Sailoa tlangval thlahnan aw....

Thanglai Pa - Jan 22, 2023

Sailoa mizia hi mi bik, mi dang te neih ve loha thuam ni mai hian ka hre thin. Kan programme hrang hrang-ah kan zin ho fo a, mipa te insum theih lohna ber hmeichhe lam ah hian a in vawng hneh em em a, sawi sep tur pawh hi ka hre lo.

Zaithiam zawng reng reng-in 1980 hnu atang khan Zoram chhak thlang chhim leh hmar hi kan hrut kual reng thin a, Solo competition leh beat contest hi khaw lian deuh deuh ah hian kan nei thin a chung ah chuan khaw hrang hrang te lo fuan khawmin intihsiak kan neih pui thin, mipuiin nuam an ti a, keini buatsaihtu te lahin nuam kan ti narawh zep thu cheng lo e. Gospel Camping-a luh ve pawh hian kan han feh chhuah tawh hi chuan thiante an lo ak chuah chuah a, kan kalna te lah in rimawi kutpuia tan kawng tinrengin an lo inbuatsaih thin bawk si a, duhsakna nopui hi kan dawm leh nge nge thin a, ak ring ringah kan tang ta thin awm e. 

Khatiang kan kalna ah chuan Tuichangral leh Tlawng thlang lam hian rimawi lam hi an hlut zual in ka hre thin, keini pawn nuam kan ti a. Kum leh ni ka hre tawh lo, vawi khat chu Tlawng thlang tan Solo & beat contest nei turin ka thawhpui leh nau bika ka neih Laltea te nen West Phaileng-ah tiang hun chu kan zuk hmang a. Beat Contest-a W. Phaileng beat group-a an singer khan Queen hla te kha  mawi zet zet hian a rawn sa ta mai a,  min barakhaih chiang hle mai. "E, khi zawng Bangalore vel emaw a awm thin a ni ngei ang, tualchhung irawm chhuak a ni thei lo, a hla thu lam a dik si, a zai lah profe si," kha kan ti a, Best Vocalist pek loh chi a ni lo   kan ti a. A hnuah Solo competition-ah a rawn zai leh a,  "E khai sap hla kha a thiam kan tih nen Mizo hla hi nih hi a profe na zawk, a lo nih hi," kan ti leh a,  Solo ah pawh tu tluk rual lohin pakhatnaah kan dah leh ta, kha nau zet kha chuan rimawi-ah hmabak eng tak a nei chiang mai kha kan ti a ni.

Aizawla kan haw hnu thla fe liam hnuah kan thenawma W Phaileng khua awm te hnenah chuan, "In khua ah khuan zaithiam zet mai a awm a, chah chho teh u, a hma bak a eng khawp a nia kha ka tia, an chah chho ta ngei a, Phaileng khaw zaithiam chu (nawlpuia hmu leh hria kan nih vang khan hming leh hmel kha ka hre bik tawh si lo) tingtang pe in kan zai tir a,  mahse ka mi zawn chu a ni lo tlat. Chu pa chu Rinmawia an ti ni ta in ka hria. A dang chah leh ru ka ti a, chu an mi chah thar leh chu kan zai tir leh ta a, Lallianmawia Pachuau hla hi aw tha leh lian tak mai chuan an sa vung hem hem mai a, ka mi zawn a nilo tih ka hria, a la naupangin a aw a tha si a, "Tun atang chuan Mawia Aw ang lo thei ang berin zai tum tawh ang che, i aw a tha in I zai thiam a, nangma irawm chhuak dik tak khan zai tawh ang che," ka ti vei luam a, chu rawlthar hleitling tak chu Lalruatfela Pachuau hi a ni.

Vawi 3 naah chuan kan zanriah ei lai hian tleirawl ngo dang lam sam chhete a ti phir hi a lo lut ta heu mai. Kan hmuh mai khan W. Phaileng a zaithiam kan tih ngei kha ni. Hai thu cheng lo e, zai tir pawh ngai ka ti lo. Kan ti ti a, keini hi chu zaithiam zawng chhuak tu ang chauh kan nia, ti lara pui thei tu tur che chu Pu C Dinthanga a ni mai a, tiin ka Scooter chuan ka va thlah ta, tun hnu hian, "Kha tia min koh chhoh khan sawrkar-ah hna min pe dawn ah ka ngai a," a ti a, kan nui nasa mai.

Zuang dawrh ang! an lar chhoh dan te chu kan hriat hnu vek a nih kha maw... Khatia a lar vanglai taka Love songs Album an ti chhuak tur a nuna Setana lal ram leh Isua Lal ram an han inbei tak tak kha chu mihring  kan in chan pha lo mai ang tih te pawh kan hlau rum rum chu a ni ber.  Pathian hman Mihlim nu ho khan Pathian hman nia ngaih lem loh mi hlim ho kha an hneh lo lek lek thinin ka hria. Sailo-a U RP-i khan kei inchunga awm kha min rawn phone a, Over coat ha a hmai tuamin tiang ka keng a,  zanlai emaw zing lam emaw pawh ni se ka zuk hawl chhuak hlawm thin.

Tin an hriat loh in Police ah mipui bawr tu te tih khai atan duty tlaivar tur te ka va dil a, an rawn duty thin bawk. Mihlim na zawng khan an rawn vei rawn a, keiin a dik leh diklo ka thliar thiam tawh si lo, kan phek buai chu a ni ber thin e. A sermon naah pawh, 'U Matlana'n min rawn bawh tlu in min bawh bet a,' te pawh a tih thin kha. An buai tak tak kha chu ka fanu Adeline-i tleirawl chhuak hlim te ngial pawh a lu chungah kut nghatin a tawngtai fo kha a ngai thin. Mihring takin tih ngaihna awm si hek lo le.  

Khatianga awm reng kha chuan mi pangngai kan in chan loh kha hlauh awm ta. Amah lah chaw ei ngai si lo, thlarau inbeihna nasa si, mihlim chi hrang hrangin an rawn sawithaih awllo nen, kan sitting room chung Adeline-i room ah kan sawn chho ta ringawt a, ka fanu in a ngaihsan zawng poster leh milem, a room-a a tar te chu a pawt thla vek a, chung poster aiah chuan Pathian thu ziak leh Isua lem hrang hrang te a intar ta vek a, chu room ah chuan a Nu leh Pa te meuh pawh a tul tawpah lo chuan luh ka phal lo. Ka tlai office bang hian Artui te Balhla te ka hawn thin, thlarau ni maia mawi hian a dang var pap mai a, a awm mai mai hi a khur der der reng mai kha ni si, a lainatawm thin khawp mai. "Pathianin duh thlanna fim a pe reng dawn a hmelma pa hian a hneh dawn chuang lo," tih kha ka ngaihdan mawl mang tak, ka enkawl thiam ve tawk dan kha ni mai si.

Tlai office ban a khulam R.V-a liam thlak kan chin lai kha a ni a, ka nau damloh na vang chuan chhun lamah tlai thum daih te ka la lawk mai thin a, khatianga hmai chhah deuh map chunga ka theih tawk dana ka enkawl thin pawh khan amah ah mak tihna leh mi en danna kha a nei ngai miah lo, a sawi chhuak ngai lo hrim hrim. Tlai khat ka hawng kha, "U Matlan, harh tharna leh Pathiana inpum pekna ka chang ta sin, lo kal rawh ka lo hrilh ang che," kha ti a, kei chuan mi lo nghak lawk inchung zawlah khan min hrilh dawn nia ka ti a, kei chuan Sailoa testimony ngaithla tur chuan pehteh ka lak khawl chu Coca Cola bur lianah thun khatin a bulah chuan ka han thu a, a pianthar dan chu a sawi ta malh malh a, kei lahin uluk taka ngaithla in ka thil chu ka tauh mial mial ve bawk a, khaw thim dawn ruai chuan a testimony chu a sawi zo a, kei pawn ka thil chu ka tauh zo ve chiah a, kha tia an sawi zawh tirh kha chuan a thusawi te kha ka hre ve a niang, "A van ropui em " te kha ka ti ve deuh fo in ka hria. Zanah kan mu kha ka mu bo zo vek aniang, hriat ka nei ta miah lo.  "Saw lai tlang saw tui in a rawn chim phei zel a," a tih lai te chauh kha darkar 2 dawn a thu min hrilh ah khan sawi chhawn tur zuk nei a, a mihrin loh theih hle zawng a lo ni e.

Sailoa mizia hi mi bik, mi dang te neih ve loha thuam ni mai hian ka hre thin. Kan programme hrang hrang-ah kan zin ho fo a, mipa te insum theih lohna ber hmeichhe lam ah hian a in vawng hneh em em a, sawi sep tur pawh hi ka hre lo. Mi zinga Nula ngam awm deuh a han fiam a, han kuah thuak thuak hi tiang lam a thlen san ve dan ber chu a ni awm e  

Tin pawisa lamah hian sawi selna tur a awm lo, a ril a tam chuan a haw a chaw bel a zen mai thin. An In-ah a lo awm loh chuan kan In ah a lo chho a, chaw bel a pan mai.  Tul lo leh holam-ah pawisa a hmang ngai lo.  Tin amah hi a inveng thiam in mi dang laka daidanna bang hi a siam thiam em em a, tu tan mah pal zut mai mai theihin a in siam ngai lo. Nu leh Pa,  unaute hmangaih leh ngaihpawimawhah tunlai tlangval ten an khan lo hle bawk in ka hre leh bawk,  mi chanchin a chhe lam sawi te, mi chunga thin rimna tihlan te hi a chin than thil a ni ngai lo. 

Pawi ka tih chu khawvel hnam tam tak te hian an zai laia an hnam nihna symbol an nei thin, Khasi te, Naga te, Punjabi te pawn an zai/lam in au dan bik.an neih hi keini Mizo te tan "chhei/chheih"  tih a rawn vawrh lar dawn tan a, Gospel lamah hun pum a pek tak si avanga par a chhuang hman ta lo erawh khawvel takin pawi hle in ka hria.

Hei tun Nilaini, January 25, 2023-ah nupui hmeltha leh duhawm tak a nei dawn ta a,  ka fanu Adeline-i  nen intiam rual ni awm takin a niin Nilai kal ta khan pasal a nei thung kha nia, ka nau Sailoa nupui nei tur hi rilru takin ka lawm a duhsakna sang ber ka hlan e.

Share now