Chu zàn zet chu Nghâka tán chuan mut a va harsa tehlul êm! Hun rei tak a rilru chhúngrila a duhaisàm lánu dinhmun lo hauh tawhtu Thangpuii nèn chuan zanin mai—nichin lawk khán—hmangaihna biahthu leh rinawmna biahthu an thlung chauh a. Chutih laiin naktûk zíng khuantevîkah Thangpuii chuan Aizâwl lama P.U. zir tùrin MST bus-in an khua chu a chhuahsan leh mai dáwn a ni si a!

Inngaizáwng angin darkâr khat êm pawh an la awm dùn ve hman lo! Han induata han inkuah ve vawng vawng te pawh an la thlâkhlelh ngawih ngawih laia Pu Huama te theihai kûng hnuaia an inkawm kha, inngaizáwng anga an inkawm hmasak berna leh a tàwpna a ni dâwn mai chu a ni si a le!

A tûk zíng khua a lo vár a. MST bus-ah chuan passenger tùrte chu an thu far a; seat chang loa ding pawh an awm teuh. Seat No. 12-na tukverh bula thu Thangpuii chu a hawi ruai ruai a; zawn a nei a ni!

Nghâka zíng tho chu a inperh tho rang teh e! Sana a’n en a; e khai le! Thangpuii te chhuah a hun tawh! Hmai pawh phih loin páwn lamah a virin a vir chhuak mawp a. An tualzáwla pangpár a hmuh remchàn kuang khat chu thliakin hmanhmawh bakléngin a cycle chuan Lamthuamthum lam panin a inkhalh thla nghâl a… 

MST bus din thinnaah chuan bus chu a ding tawh lo! ‘Kei Nghâka hi bus hian min nghâk lo!’ ti chungin a cycle chuan bus chu a ûm ta tawp mai a ni.

Khaw dai thlen dáwnah, a duh ber leh a hmangaih ber Thangpuii chuanna bus chu a va ûmpha hlauh. ‘Thangpuii…’ tiin a au ruai ruai a. Chu chu bus seat no. 12-naa thú Thangpuii tán chuan amah kotu âw chu hriat loh theih a ni lo. A chuanpuite zah pawh dáwn zo loin a thutna atangin a tho a; bus kawngkapui lam chu a va pan a …
~

Chhunzawm a va châkawm êm! He lemziak hi en vang vang la; kan thawnthu sawi aia ril leh ngaihnawm zâwk pawh i hmuh theih ngei ka ring. A lem ziaktu hi tunge a nih ka hre lo a; hriat ka châk ngang mai! A lemziak màwizia hi sawiin a siak lo a; hmànlai nunah min chèn thartír leh a, a hunlai hre pha chinte tán chuan lung hial hial te pawh a ti chhe thei dáwn lek lek alãwm maw le! A ziaktu taimâkna hmuh hmaih a thiang lo a, hun leh thâ a sèn nasat tùrzia pawh a lang reng. 

Mahse ka’n ti hrãm teh ang; a ziaktu (painter)-in min lo hre thiam se la, he lemziak hi en chet chet ta ila, a mawi tehrêng nèn a famkim bîk hauh lo. A dik lohna lai leh a fel lohna lai tàr lan kher aia ka sawi duh zâwka chu, he lemziaka mihring nihna inphùm thûkzia zâwk hi a ni.

Hla leh thawnthu phuahtuten mi fan loh ram fangin—mi thenkhat phei chu kawm pawh kawm hleitheih loh khawpa awmin—an hun leh thâ séngin hla leh thawnthu an phuah chhuak thin. Mahse, an kut chhuakte chuan fel lohna te, dik lohna laite an nei fo. Chutiangin Hollywood lama film siamtute paw’n sum leh pai tam tak séngin, budget sáng tak tak nei movie an han siam chhuak a. A tha ber leh famkim thlap hi vawiin thlenga an la siam chhuah ka la ring lo! A chhan chu a siamtute hi mihring an ni miau a!

Hei tak hi alãwm mihring kan nihna ti famkimtu chu—famkim loa siam leh din kan nihna hi! Chutih ruala ka ngaihtuah zui ziah chu: hringnun màwina hi a ni. Kan famkim lohna kan inhriat thiam tawn thinna te, kan dik loh leh kan fel lohna lai kan inhmuh kãnsak thiam thinna te, fel lo chung chunga kan kut chhuak kan inhlutsak thinna leh kan infak tawn thinnate hi a ni hringnun ti máwitu leh mihring nih ti nuam thintu chu!

Mahse, ti nawn leh hrãm ang, en thuaka mawi, bih chian leh en chet dãwl lo kan ni ve fo bawk. Páwn lam lan dàna vànramah pawh Isua kianga thu àwma mawi, bih chiana Juda Iskariota ang te hi kan awm nual em? Tawngkam leh che vêla a fel ber leh zei ber; chhúngrila tui êk tlat si te; inthlan dáwna ram hmangaih ber niàwm hrima inlár thin, thlan lal hnua mipui rawk chíng leh site hi kan kat nuk lo maw? Showroom atanga pheikhawk cheng sîng chuang man, nalh leh ‘ropui’ tak leia bun thei, a chhúnga mawza rim tuihnai lo zet bun tel kan ang àwm mang e!

Tin, famkim lo kan nihna chhuanlama hmanga hma lam pan tum miah lo hi awm theih a ni bawk. A ngai renga awm mihring chuan hmá sâwn loin a hnung tawlh zâwk thin a ni si a. Kan tlin lohna leh kan chak lohna atanga tling zâwk, fel zâwk nih tum hmasâwn tùr kan ni zâwk e.

Famkima siam ni lo mah ila, keimahnia a mawi ber, kan phâk tâwka a tha ber hi, ni tin ‘kan vawiin tán’ i hlàn thin ang u. Mi dang tlin lohna thlìrsak reng loin an felna leh an mawina lai hmuhsaka infak tawn chíng ila; hringnun tawi tê hi hlim taka hman i tum tláng teh ang u.