Dr Ka Zawhna

Nau vawihnih chhiat tawh, chhul ziah tawh, thla 5 indang tawh?

Dr. Chawnglungmuana - Oct 18, 2022

Kum 25 mi ka ni a, vawihnih nau ka chhiat tawh a, ka chhul min ziah sak ve ve a. Doctor in thla 2 indang turin min ti a, thla 5 ka indang tawh a, pai leh tawh ila chhul tan leh keima tan a la pawi thei em? Tin, rai ta ila, rai tih inhre lo a indanna ei reng hi a pawi thei em?

Zawhna: Ka pu, kum 25 mi ka ni a, vawihnih nau ka chhiat tawh a, ka chhul min ziah sak ve ve a. Doctor in thla 2 indang turin min ti a, thla 5 ka indang tawh a, pai leh tawh ila chhul tan leh keima tan a la pawi thei em? Tin, rai ta ila, rai tih inhre lo a indanna ei reng hi a pawi thei em?

Chhanna: I kum ngaihtuah chuan nau la pai thei tur chu i ni ngei mai a. I nau chhiat (abortion) te chu i pai atanga a engtik thla ah nge i chhiat i sawi lang lova. Medical history hi damlo enkawl kawngah a pawimawh khawp mai a, zawhna kan nei anih pawhin chipchiar thei ang berin mahni insawiselna chungchang hi rawn zawt thin ula, thurawn pawh kan inpe tha thei zawk ngei ang.

Nau i chhiat chhan hi hriat a pawimawh khawp mai a. Naupai hun chhung hi thla thum bi zelin then hran a ni a, 1st, 2nd leh 3rd Trimester tiin kan sawi thin. 1st trimester za a sawmsarih (70%) chuang dawn hi Chromosomal Anomalies vangin a awm thin a. Chumi awmzia chu chi inmil lo ti te pawhin kan sawi thin a, mipa leh hmeichhe chi inmil fuh lo vanga awm thin a ni ber. 2nd Trimester abortion ah pawh hian 20% lai mai chu chromosomal anomalies vang hian a awm bawk a ni. Nau chu a rawn insiam ngei a, mahse fel lo engemaw vangin a rawn puitling thei lova, nu lama fel lohna awm hran si lovin a rawn chhiat ta mai thin a ni.

A dang leh ah chuan infection - hrik engemaw berin chhul leh chi kawng, chi bawm te a khawih buai hian nau chhiat a awm duh bawk. TB hi a chhan common tak zinga mi a ni a, chu bakah chuan sex hman atanga inkai theih natna te hian a thlen fo bawk. A then chuan chi kawng ping te a siam a, chhul chhung bang insiam fel thei lo te, chi bawm vung avanga chi chhuak tha thei lo te a thlen fo bawk.

Nu in natna engemaw a neih vangin nau chhiat a awm fo bawk. Chung zingah chuan zunthlum (diabetes), thyroid fel lo, hmeichhe hormones lam fel lohna te, immune disease an tih mai (SLE ang te hi), nu chhul dik lo engemaw vang te in nau chhiat hi a awm thei bawk. A thenah chuan naupai invenna Oral Contraceptive Pills (OCP) ei nasat vang te in a awm ve thei bawk. Nau vawi 2/3 lo chhiat tawh te hi an chhiat nawn duh lehzual a, nang pawhin vawi 2 lai i chhiat tawh avang hian i fimkhur deuh chu a ngai dawn a ni.

Nau chhiat atanga thla ruk chhunga pai leh theih hi a duhawm viau, a rei loh poh leh nau pai leh theihna chance a sang tihna a ni thin. Chutih rual erawh chuan a chunga kan sawi angin nau chhiat chance kha nangmah ah chuan a sang tawh tho tho tihna a ni thung. Invenna ei chunga nau lo pai hi an ve zeuh zeuh; a chhan pawh oral pills te hi 100% a veng thei an awm loh vang a ni. Naupai tih inhre lova heng damdawi lo la ei te (damdawi dang, a bikin antibiotic thenkhat nau khawih chhe thei lo ei te pawh a huam tho awm e) hi hmeichhe doctor in uluk taka assessment an tih a tul thin.    

A pawimawh hmasa ah chuan i dinhmun hriat chian hi a ni. I nau chhiat chhan ah chuan chhul emaw chibawm lam fel lohna i nei nge nei lo hriat a pawimawh a, chumi atan chuan Ultrasound lo ti thei la, chuan blood sugar leh thyroid function test ti tel bawk la. A result ah fel lo a awm chuan Hmeichhe Doctor pan vat kha a tha ber ang. I kum a la naupan vangin pangngai takin i pai in i la nei leh thei turah ngai ang. I hriat loh a nau i lo pai anih a, invenna i ei reng bawk chuan a fel lo thei a. Nau i pai leh theih mai chu a rinawm a, mahse i fimkhur zual tawh dawn nia.

Share now