! Thäwm ka hre ta. An kawngkapui lam atangin a ni. Zah ka dáwn thei tawh lo. Mi pakhat—hmangaih berte nunna lehnghâl hi a hlu êm mai!

‘Tu nge?’ A tèng thak! Mawitea nu a ni tih ka hre nghâl.

‘Lucy ka nia. Mawitea … Mawitea saw … Mawitea hi …!’ ka ti bah nuai mai. A pindan ceiling-a thil inkhai ka hmuh avàng khán ka la khùr miau a ni.

Rin loh deuhin Nu Mami chuan dam diai hian, ‘Lucy, engati nge i thianpa hi kalsan i tum? A rilru a chauin a hah a nia. Ngawi teh, lo lût teh,’ tih pahin ka bán ding lam a rawn vuan a. An choka light a ti êng nghâl zat a. An chokaa kan thut dun rual chuan phâwk fe-in, ‘Mawitea pindanah sawn va lût teh! A inkhai! ’

Ka sawi zawh hma hma chuan mak leh phâwk taka min melh chungin, ‘Eng a!?’ a ti hman—a thutna chair atang chuan a tlu thla ta thlawp! Awi karei!

Tu nge buaipui hmasak tùr zâwk? A nu nge Mawitea?

Kei pawh ka ä! Engtin nge ka tih dáwn? Ka hre lo tawp mai! U Ruati pindanah ka tlän lût a. Ka kai tho. Thil awmzia ka hrilh. A hawihai ngei mai!

‘Lucy, Mawitea pindanah va lût la, keiin ka nu…’

Mawitea chuan a pindan a lo kalh lehnghâl! Chokáah ka tlàn phei leh. U Ruati chuan tap tuau chungin, ‘Lucy, ka nu hi!’ a ti thei hräm.

‘Damdawi in panpui vat chi a nih hi,’ ka ti a.

‘A nih, Mawitea!?’

Kan thäwm hriain an thenawm khawvéngte an rawn pung khâwm a. Mi phun ri ka hriat, ka lai khei zartu chu hei hi a ni: ‘He hmeichhia hi engati nge heta a awm ve a!?’ tih chu!

Tanpuitu a au ang a …

Ka thil tawn hi na tak a ni … na tak! A na ngawih ngawih! Mawitea chu a rawn tho chhuak ve. A lo inkhai lo chiang! Nu Mami chu damdawi ina kan dah thu, U Ruati chuan a hrilh a.

‘Mumang mak deuh mai ka nei,’ a rawn ti hlawl!

U Ruati chuan, ‘Eng nge a!?’ a lo ti var a.

‘Ka tukverh hi angelin a rawn kik a; harh ka duh si a, ka che thei dêr si lo a. A mak lutuk!’

‘A nih tak chu maw le. Chu angel chu i kiangah a awm reng aläwm Bawiha, lungngai reng reng suh aw,’ tiin a ú chuan a’n hnèm a. Ka rilru tê tê chuan, “keimah ka ni chiang mai!” ka lo inti hman hiala maw le—chapothlâkin!

Nu Mami pawh a ni tèlin a ziaawm chho zêl a, kár hnih hnuah office a kai leh thei tawh a. Mawi­tea paw’n heroin-a inchiu chu a thlah ta. Mahse, a taksain a tawrh nasat dáwn avàngin damdawi in lamah an dah lût a. Zah, rèl leh sèl dáwn loin ka awmpui chawt thìn. A tùl leh ka riahpui a. Ka nu leh pate remtihna piah lam thleng paw’n ka pan thìn. Mi sawi kai tùr  chu ka ni a, zak tùr pawh ka ni—nula hnahkhat ve tán chuan.

Thu tha tinréng ka fah ve—kei mi tling lo hian. “A dam leh ang a, a tho leh dáwn a ni,” tih hi ka tawngtaina hla a ni tawp mai! Beidawn mai ka tum lo!

College lamah class ka chàwl tawp a. Thian ka thlah a, pawi pawh ka ti lo! Hmangaihna kawng an la zawh fuh ve loah ka ngai hmiah! Kei chuan hmangaih ka tawng a (“hmangaih tak tak” hi awmin ka hre ve lo; hmangaih chu hmangaih a ni tawp tùr a ni!), a chak leh a that vànga hmangaih ka ni lo a; ka hmangaih vànga hmangaih mai ka ni.

A that chhuah beiseina nung nei chungin Bible ka chhiarsak thìn a. Amah paw’n harh a, thawh chhuh a, din leh a châk tih ka hre reng. Mahse maw, a tih thawt thawt theih si loh a—a harsa a ni!

A zíng chaw petu ka ni a, a chaw chhùn nèn; tin, a zanriah pawh. Ka enkawl a. Ka theihtâwp aia nasaa enkawl chu ka duh! Mahse, hêng zawng hi ka theih tâwk chu a ni si a! Beitham ka ti a, ka theihtâwp hi tlém ka ti a ni.

I tel loin…

Mawitea chuan that lam a rawn pan ve zêl a. Mahni nunna meuh inchhah tum pawh kha, kei—ni lo—Pathian Thlarau Thianghlim thiltihtheihna  avàngin a ni, a nunna lâk boa a awm tâk loh ni. Pathian thil tih, Pathian hnathawh a ni chiang a ni. Lalpa mit hmuha thil tenawm “top 10”-a lang pha tùr lo dai tawh, he hmeichhe rethei tawngtaina hi, Ani chuan min la ngaithlâksak duh reng tho a ni tih ka hre chiang a. Làwm avàngin ka biangah mittui a luang nawn thìn.

Kár hnih dáwn duat taka kan inenkawl hnu chuan ka taksa pawh a chau ve ta deuh a ni ang, tûk khat chu ka lo mu rei deuh a. Ka harh meuh chuan dár 10 a lo ri dáwn tawh mai a. Mawitea chu ka ko a. Mahse, a mutna khum chu a lo ruak huai mai! Bathroom ka en a; a awm si lo!

‘Mawite … Mawitea! Khawiah nge Mawitea?’ tiin ka au!

Nurse duty rawn tlàn lût chuan, ‘A chhúngte’n De-addiction Centre-ah an dah lût,’ a rawn ti! Chu zawng chu ka chan!

Chhiartu duh tak, Mawitea ang hi, kan ramah hian duh aia tam kan kawl mék! Tanpui an ngai a, an mamawh che asin! Biak ina i tawngtaipui thin; kawng síra i hêlsan leh si hêng ruihhlo ngai mi tam takte hi—nun beidawngin an kûn a, an sal tànna atanga tàl chhuah an duh ve tawh. “I tel loin, engtin nge an hring nun an hman tâk ang le?” tih hi lo inzâwt ve teh le.

“I tel loin”
Phuahtu: Ramengmawia “Ramboss” of Triau Trackx

Eng dang nge ka sawi leh ang? / Eng thil nge ka tih leh dáwn?
Nang chelh tùr chein. / I tán engkim ka huam,
Ka thinlung zawng zawngin; / I thatna tùr a’n ka ti,
Mahse maw, ka theih tawk, i tán a tâwk lo!
    Ka tel loin engtin nge, i hring nun i hman tâk ang le?
    Ruahpui lo sûrin, thlipui lo tleh in
               Chhûmpui zíngin, ni a hliah hunin
               Ka tel loin, engtin nge i awm tâk ang le?
Hmangaihna mit a del an ti, / Aw, a thlang sual a ni;
Hring nun a chhiar sual a ni, / Ka theih tâwka chakin ka ûm a;
Ka awráwl tàwpin ka au a, / “Lo kîr rawh,” tiin;
Mahse maw—ka theih tâwk a tán a tâwk lo.
    Tanpuitu a au ang a, tuin nge tanpui ta ang le?
    Beidawng leh chauin a tlu ang a,
    Tuin nge, kai thoin tanpui ta ang le?
I tel loin, engtin nge a hring nun a hman tâk ang le?
    Ruahpui lo sûrin, thlipui lo tlehin;
    Chhûmpui zíngin, ni a hliah hunin,
    I tel loin, engtin nge a awm tâk ang le?