Lunglei Municipal Council inthlan hmasa ber chu zawh fel a ni ta a, rin phak bakin ZPM an che tha a, ward awm zawng zawng an la fai vek mai. Eng inthlanah pawh nise, eptu party malin seat awm zawng zawng an lak fai vek na hi a awm mang lo ang. Tun tum LMC inthlan atanga thil lang chiang tak pakhat chu- eng political party mah hian tlinna khawp mi leh sa (member) an nei tak tak lo tih hi a ni. Awn lam nei lo (neutral voter) te’n an bawh lam lam hi an sawrkar mai thin niin a lang.

Mihring mizia a hrang ang bawkin neutral voter te pawh hi an mizia, rilru sukthlek leh politics an thlir dan a in ang lo nuaih mai. Neutral zinga thenkhat chuan thil an chik a, ram tan thil tha an duh tak zet a, hmasawnna duhin an tuihal a, ram hruaitu tha an duh a, ram hruaitu te’n dik lo taka thil an tih chuan an na ngawih ngawih thin. Neutral zingah rau rau pawh heng mite hi an tlem zawk mah mai thei. 

Neutral zinga a tam zawk chuan chuti takin thil an chik lo. Ram hruaitu tha an duh a, hmasawnna pawh an duh. Chutih rualin heng mite hi luang thli chhem nghin ang deuh an ni a, a thli bengna lam lamah an thle sam khawp mai. An thlekna lamah an thle tlang dual dual a, an bawh lam a in ang deuh thup thup a, an bawh lam lam chuan hnehna an chang mai thin. Nghafuan ven ang deuh hi an ni a, political party zingah heng neutral bupui rut fuh apiang, an fuan lai nang fuh apiang hi an dingchang mai thin. Party ruh kawl kan tih te aiin heng mite hi sawrkarna siamtu, ‘king maker’ tak tak te an ni zawk. 

Heng neutral bupui te hi hmeichhe rual awmkhawm ang deuh an ni a, hmeichhe awmkhawm pawh hian a tirah chuan eng eng emaw sawi mahse a tawpah tu emaw an rel leh nge nge thin an ti. An zinga pakhatin ngei deuh a neih chuan an in ngei pui liam liam a, an in ngei hmuh a, ar chuk tui loin an chhuah leh mai thin a ni. Neutral bubit karah sawrkar lai ninna thilpui (anti-incumbency wave) a luh fuh tawh chuan a sawp chu na tak a ni thin. Eng anga MLA ngah leh sawrkarna ngheta inngai pawh ni se, mawng sawh dawpin an tla thum tawk mai thin. Chuvangin, Mizoramah chuan neutral bubitin an nin rawn, an ei loh rawn, an rel rawn nih hi eng party tan pawh thil hlauhawm tak a ni.

Inthlang ram kan ni a, mipui nawlpui hian tun aia kan pawimawhna leh kan hlutna hi kan hriat thar leh a tul khawp mai. Kan kutzingchal kan phut zeuh hian tu emaw chu rorelna lal thuthlengah kan thut tir thei a, chutiang bawkin kan kut hmang hian tu emaw chu rorelna lal thuthleng ata kan hnuk thla tawp thei bawk. Chutiang taka pawimawh, lal siam tu (king maker) chu ni mah ila mipui hian kan pawimawhna hi kan hre tawk lo fo thin. Kan thlan lal te hian thil tha tih hmanga min tih lawm an tum hle tur a nih laiin keimahni zawk hian kan tlawn a, an bawihah kan intulut titih hial mai.

Ram hruaitute laka beiseina dik min neih tir thei lotu leh huaisenna thuam min bel tir thei lotu chu kan mimal tanghma haina rilru hi a ni fo thin. A dik chauh chuan politics-a kan inhman chhan te, eng party ah emaw langsar taka kan tel chhan te, langsar taka kan inlawmluh tir chhan te hi eng dang vang ni lo vin, mahni hma kan sial vang a ni. Langsar taka kan belh party chu an sawrkar hlauh chuan contract hna ka hmu mial mahna, kan fapa hi police ah ka thun thei mial mahna, kan fanu hian sawrkar hna a hmu mial mahna tih rilru pu hi kan tam khawp mai. Keini chhungkua hian mimal angin sawrkar hi hlawkpui lo mah ila, kan ramin hma a sawn a, kan kawngpui te a that a, ei leh barah kan intodelh a, kut hnathawktu te’n an thawhrim rah an hmuh a, kan ram kan intodelh phawt chuan chu tluka hlu a awm lo e, tih rilru hi pu theuh ila tun ai chuan hma kan sawn zawk ngei ang le. 

Mipui hian ram hruaitu tha kan tehna a san a, MLA tha kan tehna a changkan phawt chuan ram hruaitu tha kan nei ang a, MLA tha leh changkang tak kan nei mai ang. Assembly session ah hian kan bial aiawha kan thlan kan MLA hian thu awmze nei a sawi thin em? Thahnem a ngai em? Ram leh hnam hmasawnna turin ngaihtuahna a seng tak zet em? Mi inzir peih mi a ni em? Private member’s bill a ni emaw budget sawihonaah hian a subject/issue a luh chilh pha em? Nge, a behbawmah a thamral vel mai mai zawk? A term chhungin a bial tan leh zoram mipui tan hriat reng tur thil tha (legacy) a hnutchhiah em? Hetiang hian kan MLA te hi kan teh zawk tur a ni dawn lawm ni?

Hman deuh khan kan thianpa pakhat chuan thingtlang lama party pakhat unit hruaitute a mikhual a, chung unit hruaitute chuan zing karah an bialtu MLA chu an hmu a, an lo hawn leh chuan kan thianpa chuan, “MLA chuan a lo dawngsawng tha che u em?” tiin a lo zawt a. Anni chuan, “Min lo dawngsawng tha khawp mai. Mahse, lawm lohna pakhat kan nei, chaw eiah min ko lo” an ti a. Chutah kan thianpa chuan, “Ngawi teh u, in bialah hian unit 30 chuang a awm a, chumi chungah chuan block hruaitute an la awm leh a, unit hruaitu zawng zawng leh block hruaitu lo kal apiangin MLA inah chaw ei in tum a, in ei loha in lungawi loh bawk si chuan MLA tan pawh a va luhai thlak duh awm ve maw le. Bial mipui tan chumi khami chu min tih sak lo tih pawh ni hlei lo, chaw eiah min sawm lo tih mai mai chu vuivaina chi pawh a nih loh chu” a lo ti a, a ti awm viau a ni. 

Thufingin, ‘Mipuiin an phu tawk hruaitu an nei’ a ti a, mipui nawlpui hi kan rilru a changkan chuan hruaitu tha leh changkang kan nei ang a, kan rilru a hniam chuan kan phu tawk pawh an hniam mai dawn a ni.