Zawhna: Ka pu, hmanni khan ka dam lova, Doctor in i Sodium leh Potassium a hniam anih hi a ti a. Enge Sodium leh Potassium chu? Kan taksa khawilai ah nge a awm? A hniam leh san avanga kan taksa a effect dan min hrilh teh. Normal turin engtia awm tur nge?

Chhanna: Kan taksa ah hian minerals chi hrang hrang a awm a. Chung zingah chuan sodium, potassium, calcium, iron, zinc etc te hi kan hriat common deuh te a ni awm e.  Tin, kan ei leh in atang hian heng minerals te hi kan la lut ve reng bawk a. Potassium hi thei leh thlai hnah hring chi hrang hrang ah a awm tam a, sodium erawh kan lakluhna ber chu chi (salt) hi ani awm e. Heng minerals te hian kan taksa khawl hnathawh an pui a, a balance taka an awm erawh a tul thung. A tam lutuk emaw a tlem lutuk chuan kan taksa khawl a buai duh a, a bikin Sodium leh Potassium te hi kan lung (heart) hnathawh kawngah an pawimawh hle.

Kan taksa timur (cells) te ah hian pawimawh deuh mai chu fluid balance (timur chhungril a tui awm zat leh a pawn lama tui awm zat) hi a ni a. Timur chhungril ah tui a tam lutuk chuan a vung a, chu chuan hna an thawk tha thei lo ta thin a. Entirnan, tihrawl timur (muscle cells) ah hian tui an tam lutuk chuan tihrawl a chak lova, a zawi a, hna an thawk tha thei lova, tichuan rawl, than a te a lo awm thin. Chutiang ang chuan kan lung timur (heart cells) an vun chuan lungphu a mumal thei lo thin a, nerve cells lam pawh information an inthawn a ti buai thei bawk a ni.

Timur chhungah tui a tlem leh lutuk thung chuan tui an kham lova, an lo vuai/sawng thei a, a lan chhuah dan pakhat chu dehydration (taksa tui tlakchham) a lo thlen hi a ni. Example pakhat atan zan lamah zu an in vak hian cell dehydration a thlen a, sam a ro rup a, dang a ro bawk a, pentawng kan tih ang hi a rawn thlen ta mai thin ang hi a ni. Chutiang chu thil awm dan anih vangin minerals te hi an awm zat tur aia tam a awm emaw a tlem lutuk chuan he fluid balance hi a buai hma a, lungphu dik lo te, nerve conduction chak lo (nerve chak lo tia kan sawi mai) te a thlen thuai thin a ni. Kal tha lo (Kidney disease) nei ah te hlei hlei hian Sodium leh Potassium level hi balance uluk a ngai hle. 

Sodium hniam lutuk (Hyponatremia) hian luak chhuak, lu na, tha zawi, tihrawl phu nasa leh aikhirh/chawn tha chat, leh BP hniam te a thlen thei a. Sodium sang lutuk (Hypernatremia) erawh chuan tha za, awm hle hle thei lo, tuihal huam huam, leh a nasa deuh ah phei chuan kaih (seizures) leh nikhawhrelo a awm te a thlen thei a ni. Potassium hniam (Hypokalemia) chuan ek khal te, lungphu rang emaw phu dik lo te, chauh ngawih ngawih te leh kut/ke hmawr chawmawlh te a thlen thei a. Potassium sang chuan thawk harsa, lungphu buai, leh tihrawl rawl te a thlen thei bawk.

Sodium bik hi kan ei leh in pangngai ah kan mamawh tawk kan la lut reng a, chuvangin chi liah loh/chi insum hi a pawimawh hle. Chawhmeh al tlem ei zir a pawimawh hle a ni. Potassium bik hi kan lungin a mamawh zual a, a bikin BP sang nei te chuan an lakluh tam hret a pawimawh a, thei leh thlai hring ei tam a pawimawh a, balhla te hi a source pawimawh tak ani bawk. Kan sawi tak Kal tha lo (Kidney disease) leh Lung natna (Heart disease) nei ah te erawh chuan ei leh in lam hi uluk a pawimawh zual a, tlem a minerals sang emaw hniam hlek hian buaina a thlen hma bik a. Doctor te rawn chungin in monitor fo a pawimawh a ni.