Zawhna:  Ka pu, nu kum 52 mi ka ni a, ka thi hi a hul tawh a, fa pali ka nei bawk. Ka thi hul hnu, kum 49 ka nih vel atang khan ka zun hi a chhuak deuh reng mai a, a chang phei chuan ka insum thei lo thin a, cheh titih hian ka awm leh mai thin. Doctor ka in entir a, investigation hrang hrang min tih tir tawh a, engmah fel lohna ka nei lo. Enge a chhan ni thei anga, engtia inenkawl chi nge maw ni dawn le? Min puih theih chuan ka lawm hle ang.

Chhanna:  Kum a tam chhoh hian zun buai hi a keng tel ve fova, mipa ah phei chuan kan phing hnuaia thal chi khat, Prostate Gland te hi a rawn thang a, chu chuan i rawn sawi ang insawiselna hi a siam fo mai a ni. Hmeichhia bikah chuan thi hul hnu hian hormones a lo tlakhniam avangin serh chhung bang a lo ro zual a, serh chhung bang hmalam ah hian zun chhuahna kawng Urethra a awm avangin chu chu a ti buai ve thei a, phing ah (bladder) zun a awm vak loh pawh hian zun chhuak feeling hi a siam fo thei a ni. Tin, fa neih pangngaia nei te hi an thi hul hnuah serh leh chhul, phing bawr tihrawl te a lo dul ve tawh thin a, chu chuan zun lam insawiselna a thlen ve fo bawk a ni.

Engpawhnise, doctor i lo rawn tawh a, zun test, ultrasound te pawh an tih tir tawh ngei che in a rinawm a. Blood sugar an test tir che em i rawn sawi hran lova, a chhan chu zunthlum nei hian i rawn sawi ang zun insawiselna hi an nei fo a ni. Zunthlum natna nei te hi thenkhat chu ni khat chhungin an zung sek bawk thin (Polyuria). Chhul lam fel lo vangin zun insawiselna hi a awm duh viau. Chhul bawk te, chhul inthlep emaw chhul hmawr lawng (Cervicitis) avang te hian zun buai a awm fo thin. Zun test i tih hian a hrik to tir kan tih (Urine Culture & Sensitivity) i ti tel em i sawi lang lo bawk a. He test hian zunah infection a awm leh awm loh an en a, a hrik to a awm chuan eng antibiotic ber nge a hrik that theitu an en leh bawk thin.

Test i tih tawh te a that vek bawk si chuan leh, zunthlum i nei lo te anih bawk chuan Overactive Bladder an tih mai hi i nei a ni thei. Phing bang a rawn sangmar thut a, zun chhuak ut ut a rawn siam nghal a, zun chhuah tur em em a awm loh pawhin chutiang chuan zun chhuak over takin an awm mai thin a ni. Mihring puitling phing hian 500 ml vel zun a khawl thei a, 350 ml vela a full hian zun chhuak a insiam tlangpui thin. Overactive bladder ah hi chuan eng hunah pawh (phing a zun awm zat tlemte pawh nise) zun chhuak a rawn thlen mai thin. Ni khat chhungin vawi 8-10 te an zung fo a, zan mut tawh hnu ah te hian zun chhuak vangin an harh phah leh fo thin.

A chi dang leh deuh ah chuan Stress Incontinence tih a awm leh thei bawk a. Chutiang chu serh leh mawngkaw bul bawr vela tihrawl, phing leh zun dawt vel support tu a lo dul hian a awm thei. Nu fa nei ngah, thi hul tawh te hian an nei duh viau bawk. Hetiang ah hi chuan khuh hlek emaw, zuan vak te, taksa hah zawng deuh a hnathawh te hian zun an cheh leh mai thin. Hetah erawh hi chuan zan muthilh laia zun chhuak thut ang chi hi a awm ve vak lo thung. Hmeichhe thi hul hnua hormones tlahniam hian chutiang chu a thlen ve thei thin a ni.

Hriat tur pawimawh ka tih chu zun chhuak thei a i la awm avang leh, chu i zun chhuak chu i la hriat avang hian i thazam (nerve) lam fel lohna i nei lo tihna a ni phawt a. Zeng te hi an phing supply tu nerve a chhiat tel fo avangin zun chhuak an hre thei lova, an hriat loh karah an lo zung leh mai thin a ni. Zunthlum ka rawn tarlan kher nachhan pawh zunthlum hian nerve a ti buai fo a, zun chhuak leh zun hun control a ti buai fo thin a ni. Zung zo tawha inhriat hnua phing ah zun la chambang a awm thei a, chu chuan a hnu reilote ah zun chhuak a rawn siam leh thei bawk.

A enkawl dan kawngah chuan damdawi lam aiin natural enkawlna an tih te hi a tangkai zawk fo. Chung zinga pawimawh zual chu Bladder Training (Scheduled Voiding) an tih hi pakhat chu ani a. Zun a chhuah et et pawhin ni khat chhunga zun hun insiam hi a ni. Chhuak viau anga a lan pawhin in control hram hram a, timing insiam hun kha nghah thlen hram hram a pawimawh ang. Hemi timing hi a inkar rei chhung tih tam hret hret tur ani bawk.

A dawt leh ah chuan Pelvic Floor Exercise an ti mai a. Nau nei zun buai laka ven nan hetiang exercise te hi an chawh thin. Hahdam takin thut tur ani a, ding chung emaw mu chung pawhin a tih theih tho bawk. Zan mutna ah emaw zing harh velah te an ti deuh ber thin. Kap bawr tihrawl, kan zun laia kan san mar thin ang kha timing mumal tak neiin an ip thin a ni. Entirnan - minute 1 chhungin vawi 10-15 rang takin an ip a, second 30 hnuah tih nawn leh tur ani a, a ngai tho muangchang zawkin tih leh tur a ni. Hetiang exercise hi ni khatah vawi 4-5 te an tih tir thin.

Hei bakah hian zan mut dawn hnaih a tui emaw thingpui lam chi in loh te, thil thlum lutuk emaw thingpui/coffee thlum lutuk in loh te a tha a. A nasa zual ah chuan damdawi te pawh an chawh thin. Mahse nangma tan chuan damdawi ei hmain heng tih tur ka rawn tarlan te hi lo ti phawt ta la, a puih theih ngei che ka beisei. Chuti chunga a la ziaawm loh chuan doctor te rawn leh thei la a tha ber ang.