‘Hla hlui ngaina pa, i duh hmànlai thei si!’ tia tape bula cassette play tùr kan inchuh chánga min nghawk fiam taih taih thin lai te kha aw … A mi nghawk kha ná tih chu sawi loh, za si loin nuam ka ti veng veng zâwk thìn. Guns N’ Roses, AC/DC, Metallica te leh, a ném berah pawh Tanya Tucker tih vêl a ngaihthlâk duh laiin keiin, Lobo, Lionel Richie, The Eagles te leh, country-ah pawh a hluiho—Hank Williams leh Skeeter Davis tih te ka tuipui daih si a.

Inrinni tlai khat chu Musicatto cassette dàwrah country collection kan lei dùn a. Kha cassette-a hla pakhatah khán kan inlungrual ve hlauh! Chu chu Side B pahnihnaa Pussycat-ho hla, “Love in September” tih a ni. Kan duh dun thinzia kha!

Kha hla kan duh êm êm hnu khán, a hla aia ka duh zâwk Amber-i chuan keimahah duh loh a nei ta nge ni pawh ka hre lo, a kum leh September thla liam rualin min liamsan a!

Kumsül tam tak a vei hnu, hetia September thla chu a lo thâwt nawn leh lai, vawiin tlai angah te hian, Amber-i nèna “kan hla” kha ka ngaithla leh thìn a … Kan nunte ka chhui kîr a; lung a lèn rualin ka na nawn leh thìn!

Pan lai khawvêl

Amber-i nèn chuan véng khat naupang ä, hnap ngah leh harh, nghal tel bawk kan ni thìn. Kumah mai kan inrual lo a, Ua-di (Anganwadi) atanga inpáwl rual chho kha kan ni a—màwlah pawh! Sikul khatah lûtin, roll number indawt chho kan ni zêl bawk. Roll number indawt loh kha kan hlau thìn khawp a; kum tàwp Farewell ní-ah, kum thara sikul admission tih ní-a a indawta hming ziahtír tùrin thu kan intiam thìn.

Kan véng Primary Sikul II-a hmeichhe bengchheng ber leh nui ring ber a ni thìn a; kei, mipa thâwm na ber! Ruahthimpui a lo thlen cháng leh ruah súrin kan sikula bengchheng a siam vànga class-a zirtírtu rawn luh loh cháng te hian khuangpu ka ni thìn a; ani hla hriltu.

A chhúngten Amber-i chu mipa dang kawm vak an phal ngai lo a. Keimah chauh mipa kawm an phal a; mipa dang a kawm loh nána amah véngtu ka ni bawk thìn. A hmeichhe thiante an in-rubber-zuan cháng paw’n a tel ve peih ngai lo satliah lo a, a ti buaituah a tang ziah a; keiin ka lo pui thìn! A chhúngten mipa thian kawm an phal lo chung leh, a véngtu ber kei ka ni chungin, Inrinni chhùna kan thian mipa rualho thïr chhe zawnnaah a tel ve ziah a; alluminium leh dár tih vêl hmu thei ber a ni ziah bawk! Mi in chung vawm leh tlànchhiat kan rual cháng paw’n, a nuih rin theih êm avàngin man chhuah kan tâwh phah fo. Amah chu, kan thianzaho bûk te sakah pawh, a rûkin cook a ni thìn tak e.

A hriat pawh kha kan va’n inhre chiang ve tak! Kan chawhmeh duh záwng atanga kan lehkhabu chhiar duh záwng thlengin kan inhriatsak thìn. Anni’n cowboy bu, “Sudden” leh “Wild Bill Hickok” tih vêl a ngaina a; keiin “M & B” leh “Photo Romance”! Music-ah pawh … ka sawi tawh khi. Chutiang khawpa inkàwm ngeih leh inhnîmhnai chu kan ni. Chu bâka inhriat chianna dang chu a awm leh theih pawh ka ring ngai lo!

Inthenna!

Páwl ruk result puan ní-a sikul kawta kan innghah tum kha ka la hre reng mai. A kum leh chu páwl sarih board êkzam kum a ni tawh a. Dàn ngai të bawka roll number indawta awm tùra a ruala admission tih kan tum rilru leh kha a ni a.

Amber-i chu a pa’n result a rawn lampui a. Result an lam zawh chuan amahin ka dinna lam a rawn pan a. Ka beisei loh tak thu min rawn hrilh a nih chu!

‘Á pa’n, “Nakkumah i u lehkha zirna, Shillong-ah i awm ve dáwn,” min ti a …’ a ti a.

Hnuai lam a bih ngar a. A chhan pawh ka hre lo.

‘E he!’ ka ti ringawt! Chutia ka tih rîkngawtna chhan chu ka inhre lo!

A hmél chu ka’n en chiang a. A ngui a ni tih ka hai lo—ní dang a ang lo tih pawh. A result ka ensak a. Second term aiin kan ti chhe ve ve. Sàwm pakuana a ni; kei, sawm hnihna. Kei aiin a ti tha zâwk. A nguina chhan chu a tih chhiat vàng a ni ang em le? Ka ring lo!

In lam panin kan häw dùn a. Ni danga kan hàw thinna kawng ni lo, tuikhur kawng, ramhnuai deuh roh lamah kan hàw daih. A reh ruih mai. Thui tak kan kal hnu thleng pawh chuan kan la ngawi dùn reng a. Kawng sír thing zár vêla thereng hräm vawl vawl bâk ri hriat tùr a awm lo.

Chutia kan ngawih dun reng lai chuan kan rilru chuan thil tam tak kan sawi ka ring. Mahse, eng nge kan sawi ang tih pawh ka ngaihtuah thiam chuang lo. Engati nge chutia tawng miah loa kan ngawih dun rengna chhan pawh chu ka hre chuang lo! Tin, kan inzah deuh tüt niin ka hria. ’Ngati nge le? Hmun danga min awm bosan dáwn vàng a ni ang em le?

Kan sikul atangin an in chu a hnai zâwk a. An in kan thlen dáwn têpah chuan a rawn tawng chhuak hlauh a. ‘Kum thar ruai theh tûkah Shillong thleng Á pa’n min thlah ang.’

‘E he!’

‘ 'Nge?’

Kei chuan engati nge, “E he!” ka tih leh rîkngawtna chhan chu ka hre lo leh a …

Ngawih reng chu dik bîkin ka hre tawh lo, ‘A nuam àwm!’

‘Ka tih i ring 'mi?’

A ding dat a. An kawt kan thlen tawh vànga ding pawh a ni chiah lo, ka chhànna a nghah vàng zâwka ding a ni. Ka mitah tak min en kal a.

Kei chuan, ‘Ka hre chuang lo! A! Vai ram te chu a nuam zâwk daih ang chu … ka ti! A … a pui dáwn sia …’ ka ti bah nuai mai.

‘A nawm leh nawm loh chu … kan chènpuite azir a ni zâwk ang … ka ring.’

Ani pawh a tawng bah ve deuh. ‘Nia!’ ka ti leh ringawt!

‘ 'Nih chuan, kim lo lam ngaihtuah loin in lo hlim dáwn nia,’ a ti a.     An kawngkapui a pan a, kan inmang tha zui a.

Dik tak chuan, inngaih thu vêl sawi hi “pa lo” ka ti riau a, sawi pawh ka zak. A nih leh, Amber-i chu ka ngai ang em le? Nge ka ngai tawh sa reng? A tel loin ka khua a har ang em le le? “Kim lo” a tih kha amah a nih chuan, ka nunah hian “kim lo” a awm ve ang em? Chûng zawhnate chu in lam pana ka kal hnak hnak lai chuan ka inzâwt neuh neuh a. Tùna ka chhàn theih dàn ber chu, “Ka ring!” tih a ni!

Ràwl lai lunglèn

MST bus station-a Amber-i nèna kan in-bye bye lai, thlasik hun chu a liam a, nipui pawh lo thaw-in a liam leh tawh—ruahthimpui thlen hun fùr pawh. Amber-i tel loin hun leh ní ka chhiar chho a. Lehkha zir nasat a ngaih kum a nih vàng pawh ni chuang loin thian ka thlah ve ringawt a. Mahnia sikul kaiin mahniin ka häw leh thìn. Sawi tawh angin board êkzam kum a ni a, tan a ngai viau. Mahse, ka zêp lo—lehkha ka zir thei lo! Ka note bua ka kut ziak kárah ngei mai chuan Amber-i nui hmél te ka hmu thìn! 

Ka awm dàn chu ka inhre thiam chiah lo … lo! Ka khua a har a, ka lung a léng a ni! Amber-i ka ngai tih hi ka zêp thei lo! Keimahah hian kim lo a awm a. Chu chu mi dang kiangah thup tum eng ang mah ila, mahni leh mahni ka inbum thei si lo!

Tlai khat chu, vawiin anga September thla tìr tho hi a ni a. Eng nge ka en tih hre miah loin TV chu ka thlír reng a. TV síra kan phone chhawp lo ri ral ral pawh chu ka lo hre lo hial! Páwna awm ka nu chuan phone la tùrin min rawn ko. Ka la a. Amber-i a lo ni! A aw ka hriat chuan ka phu deuh zawk!

TV ri ka ti zawi sawk sawk a. Amber-i nèn chuan kan inbe ta a.

Vai rama a sikul thar chu nuam a tih ka ring êm êm a; an sikul chanchin pawh sawi tùr a ngah ka ring. |hian thar pawh a chhar nual tawh ang. Tin, Shillong khaw chanchin te leh thil dang dang sawi duh pawh a ngah tawh ang a, min rawn hrilh hlàn pawh a nghâkhlel tawh hlein ka ring.

Mahse, chutiang lam rëng rëng a sawi lo! Shillong-a an sikul, hmeichhe hlang luhna a nin thu leh rawn hàw a châk thu hlïr a ni a sawi ni. A tap lo chauh a ni! October thlaa puja chawlh laiin a ú nèn rawn hàw zawk an tum thu a sawi a. Kei ve thung chuan sawi tùr vak ka hre si lo a. Sawi dáwn pawh ni ila ka ngam chuang si lo ang! Tin, PCO atanga min rawn bia a ni si a, pawisa a cháwi tam ka hlauhpui si. Rei lutuk pawh kan inbe ta lo.

Amber-i aw ka hre ringawt pawh chu ka läwm veng veng a. Mahse, phone ka dah hnu lawkah ka khua a har zual sauh a, ka lung a léng thar leh êm êm bawk. Kan inhmuh leh ní tùr te ka ngaihtuah a—thla leh “daih” a ni! A va rei dáwn tak!
Walkman ka la a. Amber-i cassette min kawltír kan collection kha ka thun a. Headphone vuah chungin huanah ka chhuk thla a. Tlaia ka thut thinna Hmáwng zárah ka thu leh a. Amber-i nèna kan hla, “Love in September” chu ka ngaithla a; tin, chumi tlai ni tlâk thleng chuan ka ngaithla nawn leh thìn a …

-   Kár lehah chhunzawm tùr …