Zawhna: Ka pu, kum 34 mi ka ni a tunah hian nau thla 5 mi ka pai mek a, ka in sawiselna ber chu ka zun zawnga ka serh na tlat hi eng nge a chhan? Ka hrawkah hian min hnawh deuh ul thin bawk a, rai lai hian engtik chhung nge sex hman pawi lai ber ni ang? min puih theih chuan ka lawm khawp ang? – Dini, Ramhlun South

Chhanna: I chanchin hi hei aia chipchiar hret hian rawn sawi thei la, chu chuan i harsatna neih chhan te pawh kan hriat chian phah thei chuan a rinawm. Entirnan, i fa pakhatna nge pahnihna emaw pathumna? I fa pahnih­na emaw pathumna lo ni ta se i fa hmasa te chu neih pangngai in nge zai chhuah in i neih? tih te han hre thei ta ila. Tin, i lo inentir tawh em, i zun test te i lo ti tawh em tih te pawh han hriat belh theih ta se.

Engpawhnise, doctor ah i in checkup tawh turah ka han ngai a. Naupai te hi an pai chhungin vawi thum tal in checkup tura beisei an ni a (trimester tin – a tir thla thum, a lai thla thum, leh a tawp lam thla thum). Aizawl ah i awm avangin ultrasound pawhin an lo en tawh ngei che chu ka han ring a. Chuvangin i naupai laiah hi chuan fel lo a awm hran lo anih ka ring bawk a. Zun zawnga serh na thin hi enge a chhan ni thei tur ni ang? Zunkawng infection vang a ni thei a, chumi hre tur chuan i zun test kha a pawimawh dawn ani.

Naupai lai an han than chhoh hian khel (pelvis) chhung leh chhul tuamtu tihrawl leh tha te an han tang mar tial tial a, chu chuan tai/kap/serh zawn velah na nuam lo an siam ve fo thei a, naupaiin a ken tel ve hrim hrim a ni thin. Tin, thisen che vel a lo nasa zual a, serh chhung bang vela thisen infawk khawm hian na nuam lo a thlen ve fo thei bawk. Chu bakah chuan nau thang zel hian khel ruh chuktuah ah pressure a pe tam ve tial tial a, chu chuan serh bawr na emaw nuam lo a thlen ve thei bawk.

Nau a lo than chhoh khan phing (bladder) a rawn nek a, chu chuan zun chhuak a thlen hma a, zun in (dysuria) kan tih mai, zun chhuak sek ang te a thlen ve fo thin. Mahse, infection a awm leh awm loh hriat hi a pawimawh khawp mai a, chuvang tak chuan zun test (urine routine examination) kha a tul a ni. Zunah hnai (WBC/Pus Cells) a lo tam anih chuan hrik vanga lo awm anih leh nih loh hriat a tul leh a, chuvangin hrik to tir (urine culture) tih leh a tul bawk ang. Infection vang anih chuan antibiotic i ei te a ngai dawn a, naupai laiin a huat loh ei a tul dawn avangin hmeichhe doctor (Gynecologist) entir ngei a tha ang. Zunthlum i neih leh neih loh pawh hriat chian nghal a tha hle.

Hrawk hnawh i rawn sawi tel a. Nau rawn thang khan pumpui lam a nek chho ve bawk thin a. Chu chuan pumpui lawng (Gastritis) ang deuhin insawi­selna a thlen thei a, tin, acid reflux (pumpui acid, chawkawng a pit chho) natna te a awm ve theih avangin hrawk hnawh angin an feel ve fo thin a ni. Ek lamah te pawh harsatna an nei tel ve fo bawk.

Naupai laia sex hman chungchangah erawh chuan a him lohna a awm hran lova. In nupa kutah a innghat a, nangmah zawkin nuam i ti lo anih erawh chuan hman loh kha a fuh zawk mai thei. I pasal nen inpawh takin sawi dun ula a tha ber. Nau chhiat tawh i nih palh erawh chuan fimkhur a tha a, a bik takin 1st trimester (a tir thla thum chhung) lai hian sex hman insum a tha viau. Hriat tur pawimawh erawhchu infection laka inven uluk kha a ni a. Condom hman loh tal pawhin sex hman zawha insilfai uluk kha a pawimawh hle a ni.