Zawhna: Ka pu, khawngaih takin ka zawhna che hi min chhansak theih chuan ka lawm ngawt ang. Fapa kum 10 mi ka nei a, kum 2 kalta atang khan a sazu hi hrawt a ching tlat mai a. Ti tawh lo tura ka hrilh pawn a lo ti leh thin a, hei hi engtia tih tur nge ka hrethiam lo. Doctor pan tur ka hre si lo va, khawngaihin thurawn min pek theih chuan ka lawm ngawt ang. ZALEN chanchinbu atangin doctor zawhna i chhanna te kan lo chhiar ve thin a, a bengvarthlak thin khawp mai.

Chhanna: I zawhna hian thuril tam tak sawi tur a pai a, kan pianken hriatfiahna atanga chhan tul nia ka hriat vangin a phena thu inthupte pawh ka’n tar lang tel hrim hrim ang e. Mihring hi kan lo pian tirh atang hian mipa leh hmeichhiaah siam kan ni a, kan serh (sexual organs) inang lo atang leh, hmeichhia chu nau pai tura chhul pek an nih dan te, mipa chu kan tawng takin “chi thlah” tura duan kan nih dan atangte hian kan nihphung chu a sexual nghal a ni tih hi kan hriatthiam a tul hle. Mipa chu chi thlah tura siam kan nih vangin chi thlah tur chuan sex hmang thei kan nih a ngai a. Sex hmang thei tur chuan kan sazu a fuk theih a ngai a, chu sazu fuk thei nihna chu kan sazu lai (sexual organs)-ah ngawt a innghat lo va, ril takin kan thluak nen a inzawm nghet tlat a ni.

Mipa hi kan pian tirh atangin sazu (zang) pek kan ni a, kan sawi tak angin kan sazu fuk tur chuan tihphur a ngai a, chumi tiphur tur chuan kan thil hmuh emaw, kan taksain a tawh/a sik (tactile sensation) emaw atangin a lo phur thei a. Chu chu kan pian tirh atanga awm a ni tlat a, chuvang tak chuan naupang (naute thleng pawhin) hi an sazu hi a fuk thei tlat a ni. Mipa sazu fuk thei lo chu awmzia a awm lo khawp mai a, zun nana hman atan bak a tlak tlat lo a ni. Inhrawt (masturbation) kan tih pawh hi kan sakhuana nen hian inmil lo anga ngaihna a lian hle a; mahse, kan inhriatchianna, mipa ka ni tih kan hriatna atanga intan a nih miau avangin pehhel theih a ni lo. Mipa pangngai taka piang chuan he tisa châkna atanga sazu lo fuk thin hi a pehhel thei ngai lo vang.

Naupan lai hian eng hunah emaw tak chuan anmahni inhriatna, an taksa bung awm dan zir chian hun an tawng ngei dawn a, mipa pawh hmeichhia pawh kan bâng lo. An anpui ni lo (opposite sex)-te nena inkhaikhin hun a lo thleng ang a, engemaw palh vanga puitling zawk serh an hmuh te, hmeichhe hnute an hmuh palh te khan anmahniah an nei ve nge nei ve lo hriat châkna a siam dawn tho tho a ni. Chumi inhriatchian duhna chuan anmahni taksa hriatchian tumna (self exploration- ah a hruai a, mipa chuan loh theih lohin an sazu an khawih ngei dawn. Chu an khawih chuan sensation an la hriatthiam ngai loh a thlen a, an suangtuah phak reng reng loh (sexual sensation) a thlen ve tlat mai a ni. Chuvang tak chuan mipa naupang tam ber (i ti teh ang) hian tihluih ni miah lovin an sazu an hrawt mai thin a ni.

Kan sawi tak atang hian mipa naupang inhrawt hi thil normal a ni tih a hriatthiam theih ka beisei a. Chutih rual chuan mi thiamte sawi danah nu leh pa enkawlna, awmpui leh vil, a bik takin physical taka chulnel dawng nep naupangte hian mahni inhrawt an uar duh bik niin an sawi. A dik vek chuang lo thei bawk. Engtik kumah nge hetiang hi an chin tan tih a hriat mai loh a, i fapa pawh hian hei aia a naupan zual lai atanga a chin tan pawh a ni thei tho mai. Engpawhnise, rilru lama fel lo emaw, chiangkuan lohna emaw a neih âwmte i hriat loh a, a ni tin hun hman dan a pangngai a, a unaute emaw, thiante emaw, thenawm naupangte bula a awm dan emaw a inthlak (inkiltawih, kawm duh lo, mahnia awm nuam ti zawk) te a nih loh chuan amaha reh ve mai turah ngai phawt rawh. I vei lutuk ang a, a hmuh palh che chuan a pawi zawk thei bawk a, ngaihthah lui deuh la, amah erawh ngainatna leh ngaihsakna, kawm tam, hun hman tampui zawnga insiam remte han tum phawt la. I ngaih a tha thei ngang lo a nih erawh chuan Psychiatrist pan kha a fuh ber hrihin ka ring.