Thingtlang atanga khawpuia inentir leh inenkawl hautakzia te, chumi hriat avanga damlo tam takin khawpui an pan ngam loh dan te, natna thenkhat enkawl hma chuan dam mai thei; mahse, tlai vanga enkawl dam hleih theih tak lohte ka hmu ve fo thin. Kan rama kan enkawl theih loh vanga phai pan ngaite phei chu mi tam tak lu tihaitu a ni fo thin. Tawng thiam loh te, inenkawl dan phung hriatthiam loh vang te, awmna leh ei leh in, zinna senso tam tak te avanga rilru hah ka tawng ve fo mai bawk. Rilru a tihrehawm duh viau mai.

India ram hi medical science thiamna lamah hma kan sawn nasa hle mai a, inenkawl man a tlawm zawk avangin foreign ram changkang zawk atanga pantu te pawh an thahnem hle a, medical tourism ti zawnga an sawi mai lamah hian India ram hi a thang nasa hle a ni. Chutiang bawk chuan kan ram ngeiah pawh medical science thiamna lamah hma kan sawn nasa khawp mai a, tun hmaa kan tih theih loh vanga phai kan panpui natna tam tak hi kan ram ngeiah kan doctor thiam tak tak ten an enkawl dam thei tawh a. Medical College ZMC kan neih hnu hian damlo enkawl kawngah pawh hma kan sawn chho zel niin a lang. Medical Science hi thang reng a ni a, damlo enkawltu doctor-te pawh kan in-update reng a tul. 

Chutiang avang chuan Mizorama medical doctor zawng zawng (deuhthaw) awmna Indian Medical Association (IMA), Mizoram State Branch pawh hian medical science lama kan hmasawn theih nan seminar leh workshop-te kan buatsaih fo thin a, hospital lianho pawhin chutiang chuan zirhona an buatsaih fo bawk a ni. Private hospital a rawn thang chhote hi a lawmawm khawp mai a, Mizorama damdawi in khum awm zawng zawng chanve aia tam mah hi private sector a awm a ni lehnghal a, an than zel hi a pawimawh hle.

Damlo inenkawlna atan kan ramah health care scheme tha tak kan nei a, BPL chhungkaw tan RSBY a awm thin bawk a. HCS atan hian Premium tam lo tak pekin chhungkaw damloh inenkawlna senso tam tak a phuhruk thei a, RSBY te phei chu chhungkaw khawsak harsa te tan a tangkai em em a ni. Chuti chung chung chuan a kalphung fel tawk loh vang te pawh a ni anga, sorkarin private hospital-ah leiba a neih phah nasa a, damlo tan harsatna a thlen fo thin a ni. India sorkar laipui scheme Ayushman Bharat-Pradhan Mantri Jan Arogya Yojana (AB-PMJAY) hi erawh a kalphung a kual nasa deuh a, eng ang takin nge kan hman tangkai hriatthiam a har hle. 

Kan state hmalakna bik health care scheme hi changtlung zawka kan siam a tul hle. Tun Covid hri lengah pawh hian tam takin an chhawr niin a lang. A enkawltu lam hian tun aia nasa hian promote thei se, a hmang tangkaitute kaltlangin a chhawrtu tan a manhla zia te min hrilh hre thar se, mipui lam pawhin in-register kan phur phah zual ngei ang. Premium pek turah pawh category siam tam se, sum a luh that chuan a chhawrtu tur chu mipui tho kan ni a, mi harsa te tan a hlu hlei hlei dawn a ni. Keimah ngei pawhin ka lo tawn fo tawh anih vangin in register nachang hre lo, mamawh huna in register chawp leh chuk chuk tum an awm reng mai te hi hma kan lak a tul. Private hospital tel lo hian kan awm thei lo tih an Bed Ratio atang hian a chiang reng a, health care scheme hi tun aia changtlung zawkin private hospital-ah hian hman tangkai theih nise, a chhawrtu tur chu mipui tho kan ni. 

Heng ka han ziahte hi ka mi mal ngaihdan bakah mi dang ka biakrawn atangtea ka rawn ziah a ni a. Ka ngaih pawimawh ber chu a chhawrtu tur mipuite an ni a. Damloh inenkawlna kawnga neihin a tlin loh vanga tawrhna hi ka hmu ve ta fo a, a tuartu tan a hrehawm em a, a solution hi kan sorkar hian ngaihtuah rang thei se ka tih vangin ka han ziak ve a ni. Mipuite pawhin khawvel thil (material) lama intlansiak vak vak lo hian kan sum thawhchhuah ang ang te kan damloh mamawh huna inenkawl nan khawlte ching uar ila, sorkar ruahmanna siamte hi a theih ang angin tawiawm ila, mi thiam zawkte pawhin rawtna tha zawk siam nachang hria ila tiin thahnemngaih thu hlaah inthlahrung ang reng tak siin ka han ziak ve a ni e.