Zawhna: Khawngaih takin ka zawhna hi min chhan theih chuan ka lawm ngawt ang. Hmeichhia kum 55 ka ni a, kum 8 vel kal ta atang khan ka ke zungpui tin hi a to thar reng mai a, a hlui a liam chiah hian a thar hi a bul retah a rawn to thar leh zel a, a na phei chu a ni lo a; mahse, a mawi lo em em a, a ung tlat zel bawk. Doctor pawh ka rawn ve nual tawh mah se a reh thei tlat lo. Hei hi engvang nge ni ang le? Tihreh theih dante hi a awm ang em?

Chhanna: Kan tin lan dan leh danglamna te hi natna eng emaw tak avang a ni fo thin. A than dan dik lo te, a rawng inthlak danglam te, a mam dan danglamte thlengin chhan a nei thei a. Hei bakah hian inthlahchhawn thil avangtein danglamna a thleng thei bawk. Natna zingah vun natna eczema, psoriasis tih te hi tin tibuai duh chi an ni zual. Tin, zunthlum te, chuap leh lung lam tha lo ah te, autoimmune disease kan tih mai natna thenkhat – rheumatoid arthritis ah te tin harsatna a awm duh zual. A hma lama i lo inentir hian investigation engte nge an tihtir che i sawi hran lo va; tin, Skin Specialist i pan tawh em tih i sawi lo bawk. Benvawn natna anih leh nih loh hriat hmasak te, a chhan ni thei awm ang hriat hmasak te pawh a tha hle mai. Engpawhnise, Skin Doctor lo inentir leh thei la, an puih theih ngei che ka beisei.

Zawhna: Ka pu, hmeichhia kum 21 ka ni a, ka period hi thla hmasa in rei deuh a awm a, eng nge a chhan min hrilh thei em? Ni dangah chuan ka period zawh a hun tawh a, khawngaih takin min hrilh theih chuan ka lawm hle ang.

Chhanna: Issue hmasa lamah te hmeichhe thi neih chungchang leh harsatna te kan lo ziak tawh thin a. Hmeichhe thi neih (menstruation) hi a complex khawp mai a, hormones chi hrang hrang han che vel atanga thi lo nei thin in nih avangin chhan ho te te avang te pawhin thi neih buai hi a awm thei. Entirnan, menstruation atan hian hmeichhia bikin hormones an neih Estrogen leh Progesterone te hi an pawimawh ber a. Heng hormones te hi thluak lam atanga insiam hormones dangin an control chhawng ve leh a, thyroid hormones te thleng hian an inrawlh tel bawk. Chutiang duah a nih vang chuan taksa hah lutuk te, thau emaw cher lutuk vang te, ei leh in mumal loh vang te, zan mut buai vang te leh, Thyroid leh Liver function buai (hormones tam ber hi kan liver siam a ni) vangtein thi neih buai hi a awm thei a ni.
Hmeichhia an inang lo em em a, eng chen hi nge normal tih pawh a range a zau thei viau. Thi nei rei chi an awm ve hrim hrim a, nei rei lo fe fe (ni hnih khat lek) te pawh an awm ve leh tho. Damdawi thenkhat thi neih tibuai thei a awm nual bawk. Tin, hmeichhe chi insiam leh mipa chi nena intawk tura a inbuatsaih kawngah hian chhan ho tete vangin kal sual a awm thei bawk a, chutiang chuan thi neih han buai zeuh a siam duh hle. Chibawm bawk kan tih mai Ovarian cyst te hi nang ang kum rualah hian a awm duh phian mai a, ultrasound hmanga chhul leh chibawm han en zuaite pawh a tha viau. Chhan mumal awm lova thi neih han buai zawk hi hmeichhe thenkhat chuan an nei ve fo mai a, chuvang chuan a awm chhunzawm loh chuan a pawi lo turah ngai la. A awm chhunzawm zel anih erawh chuan Hmeichhe doctor inentir ngei a tha ang.