A pian leh mûrna

K.C. Runremsangi hi March ni 1 khan Keitum khua ah Pu Lalawia (L) leh Pi Lalengii (L) te inkarah a lo piang a. A pa Pu Lalawia hi ram vachal sa la thei tak a ni a, thian sabeng pawh pahnih-pathum nei reng reng thin a a ni a. Chûng hunlai chuan an sa kah Lû te chu chhum in an thenrual tha te nen Salu lawm a zai leh lam in hun hlimawm tak an hmang thin a. Chûng salu lawmna a an zai- ‘Pipu zai’ a Thanglunghnemi zai chu a hla hriat hmasak ber te zing ami alo ni tawh thin a ni. Hetih lai hian Masangi hi kum 5 mi chauh a ni a, chutiang hunlai atanga Mizo Folk songs lama chi lo in tuh tawh a ni. An Unau achhehchhawl an tih ang, mi lâi Unau 8 zinga upa lam atanga chhiara 5 na a ni bawk.

A seilen chhoh dân

A têt te atanging sakhaw ngaihsak mi a ni a, KTP ah pawh a over thlenga OB nihna chelh a ni a, a dam a a zin chhuak te a nih loh chuan inkhawm a thulh ngailo. Solfa lamah pawh midang zirtir thei khawpa hriatna nei a ni a, vêng danga kohhran thil nilo a a zai thin chuan UPC emaw an lo ti fo mai. Hei hi solfa lam hla aia modern folk lama a tui thin em vang zawk a ni mahna. Tunah hian an vêng MHIP President hna a chelh mêk bawk a ni.

Sikul kal leh lehkha zir leh hmeichhe naupang tih thin bâk chu a hunâwl ah chuan Mizo hla hrang hrang te chuan a rilru a luah hneh hlê thin a, sap hla erawh chuana rilru ah hmun an chang thei ngailo. A têt tê atanga a zâi ri lo hriat hmasak Mizo Pipu zai erawh chuan a lairil a fan hneh zual em em thin. Sap hla (Western songs) leh a kaihhnawih Mizo hla te ai chuan Mizo folk atanga hla lo irh chhuak (Modern folk songs) te chu a lung thlûkna a ni chho ta zel bawk a ni. An tleirawl chhuah atang chuan a zaithiamna leh Mizo tak maia a zai chuan a hunlaia Zoram vantlâng hriat a hlawh tawh hle a. Amah hi ze nghet tak nei, nun tha leh mi zawiawi tak, inngaitlâwm mi a ni a mahse a ngaihdan pêl a nih tawh erawh chuan mitawhkhirh ber te zing ami a ni lawi si , in tih veia lâr tumna rilru pu ngailo mi a ni bawk.

Pipu Zâi bu pui a luhchilh dan leh Folk song awmzia

Hetianga Pipu zaia YMA mic ringawt pawha mi thinlung sâwrtui thei khawpa zaithiam ta nana na chu Art & Culture Deptt. ah Mizo zâi leh lâm hnamze zirtirtu atan kum 1992 ah sengluh a ni a. He hnâ a vawn hnu kum 2003 June ni 6 khan a lung dumtu Lalthanmawia nen innei in fanu duhawm tak Lalsanpuii an nei a, an chhûngkua hian Bawngkawn South ah chhungkaw hlim tak niin an khawsa mek a ni. Mizo Pipu zai hi zaithiam nazawng ina sak thiam theih a ni ngawt lo a, kan Folk song hi Mizo ten Western Music Scale; Do-Re-Mi kan hmelhriat hmâ atang tawha zai dan bik riau kan lo neih anga zai thei a nihna hi zâithiam rau rau ah Masangi danglam bikna a ni awm e. Folk song sa dang te hi chuan kan pipu te zai lo neih kha Western Music scale angin an sa ve ta mai thin a, hei hian Mizo Folk Song a nihna sedai anthiat a ni ber… A & C Dept. ah hian Mizo zâi leh lâm te a zirtir a. Tin, Mizoram State hmingin India Statetam takah zâi leh lâm entirtu te enkawltu leh zirtirtu ah te tangin Mizo Folk hla sa in Mizo zai chu India ram zau ah hian a theh darhtu bulpui ber a ni thin a. Tin, sawi hmaih hauh loh tur chu mi nazawng te tlawhpawh theih loh North Korea khawpui Pyongyang ah India pum aiawhin Mizo Pipu Zâi leh Lâm entirtute kaihruai tu ah tangin kum 5 mi a niha apa salu lawmna a an sak thin, a rilru luahtu hmasa ber “Thanglunghnemi zai” ngei kha a han sa a ni.

Chawimawina sang hi a phu rêng em?

Hêng Mizo hnamzia phochhuak a hnam zâi te sa a, India leh rampâwn te a India ram hnam hrang hrang te ropuina pho chhuaktu a nihna chu Sangeet Natak Akademi- New Delhi chuan ram pum huap chawimawina sang “Sangeet Natak Academi Award 2017” ah India ram President-in K.C. Runremsangi chu New Delhi ah ropui takin a lo hlan tawh a. Chumi hnu kum 5 ah India Civil mi te tana chawimawina sâng ber te zing ami “Padma Shree” dawng thei turin Sangeet Natak Akademi te vêk chuan Pi K.C. Runremsangi hi a lo recommend lehna chu hlawhtlingin naktuk mai April ni 5 zan dar 6:00 p.m. hian India President-in Padma Shree nihna chu a lo hlan leh dawn ta a ni. Zofa ah chuan Padma Shree dawng naupang ber a lo ni dawn ta ni!

Mizo te tan Padma Shree dang neih a beisei awm em?

India rama state pakhat a cheng Mizo te hi India khua leh tui kan nih tlat avangin kan Mizo hnam ze hrang hrang te chu India hnamze pakhat a ni tlat a, chuvanga Mizo Folk song a kan mi thiam hi India ram chawimawina sang dawng thei a ni… Western songs lama kan mi thiam te hi India Govt. chawimawina huangah an tel thiang ve lo, ram dang culture kha a ni tlat a. Tin, Padma Shree dawng thei hi heng Social work huang; Arts kawng hrang hrang, Science & Education, Trade & Industry te, Medicine etc. a mi thawhhlawk tak tak te tan dilpui theih an ni a, heng huang thenkhat ah te hi chuan Zofa thenkhat dilsak tur heng kawng hrang hrang ah hian an awm nualin a lang a, a concerned Dept. te emaw hian tiang in dil sak leh ram pum huap a theh chhuah lamah hian hma kan lak deuh chu a ngaiin a lang.