Kamchhuak

NAWMSAKNA- MALSAWMNA NGE ANCHHIA

K. Lalrinchhana - Jun 15, 2022

Bible-a fapa tlanbo kha enga ti nge a pa in ata a tlan bo a, khaw lam hla takah khan mahni nun ti chhe khawpa nuam a tawl a? Apa hausak zia te, a ba hre ve kar ang a, a thawh chhuah tel loa a pain a puala sum tam tak a lo dah ta mai chuan a rilru a ti piangsual zo ta pawh a ni mai thei. Retheihna hian rualawhna min neih tir a, chu rualawhna chuan rualelna min neih tir a, chu rualelna rilru chuan theihtawp chhuah turin min nawr kal a, mi vangtlang pawh pha mang lo tur kha mi vangtlangah min siam a, mi thenkhat phei chu vantlang chung lam daihah an in vawrh thin.

Bible-a fapa tlanbo kha enga ti nge a pa in ata a tlan bo a, khaw lam hla takah khan mahni nun ti chhe khawpa nuam a tawl tak ziai ziai mai le? Apa hausak zia te, a sum ngah zia te, a hlawhfa chhawr hnem theih zia te, a chanpual tura a sum dah tam zia te kha a hre ve kar ang a, a thawh chhuah tel loa a pain a puala sum tam tak a lo dah ta mai chuan a rilru a ti piangsual zo ta pawh a ni mai thei.

    Nawmsak lutuk te, awm awl lutuk te, tih tur leh mawhphurhna neih loh lutuk te hi mihring te hian kan zo lo duh khawp mai. Mi hman lutuk leh awm awl apiang te hian sual lam kawng pawh an awn sam nge nge bawk. Kan ramah ruihhlo a hluar em em a, kuminah ringawt pawh Excise and Narcotics Department-in Heroin an man belhkhawm chu kg 20 dawn a tling tawh a ni. Heti zat ruihhlo an man chuan an man loh hi a letin a tam ang tih a rin theih. 

    Engvangin nge kan ramah heti taka ruihhlo a hluar tak mai le? Thalai awm awl, fapa tlangbo anga chhungkuaa thawhchhuah (contribution) nei lo, chhungte thawhchhuah ringa khawsa mai mai, chhungkaw tana hnemhnanna leh tangkaina pawh nei chuang lo, tangkai pawh tum chuan lo, drugs ti hman em em, ruihhlo bak thil dang ngaihtuah tur nei lo kan tam vang a ni mai. Mizo thalaite hi mahni phak tawk theuhah hna tangkai thawkin bung suau suau ila, tun ang tak hian ruihhloin min luh chhuah lo mai thei. Mahse, chhungte thawh chhuah ringa thle mai mai, rui hman em em, ruihna tur bak thil dang ngaihtuah tur nei lo thalai kan tam viau chuan drugs te chu a hluar mai nak loah. Demand a awm chhung chuan supply chu awm reng tur a ni.

    Sawi leh sawi hnu, kan rama heti taka ruihhlo, a bikin heroin a hluar ta mai hi mi pangngai tan chuan mutmawh hnarmawha neih tham a ni. Aizawla Assam Rifle hotupa, Brig. Digvijay Singh-a’n tun hnai khan, “Mizoram chu mihring cheng zat ngaihtuahin ruihhlo ngai an tam a, hei hi ngaihtuah tham tak a ni. Ruihhlo donaah hian nasa taka hma lak a ngai a ni” tiin a lo sawi tawh a, hei hi hnam dang te min hmuh dan a ni a, a zahthlakin a pawi hle a ni. Tun hnaiah fa nei tam turin kan in zirtir nasa a; Hetih rual hian kan rama chhungkaw nun tlabal kan tam zia te, fahrah tam zia leh fahrah chawmna in kan neih tam zia te ngaihtuah chuan lo inhring pung tam ta teh reng pawh ni ila, ruihhloa inhnamhnawih tur kan in hring pung tam mai mai a ni. Ruihhlo hian mimal nun a ti chhia a, chhungkaw nun a ngawng a, ram leh khawtlang ralmuanna thlengin a derthawn phah thin. Ruihhlo hluarna veng leh khua chu nunau tan a ralti a, naupang than len nan a iai awm a, veng nuam tak a ni ngai lo. Tun anga kan ramah ruihhlo a hluar chhoh zel chuan mizo thalai, a bikin mipa laktlak loh, pasala atan pawha iai awm tak kan pung zel ang a, kan ram hmabak chu a thim viau ang.  

    Tunlai thangthar te hi kan vannei a, kawng tinrengah kan nuam sa ta khawp mai. Kan nawmsakna hi kan chhiat pui mah zawk a ni. Retheihna avanga nih tur ang ni zo la aiin nawmsak tuar lo, nawmsakna avanga nih tur ang ni zo lo hi an tam tawh zawk mai thei. Fate rual awh hlauin nu leh pain hna an thawk a, an mamawh engkim an ngaihtuah sak a, retheihna awmzia hre mang loa broiler ar chawm taka kan chawm kan fate hian an that pui nge an chhiat pui zawk? Harsatna te hi tawk ve rap rap se, an rilru te hi hah ve se, an duh apiang hi awlsam takin an nei thei bik lo a ni tih te hi hria se, a chang chuan rual awt ve se, sum hlut zia leh thawh chhuah har zia te hre ve se, chu chuan a siam puitling zawk ang em? Mahse, fate rualawh te, an retheih te, an rilru hah te hi nu leh pa te hlauh ber a ni lawi si. Rual awt hmanin kan siam meuh lo a ni.

    Kan thianpa pakhat chu an nupaa sawrkar hna thawk an ni a, fapa pakhat chauh an nei a, a changin awmpui pahnih te an nei thin a. An fapa chu an chawm hnehin an enkawl hneh viau mai. Tum khat chu fiamthu titakin, “I fapa hi in chawm hneh nasa mai si a, a duh apiang i lei sak a, a tet lai atanga branded thawmhnaw hlira i thuam mai chuan a tleirawl hunah a standard a sang viau mai thei a nia” ka ti a, kan thianpa chu a ngawi vung vung a, “Ani khawp mai, harsatna hi a hre lo lutuk ang tih a hlauhawm khawp mai. Tun atanga fimkhur a ngai a ni” a ti roh a.
    Ram buai lai khan mizo tlangval pakhat chu vai rama lehkha zir a tum a, SDO (Sadar) office ah vai ram kal phalna pass la turin a thawk chhuak a, SDO chu a lo awm lo a, a nghak ta ngat ngat a. Chawhnu lamah SDO chu a lo kal chuah a, chu tlangval chuan a mamawh chu inthlahrung takin a han sawi dek dek a, SDO chuan, “I thil aia pawimawh zawk hna a tam em mai” a ti ta mai a, chu tlangval chu a lawm lo khawp mai a, a rilru pawh a na ang reng viau a ni. Mahse, chutiang chhanna dengkhawng chuan a ti paukhauh sauh a, a rilruin engtikah emaw chuan SDO thuthlengah hian ka la thu ve chek ang a ti a. A hnuah IAS ah a in ziak tling a, SDO (Sadar) thuthlengah chuan a thu ta mai reng a ni.

    Retheihna hian rualawhna min neih tir a, chu rualawhna chuan rualelna min neih tir a, chu rualelna rilru chuan theihtawp chhuah turin min nawr kal a, mi vangtlang pawh pha mang lo tur kha mi vangtlangah min siam a, mi thenkhat phei chu vantlang chung lam daihah an in vawrh thin. Chutih rualin, naupan tet atanga nuamsa lutuk, retheihna awmzia hre lo khawpa nu leh pa te’n an duat, an mamawh apiang hnianghnar taka an ngaihtuah sak zung zung te hi an sawngnawi duh phian bawk.

Share now