Ruihhlo chungchang hi ka lo ziak ve tawh thin a, tunah hian kan sawrkar lamin chak zawka hmalak chhohte a tum takah chuan a tangkai beiseiin kan ziak ve leh a ni. Ruihhlo ngawlvei enkawl kawngah hian ka inhnamhnawih rei ve ta viau a, natna enkawl kawngah chuan hlawhtlinna hmuh harsa ber pawl chu a ni awm e. Ruihhlo ngawlveina hrim hrim hi a complex em em mai a, taksa lama harsatna a thlen te, rilru lama harsatna a thlen te leh, thlarau lam nun thleng pawha a khawih buai dante hi harsatna tawk ve lo chhungkaw tan chuan hriatthiam a har khawp ang. Mahse, heti khawpa kan ram a tihbuai si avang hian leh, a enkawl leh buaipui kawngah pawh theihtawp kan chhuah chung pawha hma kan la sawn tawk lo lai hi a veiawm a, tih dan tha zawka hma kan lak theih beiseiin kan ziak a ni.

Kan hriat hmasak tur chu ruihhlo khawih chhan hi a tam anga, chutih rualin ruihhlo ti tura thlemna tawk theuh theuh, ti chhin theuh theuh pawh, thenkhata ngawl an vei chhoh mai laiin thenkhat erawh chuan an bânsan leh thei mai hi engvang nge ni ang tihte pawh ngaihtuah a ngai ang. Mithiamte sawi danah chuan ruihhlo ngawlvei laka venghimtu “Protective Factors” a awm a, ruihhlo laka tiderthawng theitu “Risk Factors” a awm bawk. Heng zinga pawimawh ber mai chu an chenna environment, a bik takin chhungkua inenkawl dan hi a ni awm e. Risk factors an ngah a, protective factors a tlem leh bawk si chuan ngawlveina chance a sang hle bik an ti a ni.

Ngawlvei (Addiction) tak tak level an lo thlen tawh chuan an thluakah structural changes (physical taka danglamna thleng) a awm tawh a, chu chu an dam chhung zawngin a reh thei tawh lo niin an sawi. Chutiang avang chuan ngawlveina hi “Chronic Relapsing Brain Disorder” (thluak natna benvawn, lo lang chhuak leh thin) tiin an hrilhfiah reng a ni. Hun rei tak sim tawh a, nunphung pangngai hmang chho leh tawhte pawh ho tete-ah an tlu leh mai thin. Chuvang tak chuan a enkawl kawngah hian chronic disease dang, entirnan - zunthlum leh thisen sang neiten an dam chhunga damdawi an ei a ngai tawh ang mai hian enkawlna an dawn ve a ngai fo tawh thin a ni. Chumi atanga kan hriat tur pawimawh tak mai chu short term-a enkawl theih an ni lo tih hi a ni.

Kan rama ruihhlo an hmansual leh ngawl an vei common ber chu Heroin hi a ni a. He damdawi hi Opioid Drugs zinga mi a ni a, a chhungte dang chu Morphine (cancer patient te nachhawkna atana kan hman ber hi), Codeine (khuh damdawi ah a tel), Tramadol (nachhawkna) te leh tunhmaa lar thin Dextropropxyphene (Proxyvon/Parvon Spas tih vela an ruih ber) te hi an ni. Heng Opioid Drugs te hi damdawi chak tak mai an ni a, a ngawlvei tawh chuan an nghei mai mai thei tawh lo; a chhan chu an nghei chuan an taksa na takin a thing let thin (withdrawal). Meizial zu thinin a nghei thut a, a châk huam huamte hi chu nep tak a la ni zawk. Heng Opioid Drugs, a bik takin Heroin hi a tam ber chuan an inchiu a, chumi avang chuan inchiuna hmanrua intawm chang an lo nei a, chuta tang chuan hrik hlauhawm HIV, Hepatitis B leh C te an kai ta thin a ni.

Ruihtheih damdawi dang an hman common leh tak mai chu Benzodiazepines te hi an ni a, chung zingah chuan Diazepam, Alprazolam leh Nitrazepam te hi an hman sual nasat chu a ni. A chunga kan sawi Opioid Drugs te hi a enkawlna bik damdawi tha tak mai, Opiates ni ve tho Buprenorphine a awm a, he damdawi hi tuna kan hriat lar tak Opioid Substitution Treatment (OST) atana kan hman ber chu a ni. Damdawi tha tak mai a ni a, a him a, withdrawal vanga harsatna tam tak a chhawk a, uluk taka hman anih chuan an tangkaipui em em a ni. Heti chung hian ruihhlo ngawlvei te hian damdawi chi khat mai ni lovin damdawi chi hnih emaw chi thum laite pawh an chawhpawlh thin a, chu chu dual dependency an ti a, Heroin ti thinte hian Alprazolam nen an hman pawlh fo a ni. Heroin hi overdose (OD) an neih chuan a thahna damdawi tha tak mai Naloxone a awm a, Benzodiazepines te erawh hi chu OD a awm pawhin a hranpaa thahna damdawi a awm hran lo thung. Heroin ti lai emaw OST la mek te hian Alprazolam bakah hian zu nen pawh an chawhpawlh fo bawk.

Ruihhlo ngawlvei te hi enkawl tur chuan an taksa a ruihhlo châmbâng kha thuah fai a ngai thin a, chu chu Detoxification Treatment hmangin an enkawl thin. Chumi atan chuan high dose in Buprenorphine te leh damdawi dang te an pe a, IV Fluids te an hmang tel bawk a. He Detox enkawlna hi a tlangpuiin kar 1-2 chhungte a ngai thin a ni. Withdrawal zualpui awm theite an control hnuah damdawi hmang bawk hian Maintenance Treatment an pe chhunzawm a, OST-ah bik chuan Buprenorphine hmang hian an maintain a, zawi muangin a dose an tihniam hret hret a; tichuan, a tel lova an awm theih thlengin treatment an pe thin a ni. Heng Detox leh Maintenance treatment te hi duhthusamah chuan Hospital/Nursing Home-ah te leh Rehab Home-ah te pek ni thei se, uluk taka vil (monitor) an ngai thin a ni.

Damdawi hmanga enkawlna (Pharmacotherapy) hi a hautak khawp mai a, OST damdawi Buprenorphine phei chu lei ralah phei chuan ngawlvei tam ber hian an zo lo (afford lo). Vanneihthlak takin HIV Prevention Program hnuaiah MSACS hian Center hrang hrangah he OST hi an kalpui a, a mamawhtute tan a thlawnin damdawi hi an pe a ni. Mahse, a tam ber chu Home-based ni lovin Out-patient anga enkawl an ni thung. OST avang hian ruihhlo inchiu thin thahnem tak chu HIV lakah an him a, nunphung pangngai nei chhovin a then phei chu hna an thawk leh thei a, chhungkaw tam takin hahdamna an chang mek a ni. Heti chung hian hmang sual tawkte chu an awm ve fo tho mai; mahse, a tam zawkin an tangkaipui avang hian enkawlna kan neih zinga a tha ber chu a la ni reng hrih. Khawvel hmun dangah chuan OST tho hi damdawi dang, Methadone hmangin an kalpui leh bawk a, kan ramah erawh chuan a la rem chiah hrih lo anih hmel.

Ministry of Social Justice & Empowerment (MSJE) hnuaiah hian ruihhlo vanga harsatna enkawlna scheme tha tak mai a awm a (Central Sector Scheme of Assistance for Prevention of Alcoholism and Substance (Drugs) Abuse). Hemi hnuaiah hian Integrated Rehabilitation Centres for Addicts (IRCA) tih chu a awm a, hemi hmang hian Mizoramah pawh Social Welfare Dept chuan Rehab Home eng emaw zat tanpuina a pe mek a ni. Heng home-ah te hian ruihhlo leh zu ngawlveite an enkawl a, mahse Central funding anih vangin funds te an hmu tlai fo a; tin, thawktu lam pawh an indaih lo viau thin. Home-ah hian Pharmacoptherapy bakah Counselor hmangin Behavioral leh Psychotherapy te pek thin an ni. Heng treatment te hi a pawimawh em em mai a, an rilru buatsaihna a ni a, ruihhlo avanga nungchang leh mizia zawng zawng lo inthlak tawh te leh, chhungte leh lain ate nena an inkar chhe tawh siam that nante a pawimawh hle. Chuvang tak chuan hetiang anga counseling pe tur chuan duhthusam ah chuan qualified Counselor (Psychology subject) ni thei ngei se.

MSJE scheme hnuaia IRCA ah hian Home pakhat tana norms an siam danah chuan mi 50 enkawl turin thawktu mi 21 tal an mamawh a ni (minimum requirements). IRCA bakah hian home an chhuah hnua an khawvel ngai bawka let mai lova inbuatsaihna hmun After-Care Center te la awm leh zel thei se. Chutiang ang chu khawvel hmun dangah pawha an kalpui dan a ni. Kan sorkarin Sethawn lamah mi 1000 chuang enkawlna hmun siam an tum rup mai hi ngaihtuah a tithui viau mai a, tunhma lama mi 70-80 vel an enkawl lai pawh khan an inenkawl zo hlei thei lo chu a ni ber a. A enkawltu tur mihring mamawh zat ringawt pawh hi a turu viau awm e. Chutih laiin Home a enkawl remchang lo, sum lam harsatna avang te, hnathawh lai an neih vangte leh chhan dang dang vanga Out-Patient treatment-a enkawl ngai an awm fo a, chung mite tan chuan MSACS lamin OST service a pek hi a tangkai em em bawk a ni.

Kan hruaitute’n ruihhlo vanga kan harsatna hriaa hmalak an tum hi a lawmawm khawp mai a; mahse, hmalak kan tum dan hi chu ennawn leh theih nise ka ti hle mai. Center dang awm sate thuam chak hi a pawimawh hle dawn a, chumi atana Home awmsate tana norms an siam, chumi behchhana endikna tur an duan Accreditation rules tha tak mai, Cabinet pawhin an pawm tawh hi han hmang se, hma kan sawn ka beisei hle a ni. Engpawhnise, kan hruaituteah beiseina sang tak ka nei a, a Dept lamah pawh mithiam tak tak an awm a, heng mithiam te hi hmang tangkai se, hma kan sawn ngei ang. Ruihhlo ngawlveina hi a enkawl theih a; mahse, chhungkaw tam zawkin enkawl theite pan nachang kan la hre tawk lo thin. A enkawl kawngah hma kan sawn viau tawh a, zahthlak ah ngai lovin pan nachang i hre deuh deuh zel ang u.