Pakhat zêlin min liamsan a. Kan thenawma mi te; thenkhat chu, tling lo chunga Pathian khawngaihna avâng liau liaua A rawng bâwla zaipâwla ka lo zaipui ve âl âl thin te; rawngbawltu tha ber ber te; thenkhat ka farnute phaia an awm laia an belh ber thin te bâkah ka zirlai hlui pate ngei ngeite chu, hripui an kai mai ni loin, hripuiin a ei ral a, thlân thima zalh an ni ta! Thenkhat chu nat lâwkna nei miah loa min kalsan thutte an ni bawk. Ka lama tang thin mî, hei aia tam pawh hi—he natna hripui hian la ei chhiat zêl a tum ang; thlâna la hnuh luh zêl pawh!

Eng tik nî-ah emaw chuan, he hrî ka vei nî pawh a la thleng ve maithei. He chanchinbu hlu taka ka kut chhuak chuang thei lo khawpa ka chauhrauh nî pawh a la thleng ve ngei ang. Tin, eng tik nî-ah emaw chuan kohhran leh bial zaipâwla fak hla ka lo sakpui thin, hmun ropui lam min pansan tate nêna zai kan vàwr ho nî pawh a thleng ngei ang le. Tu’n a thlen hun tûr hre lâwk lo mah ila, kan ni kin nî erawh, he leia dama piang zawng zawng hmabâk a ni miau si a le!

May thla chhûng ringawt hian ka va tap zing ta malh malh êm! Leiah pawh ‘A mi thianghlim fa’ tia vuah phû thah, ka thiante chuan mual min liamsan zut zut mai a. Kan kohhran pastor rawngbâwlna chawlhsan tum ve lo, Revd. C Zatâwna fapa, BCM hnuaia Arunachal field-a A Lalpa tâna rawngbâwl mêk, Isaac Rochunglûra (Sakte-a) chu a tha chhuak ngei dâwn e, tia kan tawngtaipui laiin, May 10, 2:45 p.m. khan mual a liam thu kan han hria a. A dam chhuah leh theih nâna tawngtaina kan hlan laiin a kalsan tâk a nupui, Mary leh a fanaute tân tawngtai subject thlâk a’n ngai ta thut mai a! Rilru a na-in a rûm vawng vawng mai a.

Chutah, tawngtai pawh kan la ‘Amen’ hma hauhin Hnahthial lama kan thiannu Manuni’n, hun rei tak a lo tuar tawh TB natna avângin, Saktea thih atanga dârkar thum âwrh a liam ang tihah min kalsan zui zat bawk a. Ani hi, thiante zîngah pawh ‘Manuni tluka Pathian thu awih ka hre lo!’ ka tih hial thin, ‘ri hluai loa’ tawngtai reng mai mi kha a ni a. Lung a zîng tak zet a ni. Nî a’n liam a; Kolkat lama Pathian rawngbâwla feh chhuak, eng lai maha ka tluk ngai loh, kan pastor chhuanawm Revd. C. Ngûrhnêma fapa, ka û leh ka thian ni bawk, C Lalremruata chu, a dam loh thu ka hriat hnuah a zual thu lam hlîrin min dêng zui reng bawk a. A hnu May 23 khan, Covid-19 avânga min peih lohsan tâk thu ka hre zui! ‘Kan khawvêl tak hi chu aw!’ ti vawng vawngin, lockdown kârah nî ka vui liam a.

Chu mai chu a la ni lo! May 25 chawhnu lamah WhatsApp message-ah BCM Aizawl East Pastor Bial-a rawng ka lo bâwlpui ve thin, BCM Electric-a lawi, thianpa bera ka neih ve thin Pâtea chuan lungphu châwlin min lo liamsan leh zêl bawk! Ani pawh hi mi nunngîl leh mi pawisawi hlau, nui sun sun reng mai, thiante tâna mi inpe zo mi a nihzia ka hre chiang; kuhva a heh vezia thlengin maw le! Ama ei tûr Rs 20/- man leh mi dang theh tûr cheng 20 fûn dang ak reng mi kha a ni. A aw that bîk viau vâng ni hran loin, Pathian tâna a inpêk vâng hrim hrim khan Area Baptist Choir-ah hun rei tak chhûng a tel zui nghe nghe a ni.

May 28 zîng a lo ni a. Kolkata-a ka farnute lo enkawla lo duhsak êm êm thintu, Salvation Army hruaitu ropui, Mizoram chhûng leh pâwn mai ni lo India ram pâwn thlenga rawngbâwltu rintlâk leh hriat hlawh, Commisissioner Lalzâmlova boral thu-in min han dêng leh dawt a. Pathian leh kohhran tâna mi inpe, chhûngkuaa rawngbâwltu ropui chuan nat lâwkna êm êm nei loin mual a liam ve leh ta! 

A tûk, May 29 khua a’n vâr a. Hma taka thoin phone ka’n bih a. Hun rei tak chhûng Covid-19 avânga enkawl tawh, ‘Kan Pastor zînga ka duh ber a nih loh paw’n a dawttu aia hniam chu a ni lo ang,’ ka lo tih thin, Rev. Lalhmingchhuanga Zongte-in min peih lohsan thu ka’n hre leh phei chu—rilru hi a rûm tak zet a ni. A fanu, Esther Zongte hi Divine Intervention School-a pawl 10 Mathe ka lo zirtir ve thin kha a nih avângin kan inti hnai khawp thin a. Tin, a lehkhabu ziah ropui, MAL Book of the Year 2017 ‘Savun Kawrfual’ phei chu vawi tam ka lehthal tawh a nih avânga ngaisâng lehzual ka ni. Kohhran mi dik tak, mission rawngbâwl hna tuipuitu leh kohhran hruaitu ram vei tak kan chân leh zêl hi a pawi vawng vawng a ni.

Heti hian ka ngaihtuah a, ka chhût nauh nauh mai: Hri lêng avânga ka positive nî a la thleng ve mai thei. Tin, he leia ka kin nî pawh; leia nun hnih nei ka nih miau loh avângin ka la tawng ve khawp ang.‘Ka thiante, mi fel leh Lalpa tâna mi thahnem ngaiten mual an liam zut zut lai hian, engati nge kei hi ka la dam ve tlat si?’ tih hi mahni ka inzâwt a; ‘zuaha ka la awm chhan’ te nên. Lal Davida’n, ‘Mihring hi eng nge maw a niha, i hriat reng thin ni?/ Mihring fapa pawh hi eng nge maw a niha i kan thin ni, ka ti thin,’ a tih bâk kha, ka ngaihtuahna hmâwr bâwk dân tûr ka hre lo!

Vawiin Pathianni hmu leh theia min la chelhtu hian, duh leh tum a la nei ngei ang. Kan ni kin nî-a Bial zaipâwl aia ropui zâwk, Area pawh ni lo, Mizoram huap pawh ni lo, Vân Zaipâwl member kan nih theih nân, khawngaihna avâng chauhin nungin min la zuah a, dam tlâkah min la ngai a ni mai. Kan ni kin nî-a Vân zaipâwl member te zaipui thei tûrin, liama thar leh thin ni tin kan inbuatsaih thar zêl a va ngai êm!