Tunhma kha chuan nu naupai te khan an duh ber chu naute fu ke kim, engemaw fel lohna nei lo, tha taka an neih kha an vei chu a ni deuh mai a. Khawl te a la changkang tawk loh vang te pawh a ni mahna. Tunah erawh chuan nu naupai te chu doctor ten an lo en in naute that leh that loh en nan Ultrasound khawl awmna ah chuan an entir deuh vek tawh a (standard investigation ani ta ber). Ultrasound inentir nu naupai tawh phawt hi chu (a tam ber ti ila kan sawi sual tam awm lo ve) an naupai lai a nu nge pa tih hriat hi an duh deuh zel mai a, a chhan han zawh pawhin naute thawmhnaw rawng lo inrin lawk nan tih hi a ni deuh chawk.

Ultrasound leh hmanraw dang hmanga nu pai lai naute sex hriat leh inhrilh hi India ram danin a khap bur a ni tih kan hriat thar a pawimawh hle a, chumi lam hawi chu tun tum hian remchang la in kan ziak ange. India ramah hian hmeichhe dinhmun a chau viau mai a, a chhan lian tak pawh an inneih dawn a hmeichhia in mipa chhungte sum leh thil hlu tam tak a pek a ngaih thin vang a ni a, chu chu Dowry System an ti a. He system nghet tak mai, tihbo harsa tak mai avang hian nu leh pa tam tak chuan hmeichhe fa neih an duh loh phah thin a. Hmeichhe fa an neih chuan theh thang bo emaw tihhlum hial te pawh an awm nawk a ni.

Hetiang avang hian India ram state tam tak, a bikin Hindu tamna ah te chuan nu in nau a pai laiin sex determination (naute chu a nu nge a pa tih hriatna) ti turin doctor te an pan thin a, hmeichhia a lo nih chuan an ti tla (abort) ta mai thin a ni. Chu chuan mihring pung zelah harsatna a thlen telh telh a, mipa an tam tial tial a, male/female ratio a buai phah a, khaw thenkhat ah phei chuan mipa in nupui tur an hmu zo lo fo ta mai a ni (hmeichhe tlem lutuk vangin). Tin, hmeichhe tihduhdahna a thlen nasa a, mipa nu leh pa in an mo dowry tam tak an dil a, an pek theih loh chuan kutthlak leh tihduhdah (harassment) te an tawrh phah fo bawk a ni.

India thuneitute chuan he thil hi an ngai serious hle mai a, kum 1994 khan he thil tha lo tak ven nan hian dan khirh tak mai, Pre-Conception & Pre-Natal Diagnostic Techniques Act (PC&PNDT Act) chu an duang chhuak ta a ni. He dan hlauhawm leh khirh tak an hman chhoh hnu hian zawi zawiin India rama male/female ratio pawh a rawn ziaawm ta hret hret a. Doctor leh chutianga sex determination an lo tih rukna hmun tam tak chungah action lak a ni tawh a, jail tan leh sum tam tak chawi phah pawh an awm ta nuk reng a ni. He dan hi India ram pumpui a hman a ni a, state lian leh sex determination an lo tih nasatna hmunah te phei chuan endik hna hi an kalpui nasa hle.

He dan hian Ultrasound leh khawl dang hmanga nu naupai lai naute sex determination hi a khap tlat a, Doctor ten nu naupai leh a chhungte chu naute sex (mipa nge hmeichhia) an hrilh thiang lova, tin, nu naupai lai leh a chhungte hian an zawh pawh a khap a, a hremna a in ang reng a ni. Kan ramah chuan dowry te a awm ve lova, hmeichhe tih duhdahna a awm hek lo bawk a, hetiang dan hi hman ve kher a tul emni tih zawhna pawh kan dawng fo thin. A dikna chen a awm a, amaherawhchu India rama awm kan ni a, dan khat hnuaia lengza kan ni miau mai a, kan zawm ve vek a ngai tlat a ni.

A tira ka rawn ziah ang hian naute nu in a pai laia mipa nge hmeichhia tih hriat hian tangkaina a nei hranpa lo. Nu naupai ka lo en te hian naute a tha em, a che tha em, a lungphu a tha em, fu ke a kim em, piansualna a nei em tih zawhna te hi an zawh awm takah ka ngai thin a. A tam zawk chuan chutiang chu an vei leh hauh lo lawi a, mipa nge hmeichhia tih ah bawk kan buai leh thin. Thuneituten an hriat loh chuan a pawina a awm hleinem kan ti palh a ni thei a, mahse hmeichhe ho hi hetiang hi an sawi chhawn chak zawng tak hi a lo ni awm e, midangin an lo hre leh duh hle. Kan tarlan tawh angin a dan hi a khirh em em a, a hremna pawh a na ani tih hi i hre thar leh ang u. Dan zawm hi khua leh tui tha nihna a ni e.