Tunhnai khan ka zunah protein a tam avangin ka inentir a, kal biopsy ti turin min ti a. Biopsy han tih hian Mizo rilruah-ah chuan cancer tih lam hi a kawk nghal ruih thin a. Biopsy atang hian thil dang a hriat theih emni? I column hi ka lo chhiar ve ziah a, ka hlut khawp mai. -Fela Dinthar

Chhanna: I harsatna rawn sawi hi zunah protein tam chungchang a ni a. Kan zunah hian protein tlem a zawng chu a awm ve ngei ngei a. A normal level hi 150 mg/day (ni khat chhunga kan zun a protein rawn tel zat tihna) anga ngaih a ni a, zun test (routine urine examination) ah chuan 30mg/dL aia tlem tura ngaih a ni. Random test ah hian protein hi a tam nia hriat chuan darkar 24 chhung zun an khawl atangin protein awm zat an teh leh thin a ni.

Kal (kidney) hi kan taksa organ zinga pawimawh em em mai, kan taksa thuahfaina khawl pawimawh tak mai a ni a. A function mumal loh emaw a buai chuan harsatna chi hrang hrang a thleng thei a. Tin, insawiselna nei mang si lo hian kal hnathawh a lo buai ru thei reng bawk a ni. Tin, kidney function test kan tih hian thisen a Urea leh Creatinine awm zat an en thin a, hemi la normal level chung hian protein leak kan tih mai hi a awm thei bawk a ni. Tin, ultrasound hmangin kal that leh that loh an en thin bawk a, mahse protein leak tam zawk hi ultrasound atangin a hmuh mai theih loh bawk thin.

Chutiang avang chuan protein  leak a lo awm chuan kal timur (renal cells) lamah fel lo a awm nge awm lo en nan biopsy an chawh ta thin a. Chu chuan cancer lam ai mahin cellular disorder a awm nge awm lo en nan an chawh thin a ni. I sawi ang deuhin biopsy han tih hian cancer lam hi a kawk duh viau mai a. Doctor ten biopsy kan chawh pawh hian a tam zawkah chuan cancer rule out nan a ni fo bawk a. Mahse kidney biopsy an chawh chungchangah che hi chuan protein leak chhan hriat nan anih hmel zawk e.