Kan rin Isua hi, tûnah hian lo kal thut ta se … “Lawks aw, Lalpa,” ti tùr hi kan tam àwm hi ka tia!

Hlaa kan sak tam ang hù hian kan thlahlel chiah em?

Lal Isua lo kal leh hun nghâklel (niàwm) takin kan zai chiam chiam a—chu lam hla chu kan sa tlut tlut a; sak tur pawh kan ngah narawh e; a tha vek e. Kan Kristian Hla Bu hman laiah ngat phei hi chuan, “Thihna leh Nakin hun” tih thupuiah ringawt pawh, khi lam ngaihna hla sak tùr hla 51 ngawt zuk awm a! Hla thupui hläwmah chuan kan ngah ber hial! Krismas hla ai paw’n kan ngah zâwk. A tlukpui thuak, “Lal Isua lo kal lehna” hla sak tùr pakua kan nei bawk. Tin, hêng hla thupuiah lo pawh kan nei teuh tho. Entírna pakhat chauh han sawi ila: “Pathian Lalzia leh Ropuizia” huanga mi, “Aw Lal Pathian, i kut chhuak thilsiam tinreng…” hla cháng tàwp berah pawh, “Lalpa chu au thawm nèn a lo kal hun chuan…” kan ti tho tho!

Mitthi lu menna leh khawhar ina kan hla tuipui ber pawh hetiang lam hla deuh vek hi an ni a. Tu nge, mitthi vuinaa, “Hmanah Kaisar Lal Lian Réngpui” thlang nulh nulh ang? Biak in páwn lamah pawh hian ‘Vàn ram ngaih thu’ hi kan va han sawi tam mawlh mawlh tak, ti rawh un? Mitthi vuinaah kan sawi a. YMA khawhar in tàwp zàn/ràl zànah a loin thu dang kan sawi tel thei lo a. Kan âw leh kan ká hi chuan a châk a ni.

Mahse, i’n ngaihtuah chiang teh ang: ‘Lal Isua hi lo kal tak tak se kan ti em?’ tih hi.

“ Timing rih lo ve!” ti tùrte!
Lársap kawta in thut thap lai, i la tawn ngai rêng rêng lohten chibai an bûk lai chea, minute rei lo tê-a ram khat Chief Minister atána an lak luh dáwn têpah khán, Lal Isua hi lo kal ta thut mai se, “Bei timing lo mang e a, kan Lalpa chu a!” i ti duh mai lo ang maw!?

Opposition party-ah a kum a kum, term duai lo i lo tang tawh a, i la chàwl duh si lo a. Rulling lama i thut ve hun thlírin beiseina sáng tak nèn ram leh party rawng i báwl ve tlat a. A kum a kum tél, hah thi kúlin party tán hna lo thawkin i’n campaign ve lâwp lâwp a. A tàwpah, inring deuh si, ring chiah lo deuh si chunga i awm laiin, i tlin thu an puang thut mai! Chibai i dawng sap sap a nih kha. I kiangah Vai leh Mizo News channel ten interview tùrin an camera sei chiin an tin khup mai che a. Khatih lai tak khân, Lalpa hi lo kal ta thut se … i ti viau em? “Bei ho ve aw … !” i ti duh lek mai lo’ng maw?

Zan mut hmunah i nupui kiangah, ‘Nu-i, hei kan nghâk rei ta vang vang tawh bawk a. Vawiin lamah bill chu ka ti fel vek tawh a. Naktûk chawhma first hour-ah ka va la ve thei dáwn ta e,’ i tih lai; in nu ngei paw’n, ‘Awi! Pa-a, ka va hmangaih tak che êm! I tán eng ni lo mah ila, ka khawvêl i ni!’ a tih hluai laia in inkuah lai tak mai khân, “Vàna Pathian áu thäwm chu, vàntirhkoh chungnung ber aw nèn …” rawn ri ta dum dum mai se la … pawi in ti viau zâwk mai lo’ng maw!?

Tù kan hmuhsitna thu ni lul lo se, panhnah zuara ei zawngte pawh hian, a “thut!” ang chi záwng chuan rawn kal se an ti bîk hauh lo ang! Ni tina pai li pai nga vêl hralh thìn khân, pai 13 teh meuh mai an hralh thut zànah, “Vàna vàntirhkoh chungnung ber aw” chu hriat an châk viau lo maithei a nia!

Chûng aia tûl ti lo tùr leh la châk rih vak lo tùrho chu, check gate zawng zawng paltlang zo vek tawh hnu, man pakhat mah awm loa vai sumdáwng hnèna an kuhva truck trip riat lawih unload hmabâk tùr neiho hi niin ka hria! Kawng khati leh chen chen, pumpelh tiam lo paw’n, a hla êm! ‘Pawisa inhlan fel dáwn veleh A lo kal thut roh si ten!’

Chutiang zêlin, nupuite tána rinawm ve ngar ngar thìn, “eng emaw thut” vàng tak taka mi nu lo uire mék lai pawh hian a hreh ang chu aw … !

Hun rei tak chhúng, thianghlim taka nula leh tlangvál lo inngaizáwng ve ngar ngar tawh; eng eng emaw avànga innei lawk thei lo; chûng chhúng zawng pawha, insúm tàng tânga la invawng thianghlima reng; Pathian tihna avànga la inserh tlat; a tàwp tàwp innei tùra sawi fela awmte pawh hi … Hlim taka inneih inkhâwm hun hman te, a hnua cake zai leh thlalâk ilo fahran hi chu a ve mai mai te pawh an ti êm êm tawh maithei e!

Kohhran hriatpuina leh chhúngte remtihpuina thlapa khawi emaw picnic spot-a “Zan thianghlim” kan ti dáwn nge, hman tumte tán pawh hian, lo kal rih chu a tih chi vak lo ang! Pathian an tihna vànga an invawnna an fakawm tehrêng nèn! |hiante haw hunah mo ber a’n inbual hmasa a; muang changin, a samte a’n ti ro (der) vêl hmasa ang a. A hnuah khumah ring fàna amah lo nghâk rengtu lam chu a’n pan ang a. A rawn ter that that tawh dáwn a ni. An han inchu-kha kual vêl a. Chu vêleh, Pathian aw a rawn ri phut ang a; Vàna vàntirhkoh chungnung ber aw-in a rawn zui zat zawngin … mo neitu chuan, ‘ ’Nge i inbual hmasak thawt thawt kher ni!?’ te pawh a ti duh hial maithei asin—a hriat miah loh!

    Mi tam tak, Kohhran bèl tlat, A lo kal lehna atána inbuatsaih reng, inring renga awmte tán pawh, chu hun lo thleng ngei tùr chu, nghahhlelh lohna leh châk viau lohna chhan an nei ve thei tho mai—fate vàngin! 

    ‘Lalpa, ka fapa hi De-addiction centre-ah kan dah lût chiah a ni si a le!’ ti tùrte pawh kan awm nuk maithei.

Tlipna
A enga pawh chu ni se, “Lungngaihna khawvêl… tahna ram,” ti sasawi thìn mah ila, tú mah hian thih hi kan la châk viau lo a, kan la phür hûrh lo vek! Lal Isua lo kal leh hun, hlaa kan sak kan sak leh nghâkhlel àwm deuha kan lannate pawh hi lem kan channa a ni thei hial ang em? Leiah hian tih tùr ngah hian kan la inhre vek a, thawh zawh loh leh hmabâk neiin kan la inhre vek a, Vàn làwnsan atána ui hi kan va la ngah tak êm!

Eng pawh ni se, eng hna pawh chu thawk ila, eng hna paw’n min hmuak se la, eng contract emaw kai sànna tùr eng thil pawh kan hmaah awm mah se, Lal Isua lo kal lehna tùr hi, kan nih ang ang hian, kan thawh lai thawk mawp mawp chung hian, inring reng siin, rinawm taka awma kan nghah mai a ngai a ni.