Tùn kár tìrah HSLC Results a chhuak a; pass percentage  70.64% chu nikum lam, 82.43% aiin hniam mah se, zirlaite ai maha nu leh pa, fate results-a làwm zâwk kan awm nuk maithei. Thenawmte fa, First division-a pass aia kan fa, Third division-a rawn pass ‘ve hlauh’ vànga làwm fé zâwk pawh kan awm ka ring tlat! Matric results-in mi a nghawng dàn hi chu a mak ve teh mai a nia!
    
Covid hripui lèn vànga kum hnih chhúng teh meuh mai sikul kal mûmâl theih a nih loh hnu-ah, páwl kua leh páwl sàwm pawh zir mûmal loin Matric an han exam ve tháwr kha a nia. Hlawhtlinna changte an lawmpuiawm takzet zet a; chutih rualin hlawhtlinna la chang lo mi 4,928 laite, beidawng mai loa bei zêl tùrin kan inchah bawk a ni.

Sawi tâk ang khian hripui lèn hnuah kumin atangin sikul hawn tan a ni leh ta a; zirlaiten sikul an kai tan leh ta. Nu leh pate paw’n hri lèn laia kan khawsak dàn thlâkin nun phung pangngaiin kan nung leh tan ta a; fate sikul kal tùr buaipui leh an homework tihpuite a ngai leh tan tawh a nih hi. Inring lo fé fé leh awm dàn thiam lo tak tak kan awm a nih chuan kan fate tán, nu leh pa tha tak kan ni hauh lo ang, tih hi inpawm ngam ang u!
    
Dik tak chuan páwl 10 chin, HSLC exam tùr, an zirlai enpui thei lo nu leh pa hi kan tam viau mai. Chutih rual chuan results chhuah dáwnah kan tang leh chiam thin. Sikul an kal lai, an lehkha zir lai ngei hian kan tan tlàn a ngai takzet zâwk a ni. Kan enpui thiam tawh lo a nih pawhin lehkha an zir that leh that loh te, an homework neih te enpui peih a tûl a; tuition kal an ngaih leh ngaih loh pawh kan hriatpui ve a ngai a ni. 
    
Nu leh pa thenkhat chu mahni fate tan hlur, an thiam lohnaah pawh thiam anga ngai lui tlat an awm fo. An zirna chungchángah pawh, an thatchhiat avàng leh an rilru chak tâwk loh avànga zirtírtute mawhpuh mai chínga thiam loh chantír dèr thin; in lama an zirlai enpui peih chuang miah si loa mi rèl lama mi taima êm êm site pawh an awm. 
    
Hêng hi, kan fa, zirlai ni mékte hmá khaw nun tih chhiatna bul a ni duh khawp.
    
Zirna ngaih sànna cháng hre miah lo nu leh pa; fate zirna atána sum ui tùn zêl; second hand thawmhnaw thin nána ‘pawk’ viau si; engkima an zirtirtute ring bur; in lama tih tùr (homework) leh test tùr an neih ang pawh ngaihtuahpui ngai miah lo pawh an awm. Hetiang ang, fate results chhuah dáwn chauha tang leh chiam thin nu leh pa hi kan ni ve em tih i inen fiah ngam ang u.
    
Zirna tha mai pawh ni lo, zirna hrim hrim ngai sáng ram apiang ram changkãng an ni zêl. Fate zirna atána sum insèn inhuam véng apiang véng changkãng an ni zêl bawk, tih hi kan khua—Aizáwlah pawh thil chiang a ni! Véng pakhatah chuan Mathematics tutor hian tuition pêk tùr a hmu zo ngai lo a; mahse, YMA-in kum puana ‘Zirna Uar’ a puan avànga an YMA Branch hmalâknaa ‘Free Mathematics tuition’ an hawn vêleh zirlai, Mathematics thiam lo tak tak an pung hluai an ti! Hetiang tùr hi nu leh pate hi kan ni lo. Fate zirnaah ngat phei chuan a thlàwn ngawt ûm tùr kan ni lo; kan ríla rahte hi kan hma khua, kan ‘chhungkaw hmabâk’, kan future an ni tih hi ngaihtuah a ngai a; an zirna hi kan ngaihpawimawhpui a ngai takzet a ni.
    
Kan ram, kan hnam zahawmna leh hmasâwna a changkàn theihna tùr chu kan faten thiamna leh finna an neih zahah a awm. Ram leh hnam siam thaa tungdingtu atán kan fate kan duha kan beisei a nih chuan, nu leh pate hian an zirna kan ngaih pawimawh hmasak a ngai ve a nia. Sikul tha leh private sikul-ah te kan luhtír thei lo a nih paw’n, a chak lohna subject te, tanpui a ngaihna lai hriatpuite hi kan tih mâkmawh a ni ve tlat a ni.
    
Kan ram siam tha tùra kan fate ring zo tùr chuan kan ngaihsak an ngai a, kan buaipui an ngai a, an zirna hi kan ngaihpawimawh a ngai takzet a ni, tih hi i hre thar leh ang u.