Dr Ka Zawhna

lung vùng hi engtia inenkawl tur nge ni ang?

Dr. Chawnglungmuana - Sep 27, 2020

lung vùng hi engtia inenkawl tur nge ni ang?

Zawhna: Ka pu, nutling kum 49 mi ka ni a, ka BP ka check-tir a, a lo sâng em em mai a; tin, ka lungte a vùng bawk a, doctor-in damdawi chu min chawhnual a. Eiin chu ka insum khawp mai a, a chhe thei ang ber ka ei a, ei chhiat lutuk hi a pawi viau ang em? Tin, lung vùng hi engtia inenkawl tur nge ni ang? Dam leh thuai theih a ni em?

Chhanna: BP sâng (hypertension) hi a chhan tam tak a awm thei a, chung zingah chuan a common zual chu stress nei ngah (taksa emaw, rilru emaw hah, hnathawh emaw rilru kaptu nei ngahte), taksa rih lutuk (obesity) te, meizial zuk nasat lehzu in nasat vang te hi a ni a. Chutiang avang chuan lifestyle disease an tih zinga common ber pawl a ni. |henkhat chu inthlahchhawnte pawh a ni thei. Lung vùng i tih hi cardiomegaly kan tih hi a nih a rinawm a, hetah hian lung (heart) bang a lo chhah a, a chhung kua (chamber) a lo zau zual bawk thin. BP sang enkawl loh rei vangin a awm duh a; tin, zu in nasate hian an nei duh hle bawk.

BP sân genkawlna atana pawimawh hmasaber chu nunphung thlak danglam (lifestyle changes) a ni a. Chutah chuan kan rawn sawi fo tawh – ei leh in uluk te, taksa sawizawi tam te, zan mut that te, zuk leh hmuam insumte hi a pawimawh zual hle. Zunthlum i neih tel leh tel loh i sawi lang lo va. Engpawhnise, ei in insum kan lo hriat dan hi a fuh tawk lo fo thin. Ei chhiat lutuk hian kan taksa mamawh nutrition kan dawng tawk lo va, chu chuan i harsatna hi a tizual thei zawk a ni. Natna reng rengah chuan kan taksain a lo insiam rem nan leh a lo control theih nan ei in (diet) hi a pawimawh em em mai a ni. I rit lutuk a nih chuan i ei in tihdanglam kawngah a quantity tihtlem te, thlum leh mawm lam insumte leh, thei leh thlai hring ei tam a pawimawh khawp ang. Duhthusamah chuan dietician lo rawn la a tha ber.

I lung vung i sawi hi i BP i control that chuan zawi muangin a rawn ziaawm ve maiin a rinawm a. Chhan dang a awm a nih erawh chuan chumi chu control uluk a pawimawh thei ang. Thyroid lam fel lote hian a tizual duh a, i in-test turah ngai ta ila. Taksa hah lutuk lo tura inven thiam a pawimawh hle ang. Ka sawi nawn leh ang – rilru hah hian a tizual duh a, zân mut harsatte hi a pawi thui thei bawk. Chuvangin, chutiang lakah chuan inven hram hram tum a pawimawh ber a ni. I BP erawh in-monitor uluk thung la, mahni inah BP check-nate neih nachang hria la, BP check hi thil har a ni lo va, i chhungte tu emawber khan zir se, lo in-check fo bawk rawh.

Share now