Zawhna: Ka pu, heng LGBTQ te hi pianpui nge duhthlanna ni ang? Opposite sex it na te hi an nei thei ang em? Tihreh theih ani em?

Chhanna: He zawhna hi a pawimawh hle mai a, mi tam tak rilru kaptu ani ngei awm e. Khawvel inhnialna tawp thei lo a ni a, sakhuana lamah pawh harsatna thlentu lian tak a la ni reng. Chuvangin ka chhanna che hi a medical lam thlirna piah ah keima mimal ngaihdan te pawh han tarlan tha in ka hria a, ka ngaihdan emaw thlir dan hi mi ngaihdan a ni vek kher lo thei bawk ang. Kan ngaihtuahna ti zau atan pawh a tha turah ka ngai thung.

LGBTQ chu a full form chuan Lesbian, Gay, Bisexual, Transgender leh Queer tihna a ni ber a, hei bakah hian hemi chhunga inkhung rem chiah lo an la awm avangin LGBTQ+ tih te pawhin an la sawi belh thin. Sexual orientation or preference tiin English chuan kan sawi thin a, kawppui duh zawng an thlan atang te, anmahni an inhmuh dan (gender identity) te a zirin eng category berah hian an insawi thin. Hmeichhia mahni hmeichhe pui kawp thlang te, mipa mahni mipat pui kawp te, a eng zawk zawk (mipa or hmeichhia) pawh kawp thei te, mahni serh thlak danglam hial te leh chung zinga la tel lo, identity nei hrang te sawina a ni.

Mihring kan lo pian hian keimahni duhthlanna ni hauh lovin kan nu leh pa te atanga genes kan dawn insiamrem chuan mipa (XY chromosome) leh hmeichhia (XX chromosome) ah min ruat a. Naute lo insiam tan tir kha mipa hormones bik Testosterone chuan mipa sexual organs (sazu leh tilmu) a rawn siam ta mai a, chutiangin hmeichhia pawh an hormones bik Estrogen leh Progesterone chuan an sexual organs (kakuk, chhul leh chibawm) a rawn siam leh mai bawk a. Heng sexual organs te hi surgery hmangin thlak danglam mah ila kan pianken biological sex chu kan chromosome vangin engti kawng maha tih danglam theih a ni lo.

Kan lo tleirawl chhoh hunah kan hormones te hian secondary sexual characteristics min rawn neih tir leh ta bawk thin – mipa chu tilpawr aw te, tihrawl rawn lian te, tilmu rawn thang a, baw (semen) rawn insiam ta te, hmeichhia ah hnute rawn thang zel te, khel (pelvis) leh mawngbawr rawn lian zel te. Heng kan danglamna leh sexual organs bakah secondary sexual characteristics te hian Pathian min siam dan chu a ti chiang hle kan ti thei awm e. Mipa chi (Sperm) te hi an tih tur neih chhun chu hmeichhe chi thlah (reproduction) a ni tawp mai a, hmeichhe thi neih (mense) te hi nau insiam tan rawn thanlen nana chhul a buatsaihna a nil eh tlat bawk. Kan Kristianna nen hian a inmil em em a, inthlahpung tura Pathian min ruahmanna a ni tlat a ni.

Mizo tawnga kan neih chu Tuai leh Patil hi ani mai a, tun hnai hian Transgender anga in class te hi an awm ve ta zel a (sex change an nei chiah em chu ka hre lo). Tin, bisexual kan tih mai te pawh hi an awm ve ta fo (mipa nupui nei reng chunga mipa dang kawp ching tlat te). Pianken kan tih chuan engemaw naute insiam dan kawnga fel lo, chromosomes/genetic lam fel lo tihna a kawk thei a, a awm thei a, mahse a tlem khawp thung. Duhthlanna ani kan tih theih rualin anmahni duh vanga Tuai emaw Patil han ni ta hi chu an awm kher lo mai thei. A then chu experience chhe tak an tawn vang te (entirnan mipa naupan laia mipa puitlingin a lo khuaikhem te), an chenna environment zir loh vang te, an thil hmuh leh hriatin a influence vang te a ni thei; chutiang chu an tam zawk hle a rinawm.

Mipa emaw hmeichhia mahni anpui kawp te hian an opposite sex itna an nei thei em tih zawhna hi a chhanna a in ang lo thei awm e. Opposite sex itna nei reng reng lo an awm thei a, chutih laiin a remchan chuan kawp leh thei mai te an awm bawk (patil pawh a hnua pasal fanau nei te an awm ve leh tlat). Tihreh han tih lai tak hi erawh a mihring a zirin a in ang lo thei viau ang. Mahni anpui it reng chunga pangngai taka nupui pasal nei ta an awm fo a. Chutih laiin ti thei bau lo an awm tlat bawk. Vuak sim theih ang te pawha ngai kan awm fo. Chutiang ngawta vuak a sim theih a ni lo. An thlirna atang chuan opposite sex inkawp (heterosexual) te hi an hmu dik lo emaw hmu mak ve zawk daih thei. 

Engpawhnise, counsellor thiam tak te enkawl ngai an ni a (enkawl an lo duh hauh lo thei bawk). Kan Kristianna atang chuan a rem hauh lo mai a, Pathian duh loh zawng tak a ni kan ti thei ang. Ram changkang zawkah te erawh heng mite hi Pastor ang te pawhin an lo pawm ve leh thei ta zel mai a. Kan hnam zia leh sakhuana a ti derthawng thei viau awm e. Synod hian ngaihdan felfai tak an nei a, ka hriat sual loh chuan Salvation Army lam pawh hian an nei awm e. Pawimawh ka tih zawk chu hetiang sexual orientation emaw gender identity hrang nei te hi puih mamawh an awm hunah engtinnge kan lo puih ang tih lai kha a ni. Kan hnam leh sakhaw mila counsellor te’n kaihhruaina an pek dan tur hi kan kohhran te hian tha takin ruahman thei se a tangkai khawp ang.