Tûnlai chu Eric tluk tluk mai ang aw. Kár hmasa hmasa leh khán a thianpa ber, George Harrison nèna hmeichhe pakhat, a hming Pattie Boyd nèn an inkár thu kan ziak tawh a; kár kalta mai khán a fapa Conner Clapton nèn an thu—“Tears in Heaven” pian dàn kan ziak tawh a. Kan tàwp thut bawk a. Engtin nge guitar guru Eric Clapton kha a awm tâk zêl tih lam pawh chhui hman loin kan rêk bung ta tawp mai a nih kha. Eric Clapton-a’n “nun duhawm lo” a hman chhohzia leh, ruihhlo bawiha a tàn tâk dànte hi sawi chhunzawm a châkawm a. Chu ai maha ngaihnawm zâwk, tûn tuma kan chhiar tùra chu—mi tam takin an tàn hlenpui leh an boralpui, he ruihhlo bawih atang a tàl chhuah dàn hi a ni. Chawhmaa Voda úm khat quit thak thìn a nihzia te, chhùn leh zàn pawh thliar hrang thei lo khawpa a “hai” ve tho dànte hi hre ve ila … engtin nge a nghei tih dànte pawh.

Pattie Boyd hnuah
Khatia a thianpa, George Harrison-a nupui hlui, Pattie Boyd nèna kum 1979-a an inneih hnu khân Clapton leh Boyt te hi an hlim ve angreng fu—rih ina—an la innei tìr bawk a; tin nuam an ti bawk ang—hlim dun kha! Anni hrim hrim kha, Boyd-i pawh, a nuthlawi hma atang tawh rënga lo “Ck” dùn sa kha an ni hrim a. Mahse, an han inawm rei a; an inkára “khì” kha a kak zau ta tlat a—a kak thûk zêl a, “neuh neuh masala” khân a chawm tha bawk a ni ang —kum 1987-ah Boyd hian Eric Clapton chu chhuahsanin kum hnih hnu, 1989-ah sum a chhuah ta a, an inthen ta a nih kha!

Chanchinbu mi thenkhatin an kawmnaa a sawi dàn chuan, Pattie hian, a pasal hnuhnung zâwk Eric Clapton khawsakpui chu, “meidîl tem lâwk ang” a nih thu a sawi mauh mai! 

Fa duh—nei si lo!
A bul bera Pattie Boyd sawi dàn chuan fa neih thu-ah an buai a ni. George Harrison-a laka fa pawh pawm thei lo khân Eric Clapton-a lakah pawh a pawm chuang lo a nih kha. Eric nèn mai ni loin, an pa hmasa nèn paw’n, fa nei tùra theihtâwp chhuaha hma an lâk dun ve tauh tauh chu a rinawm a—“inti thiam lo” an ni ngawt dáwn si lo a! Mahse, nau a pai thei tlat si lo!

Eric Clapton phei chuan an nu laka fa neih ngei ngei chu a duhthusàm a ni (a thahnem ngaihna ber pawh a ni ang!). Mahse, Pattie chuan a pai thei tlat si lo! Daktawr eng emaw zât pawh a hmu. Fa neih kawngah harsatna a nei tlat si a. ‘Eric hian fa min chàwipui a duh tak zet a. Ka pai thei si lo! Tum eng emaw zât chu IVF (In Vitro Fertilization, inkah raitír) an ti a, awmzia a awm si lo! Boyd zâwk chuan fa lâk (adopt) mai a duh a; mahse, Eric chuan a duh ve dèr si lo a!

Chu vàng chu a ni pakhat ang, Eric chuan nula dang a chhaisan ta fo mai. Tour a neih laiin a chíng zual. An nu laka a tlat fàl chángin a “lêrhness” a sáng thìn a nih ber chu! 

Pattie kha thinrim lo chi a ni hleinëm!
Fa pahnih nei Eric-a laka Pattie vuina pawh hi a àwm viau. Mi dang lakah fa a lo nei hmanhmawh a! Chu chu Ruth Clapton-Bartlett a ni. An inneih lai ngatin maw le! Tú nu nge sa phat lo ang. Ruth-i hi January 1985-ah a piang a; a nu chu Clapton-a chhas Yvonne Kelly a ni. Chutah, Ruth-i nu hi Eric-a luh luhna AIR Studios, Montserrat-a studio manager a ni zui. Ruth-i a neih thu hi a nu hian a zêp tlat a—kum 1990 chhoah a pa a hre chiah maw le! 

Chutah Lory Del Santo lakah fapa a nei leh. Connor Clapton kan tih, March 20, 1991-a New York building chhäwng atanga tla hlum ta—“Tears in Heaaven” a phuah chhan kha. Ná a ti ngang mai, Patiie paw’n, “ ‘Tliak hmawk ang ka ni e,’ a ti, a ti.”

Pattie sawi dàn hi ngaithla te’ng: ‘A fa pahnihna a neih khán min hrilh a. An nu naupai lai khân min hrilh tawh. “Hawh teh, i tang dùn teh ang, eng emaw kan thawh dun a ngai,” min rawn ti a. Kei chuan, kan pahnih chuan eng mah kan thawk dáwn lo tih ka hria.  Chuta tang chuan namén loin zu a in tan. A tawngkam a na si a. Na tak tak hian min rawn tawng khum thìn. Damdawi lamah a buai tel bawk—zú a in bawk. Addiction centre kal a hreh lo; mahse, a chhuah hlima zu inah a tlâk leh zêl! Hei hi min zawh chuan, “Tu nge hmangaih ber che,” tih hi. Ka chhànna chu, ka kianga awm reng thìn George Harrison ka ti ang,’ a ti. Nam reng bula zan riah hi hmeichhia hian an châk viau lo—nupui pawh an nei tlo duh lo!

Eric Clapton-a’n a sawi ve dàn maw? ‘Pattie Boyd kha ka hmangaih ka hre lo! A chhan chu, khatih lai khân ruih reng ka ning a. Rui lo hai loa awm kha ka tum si; mahse, min bawih tlat tawh si a,’ a ti ve thung.

Eric Clapton—ruihhlo addict 
Eric Clapton hian 70’s chho khán Eric hian heroin leh zú-a a sum hman zât chu, kár khatah  $16,000 chuang a ni! Nasa tak a ni. Tûnlai pawisaah India pawisain han chhût ila, a tam namén lo. A chhan chhui teh ang.

A nu hi pasal nei loa amah pawm tlei a ni a. A nu’n a pi leh pute hnên a dah tawp a, a pa pawh a hre lo! A rilru ngaihtuahnaah chuan, ‘Tu nge ka chhúngte hi ni ve ang le?’ tih mawlh a riak. Sikulah pawh inkiltawihna nei, mi zakzum a ni. Kum kua a nihin a nu a rawn hâw, ‘Pawm dàn ka zir chawp,’ a ti.

‘Radio atangin blues music ka ngaithla a. Mi hàng leh mi rethei music a ni. Anni ang hi ka ni ve-in ka inhre tlat a. Ka ngaihthlâk khán “fantasy” niin ka inhria,’ a ti a. Kum 13 mi a nihin a piin tingtang a leisak a; music chu a nuna lo bet tlat a lo ni tih a inhre chhuak a, tingtang perh lam a tuipui ta hle a ni. 

A’n inin a’n ti tak mai chu, Eric-a chu, intih hlumte pawh a ngaihtuah ve hman hial alâwm! Tin, a’n làr chhuak kha “Làr zo lo” kan tih ang deuh mi a ni. 60’s-ah Cream band an din a. An lär ta hle mai. Mi thenkhat chuan, “Guitar god” te pawh an ti hial. Mipui ngaihven duh hle a, a ning zêl mai si a, a hahthlâk tak zet!

A nghei dàn
‘Ka fapa, Lory Del Santo nèna kan fapa kha, ka fapa neih chhun a ni a. Ka läwm hle. Mahse, a nu nèn khán kan kár a buai ta tlat a, ka fapa pawh kawl loin ka awm. A pian pawh khán zú chu ka la in. Ka ngaihtuah ber chu: “He ka fapa hi ka hmangaih a, heti renga awm chi hi ka ni lo, treatment lâk ka ngai tlat. Ka fapa hian min hmu vek a, ka tih mék pawh hi a hmu reng. Hetianga hi ka tih loh a ngai” tih a ni. Ka fapa khân min tur a ni ber. 

A ti zêl a, ‘Thil awlai chu a ni hauh lo! Ka thil sawi zawng zawng hi thlí-a chhèm lèn ang vêl niin ka hria. Kum 20 chhúng ka lo chìn tawh han thlah zet chu maw, hrehawm ve tak chu a ni!’ tiin.

Kum 1993 khán a “Tears in Heaven” chuan Grammy awards paruk lai a la a. An kawmnaah he zawhna hi an zâwt: ‘He hla, i fapa puala i phuah sak leh hi, i tán a na leh thìn em? I lung a kuai leh tìn lo maw?’ tiin. Chuta a chhànna chu, ‘Rimawi hi min hring lehtu a ni a, ná ka ti hran lo. Thinlung taka zai hi, ka duh dàn ber a nih vàngin,’ tiin a chháng. Clapton-a thu sawi ka duh deuh bawk chu, ‘Thla lâk te hi ka ngaina lo, chanchin bu miin min kawm ang te pawh. Ka duh chu music play mai hi a ni,’ tih hi.

Tûnah chuan, drug leh zu ngawlvei enkawlna Antigua & Barbuda ah a din a, dollar maktaduai sarih chuang a séng. Hei kum 25 chu a vei ta—an bul tanna kha. A sawi dàn chuan, ‘Ka awm anga awmte tán kawng hawn ve ka duh a ni, mi dang tanpui hi ka tih ve tùrah ka ngai,’ a ti tawh a—ni khata zu úm pahnih mamawh thìn khân!