Kamchhuak

Ropuina hautak

K. Lalrinchhana - May 31, 2022

Aizawl khawpuia biak te hi Europe ramah pawh awm se zahpuiawm lo tur a tam tawh mai. A mawina, changkanna leh ropuina te hi kan per capita income nen hian inphaman deuh tal se a zia deuh tur

Hmanni chu department pakhata an hotu ber, head of office-ah kan leng lut teh mial a; Room zau pui maiah hian furniture man to tak tak nen, AC leh TV phek hlai chi nen a lo inchhawp rup mai a. A thutna sirah chuan computer, printer, fax machine leh telephone a inchhawp rup mai bawk a. A personal branch-ah chuan bell a hmeh ruala a mamawh apiang pe zung zung thei turin staff pathum vel an inring reng bawk a. A dawhkante lah chu patling hlam thum zeta sei hi a ni a; a dawhkanah khan chaw kil dawn ila, patling sawmhnih vel chu indip lutuk loin a thut kual theih ang. 

Chutiang office ropui taka kan awm lai chuan kei a kar ngaihtuahna chu heti zawng hian a kal teh daih a, ‘A kum telin kan state leiba a pung tual tual a, tunah hian kan state leiba tlingkhawm hi veibelchhe sing chuang a ni tawh a. Chutiang taka state pachhia, thawhchhuah nei si lo, leiba ngah bawk si kan nih laia department hotu lawk te pisa a ropui em em mai hi thil inhmeh tak chu a va ni chiah lo em’ tih hi. Kan lenluhna office-a an hotupa ber room kha kha ai khan te ta hret se, a room a tet na na na chuan electric bill leh AC hman man pawh a tlem deuh nge nge ang a. Tin, a dawhkan pawh kha a seiin a lian lutuk reng reng, a hmang seng lo lam mah a ni. A hnum tliang hun mai si a, kha ai khan te ta hret se, hna a thawh that loh phah chuang dawn em ni le? Kan state sum hmuh tam zawk hi central atanga a thawna kan dawn a ni a, hei vang hi ni maw, heti taka sawrkar sum renchem nachang kan hriat loh ni? 

Mi  mal ang pawhin inrenchem hi kan thiam lutuk lo. Lakluh aia hman ral tam zawk, thawhchhuah phu loa khawsak ti sang kan ni fur mai. Hei hian kohhran pawh a kangkai zel a, tunlaia kohhran rualelna ber chu Biak in inneih thatsiak a ni. Biak in inneih that siakin kan inel suau suau a, khawpui tih dan apiang hi thingtlam lamin an la ve zel si a, thingtlang khaw kilkhawr berah pawh biak in tha pui pui a ding ta fur mai. Pastor quarters te lah kan nei thain, kan thuam tha narawh e. Thingthlang khaw tam taka pastor quarters hi BDO quarters aia pawha tha zawk a ni fur tawh. Kohhranin kan tlawnin, kan duat bawk a, pastor thenkhat chu an officer chet ruih tawh mai. Kan rualelna rilru dik lo hian kan sakhaw puithiamte rilru pawh a tipiangsual titih ta a nih hi.

Kan veng thenawm chiahte Biak in aia tha leh changkang duhna avangin kan Biak in tha lai kan vaw thiat a, vaibelchhe tel sengin Biak in thar kan sa leh thawr a, chawmhlawm state nihna nen chuan a inmil thei chiah lo a ni. Aizawl khawpuia biak inte hi Europe ramah pawh awm se zahpuiawm lo tur a tam tawh mai. A mawina, changkanna leh ropuina te hi kan per capita income nen hian inphaman deuh tal se a zia deuh tur. Concrete building sak tha pangngai hi engineer te chuan kum 100 daih turah an ngai a, Aizawl tlak lama Presbyterian Kohhran pakhat chuan Presbytery khawmpui an dawn dawn vangin an Biak in tha em em, kum 30 pawh la tling thathum lo chu an vaw thiat a, sum tam tak sengin a aia tha leh lian zawkin an sa leh a ni. Presbytery khawmpui zo se, an biak in tharah khan Nilai zan, Inrinni zan leh Pathianni chawhnuah chuan an thawl ve leh viau mai thei.

Tin, inkhawmpuite hi kan uar em em mai a, inkhawmpui behchhana kan sum sen ral hi uiawm tham a ni. A thlengtu kohhran lah an pawk na rawh e. Chuvangin, kohhran inkhawmpui pawh hi tun aia hautak lo leh senso tlem zawk hian tih dan a awm ang maw le. Entir nan, Presbytery inkhawmpuiah hian kohhran pakhatin a dawl zawk tawk palai hian rorel mai se a tawk tiu teu viau a ni. Bial khawmpuiah hian kei a kar hi a zawnin kum sawm dawn khawmpui rorel palaiah ruat ka ni tawh a, palai rorel inkhawmah vawi khat mah ngaihdan sawiin ka la ding chhin lo. Khawmpui palai zahve aia tam daih hi keimah anga ngaihdan sawi ngai lo te an ni. 

Inkhawmpui rorel a pianga ding thin leh ngaihdan sawi thin chu kohhran upa senior, fep fu ve tak tak sawm vel bak an ni ngai lo. Anni hi an in din chhawk sek a, rorel palai nawlpuiin kan tih ve awmchhun chu charman-in ‘Remti a piangin kan remti tih entir nan kan kut ding lam phar ila’ a tih a, sikul naupang thuawih tak anga rang taka ban lo phar ve kha a ni mai. Tlaiah puar el euhin ruai kan theh leh a, a bak tih theih kan nei vak lo. Chuvangin Bial khawmpui a ni emaw, Presbytery khawmpui a ni emaw, Synod khawmpui emaw Assembly khawmpui pawh ni se, khawmpui tihautak lo zawnga palai zat tihtlem mai hi a tha viau a ni. Ngaihdan sawi ve lo tur palai inruat teuh kha tulloa sum senna mai mai a ni. Hun rei tak kalphung ngheta kan lo nei tawh a nih pawhin kalphung chu thlak danglam theih a ni a, India constitution pawh vawi tam an siam tha a, an thlak danglam fo a lawm maw le. 

Khawmpui palai kan inruat teuh chhan hi pawn lama lan ropui kan duh vang anih lek phei chuan a ho khawp ang. Pa pakhat kohhran upa nih chak pawh a upa nih chak chhan an zawt a, ‘Sumo-ah chuang ila, khiangkawi ipte ak chungin Kawlkulh Hotel kawtah han tum thla chhak ila, hmelhriat lo awm te khan, ‘Eng nge i tih dawn?’ min han ti se, ‘Ka synod dawn’ han ti thum chhak ila’ a ti e, an ti.

Chuvangin, he ram zim teah hian kan nitin khawsaknaa min ti hmasawn tur thil emaw, a loa kan awm theih loh leh a taka kan tangkaipui tur thilte a nih lem loh chuan a hautak lo zawng leh leibat titlem zawnga kan khawsak thiam a tul ta hle mai. Ropuina leh changkanna hi pawn lam hmuh theih leh khawih theih thilah chauh kan teh chhung chuan kan lo ropui lo a, kan la changkang tawk lo tihna a ni zawk.

Share now