Sipai nih inhmeh tùra chu!

Kan khuaa Aizawl pathlawi rawn zawn zin hnên atangin Vairampur lamah sipai an la dáwn tih leh thiamna aiin pian tha leh chak an ngai pawimawh tih thu ka hria a. A mak khawp a, ka chaw ei zu tui zual nghâl sauh a! Thlèng tliak dáwn dáwna chaw inkhawrh leh inkhawrh nawn tlut tlut ka chíng nghâl.

‘Insawi theihna pawh ni loin,’ kan tih zawh chiah hian kan insawi thei ngei ngei a, ‘Uang pui chang suh ila,’ kan tih zawh hian kan uang ziah bawk. Chu vàng chuan, chutianga sawi kual kher loin, kan khuaah hrim hrim pawh ni lo, Mizo leh vai zíngah hian kei tluka sipai nih inhmeh tùr hi ka hre lo mai ni loin a hmuh pawh ka la hmu lo hrim hrim. Ka kezungpui atang ringawt pawh hian a sipai kezungpui sâ hrim hrim a. Ka kephah pawh hi nihliapa rintham khawpa hlai tha a ni. Ruah pui súr hnuaia ka inrúlpui-lu-din paw’n ka kephah tih loh chu ka huh ngai lo! |henkhat chuan, ‘Van Damme-a double role kha i ni chiang!’ te min ti thin. ‘Mit tha a ngai’ an tih paw’n mahni mit êk pawh hmu thei kha ka ni a, khawfing chat lai pawh ka hmu tawh! Sàn lamah lah, ka ban phâk chin hi chu ka khawih pha vek bawk! Chuti khawpa sipai nih inhmeh tùr chu ka ni a; kei tluka inhmeh tùr hi, he Bharat khawvêl ram zauah hian an awmin ka ring lo, ka ti hial thin.

Intlarte chu!

Thla khat dáwn Vairampur ka pan hnuah Bangladesh ramrî ka thleng a. Sipai intlarna tùr khawpui panin ka lêt leh vang vang a, kár hnih hnuah ka thleng a, intlar hma ní--in ka thleng chiah chiah. 

Kan intlar ta alãwm maw le. Ka hmaah vai pa lian pahnih an ding. An va han lian tehrêng e aw … ! A hmasa zâwk, an teh hmasak zâwk pa chu feet ruk leh inchi hnih a ni. Ka lo insawi theih ve thinna, ‘Ka ban phâk chin chu ka khawih pha vek,’ tih te chu tih mai mai, a ban phâk loh pawh a khawih pha ang, tih tùr khawpa sáng a ni! Tin, mihring tù pawh hian kan ban phâk chin chu kan khawih pha vek alãwm maw le a! A sawitu leh a sawi dàn azirin kan mak kan tiin mak kan ti lo mai mai a lo ni.

A rih záwng an bûk hnuah, a áwm, a kãwng, a chàwn, a mal leh a kephah te, a “englo” len záwng te an teh kual leh hrep a. A mit that leh that loh te an en leh a. Chutia bûk leh teh chi kima an bûka an en vek hnuah  result a han en a, mak êm êm mai hian chu Vai pa lian chu “A tling lo” nia maw le! A sàn tehrëng nèn a tling lo tho tho!

A dawta mi, Vai pa lian bawk, a hmaa mi aia lian leh sa tha zâwk, sáng zâwk bawk chu an han teh ve leh ta a. Ka rin ang rëngin a hmaa mi ai khán a lo la sáng zâwk--feet ruk leh inchi khat a pèl. (‘Chu! A sàn zâwk loh tawp chu!’ lo ti suh! Chhiar chiang rawh, “feet ruk leh inchi khat a pèl” ka ti alãwm maw le! “Inchi khat a pèl” chu inchi sãng sarih pawh a ni thei asin!) An han bûk a, a hmaa mi ang bawkin an han teh kual leh vek a. A result an han hrilh chuan a tap pùr mai--a tla ve tho! 

Ka hun ve le!

Chu mite dawta awm chu kei ka ni tawh mai a. Ka hmaa mi, ka lo ngaihtuah leh suangtuah ang ni rëng rëng loa sipai nih inhmeh tùr zâwk pahnih, kei aia rit zâwk leh pian tha zâwk, sáng bawk site chu an tla a; kei ve hi le! An intlar, an teh kual laia ka rilrua lian ber chu, “A kei ve mai mai hian eng nge mawn' le hetah hian ka tih ve le?” tih a ni. Kan khaw lama kìr lehna remcháng, kan khaw MST bus chu kan intlarna mualah chuan rawn tlàn hlauh se chuan, ka phar ding anga ka hãw vang vang ang, ka ti rilrù a. Mahse, Thuthlung hlui hun lai atang tawha vawiin thlenga thil mak ti thintu Pathian Nung chuan thil a la ti thei reng a ni, tih ringtu ka ni a, ka hãw leh tawp lo ang, ka ti leh a. Ka va “indawh” ve ta poh a.

E khai! Ka hmaa Vai pa lian pahnihte khân feet ruk an tling âwrh ve ve a; kei ve chuan feet nga ka tling âwrh! A bûkah pawh, áwm tih lenah pawh, kezungpui tih lenah pawh (ka awih lo e!) … kawng engkimah ka tluk lo fai vek. Min teh zo. Result ka nghâk.

Ka result chu ka hmaa Vai pa lian pahnihte an peih hun àwmah pawh chuan an peih lo a ni mai lo, rei fé ka nghâk tlat mai le! Thil mak a thleng dáwn a ni ang, tih ka ring “deuh” a. Khâng Vai pahnih, an rih leh sàn lama tling àwm ngawih ngawiha lang te khân, thil fel lo tih rûk, hmuh chhuah leh si an nei ang a, chu vànga “tla” chu an ni ang em aw … te pawh ka ti rilru. an rei êm êm dànah hian min uluk deuh bîk a ni ang, an inhnial a ni ang, te pawh ka ti. 

Ka result chu le!

Rei fé ka nghah hnuah chuan ka result chu an tár chhuak ta. Tling zo lo inti chung chung siin Pathianin ka chungah thil mak a thlen ring deuh reuh chung siin, hlau leh ti ril khùr der der chungin ka result chu ka va en ve ta a le! E khai! Ka chungah hian eng nge thleng ta!? A va mak ve … ! Mak bera chu, thil mak thleng tùra ka rin êm êm thleng si lo chu a ni! 

Min teha min bûk vêltute kha min uluk vànga ka result ti chhuak har pawh an ni lo a, an inhnial pawh a ni hek lo--chaw chhùn chawlh an neih vànga lo rei mai mai an lo ni! An result peih hmasak ber leh an awlsam ber pawh ka ni hial maithei asin--chiang takin “Ka tla!”

A tawp!

Khiti khian thawnthu khi a tàwp. Thawnthu mak deuh--a tàwpa eng emaw mak leh ropui deuh, mittui ti hnán sak thei i lo beisei a ni paw’n chutiang chu a ni ve lo, a tàwp a ni tawp! Chu chu hring nun hi a ni. Thil ropui, thil mak, thil rapthlâk leh dangdai deuh hmuh inbeisei deuh roh laia a nih phung, a ze pangngaia a kal hian kan lo lungawi lo ve ringawt zêl a … Kan thu lo e… A ziaktu thu thu alãwm maw le …