Kan senior doctor Dr.P.C.Lalramenga, Medicine Consultant, Civil Hospital nena kan titinaah chuan Mizo mipuite hi India ram pumpui ah pawh a nawlpui a lakin Lipid Profile nei chhe ber kan nih thu min hrilh heu mai. Hemi chungchangah hian research an kalpui mek thu te, chiangkuang zawka mipui hrilhhriatna neih an tum thu te min hrilh bawk a. Chung hunah chuan chipchiar zawkin an la rawn sawi thei turah ngai ta ila. A vei awm riau a ka hriat avang leh, kan lifestyle inthlak nasa hian kan hriselna lamah nghawng a neih thuk sawt riau avang te bakah, tun hnai chho ah hian kum la naupang, la valai tak tak te Heart Attack (Lungphu Chawl tia kan sawi mai thin hi) leh Stroke (thluak a thisen zam chat) vanga boral emaw, an dam chhuak a nih pawha bawrhsawm chhunzawm, a then phei chu zeng hlen te an awm tak fo ah hian mipui nawlpui hriatthiam tura han ziah hi tul in ka hria a, ka rawn ziak ta rawih a ni e. Lipid Profile kan han tih chuan a awlsam zawngin kan taksaa thau awm zat leh dinhmun ani ber mai a. Kan ei leh in atanga kan taksain a lo lakluh hi chi thumin then ta ila, Carbohydrates, Protein leh Fats te an ni a. Carbohydrates hi kan taksa chakna pe tu ber (energy source) ani a, kan taksa in a enkawl theih aia tam kan lakluh chuan blood sugar a rawn sang tial tial a, thisen thlum (Diabetes) neih a awl ta thin a. Protein hi erawh kan taksa tihrawl te thawm tu ber a ni a, a tha e kan tih rualin thin leh kal tha lo tan erawh ei fimkhur a ngai thung. Fats kan tih hi thau chi hrang hrang a ni a, thau ah hian a tha leh tha lo te a awm ve bawk a. Kan taksa in a lo buaipui theih chin lakluh chuan a mamawh bak a paih mai thin a, a tam lutuk erawh chuan kan timur ah a in hnim phum a, a bikin thisen zam bangah hian a bet tam zual a, chu chuan thisen zam a ti chhah a, thisen kal pangngai tur a ti muang a, pressure a lo insiam belh a, lung (heart) banga thisen zam ah te, thluak thisen zam bangah te a lo beh tam chuan pressure sang hian heart attack leh stroke te hi a thlen duh ta bik a ni. Thin (liver) lamah a beh nasat lutuk chuan thin thau bawh (Fatty Liver) kan lo nei ta thin a, control that loh chuan thin hnathawh buai bakah thin sawng thlengin a thlen thei a ni. Mizote hi kan taksa hi average a lakin a lian lo lam chi kan ni a, tunhma kan pi leh pu te khan mawm leh thlum chu ei ve bawk mah se lo hna te an thawh nasat vang leh, ke a an kal tam vangin an hrisel tlangpui ani awm e a tih theih a. Hmasawnna in a rawn thlen chu ani ber ang a, thau leh mawm hi kan ei nasa ta em em mai ani tih hi hnial rual a ni lo. Sa kan ei nasa a, tunah phei chuan KFC te a han awm belh leh a, kan chin ngai vak loh, chaw tel lova sa hlang ei te kan ching sawt ta khawp mai. Kan ni tin chaw eiah pawh hian mawm/chawhmeh kan kan ei nasa tawh hle ani. Morning walk-a ka kal kual hian zing kar atang hian khualzin tur bakah zing leng chhuak leh teihawi, exercise la te thlengin kawngsir zingkar thingpui dawr inhawngho hi kan bial tuau tuau reng mai a. Chung dawra kan ei tam ber chu tel mawm taka kan paratha leh chhang chi hrang te, chana kan mawm te ani deuh ber. Heng tel an kanna te hi a hlui an hman nawn te pawh ani fo in a rinawm. A him hran lo khawp ani. Health awareness lamah hian hma kan sawn viau e kan tih rualin kan lifestyle lamah erawh kan in adjust nep hle thung. Office kal tam zawk hi lirthei a kal deuh vek kan ni a, office ah kan thu nileng leh a, kan taksa hi a che tlem em em mai a ni. Exercise lak kan intihhmuh tial tial a, chutih laiin kan ei leh in lam kan la uluk tawk lo hle thung. Fast food an tih mai, chow, rice, roll etc te hi kan ei nasa ta khawp ani. Kan ei leh in mil turin kan taksa a che tam leh si lo hi a hlauhawm lai chu a ni. Ke a kal te hi kan intihhmuh deuh deuh a pawimawh khawp mai a, chumi tur chuan kan kalkawng te pawh hi ke a kal te tana kal nuam tura kan ruahman a pawimawh hle bawk. Ultrasound-a mi kan lo en hian insawiselna nei hranpa lem lo, routine check up rawn ti mai mai zingah pawh Fatty Liver hi kan hmu ta fo mai. Zu an in vek kher lo lehnghal! Chuvangin Health Department hnuaia program lian tak rawn thang mek, Non-Communicable Disease Program pawh hi kan ngaihhlut deuh deuh a tha hle mai. India ram zinga mihring tlemna ber pawl hian ber nihna kan hauh dan hi a duhawm lo sawt hle mai a; chuvangin, kan lo hrisel lehzual nan Physical Exercise leh Ei leh In uluk hi tun aia nasa zawkin intihhmuh ila, kawng sir banner leh hoarding-ah te pawh hian thlarau thil deuh deuh tar chei chuai reng ai chuan heng lam inzirtirna te hi tar tam ila, kohhran lam thleng pawh hian vei deuh deuh ila tiin thahnemngai takin ka han ziak ve a ni. Hriselna ngaih pawimawh hi a thlarau em em a ni.... Heidenrial!!