Zawhna:  Ka pu, mipa kum 39 ka ni a, BP sang ka neih ve avangin kum 2 vel chu damdawi min ei tir tawh a. Engemaw changa luhai chem chem ka ching a, thil dang insawiselna erawh ka nei hran lo. Stroke te hi ka neih mai ka hlau deuh a, engtia inven chi nge ni ang? Hriat lawk dan te a awm em?

Chhanna:  I kum zat en hian i lifestyle ni awm ang kan ring chhin anga (i rawn sawi kim lo ang reng bawk si a). Normal aia thau lam hret (i overweight ngei a rinawm), ei leh in lam insum lem lo, zuk leh hmuam lam pawh inthlahdah hret, taksa sawizawi lam ti ngai vak lo, zan men rei ching, chaw ei hunbi nei mumal vak lo te pawh i ni thei maiin ka ring. Hetia kan tih ngawt nachhan chu i kum ang zata BP sang nei tam zawk hi hetiang lifestyle nei an tam deuh ber vang ani. Chuta tang chuan hetiang lifestyle – taksa sawizawi lam ngaihthah te, rit/thau lutuk te, ei leh in lam insum lem lo, hmuihmer leh mawm lam chi ei/in nasa te, zan mu tha lo emaw mu mumal lo te hian BP sang an neih duh vang a ni a. Hei bakah hian stress nei nasa, hnathawh emaw in lam hna a buai tak te leh rilru kaptu nei reng te hian BP sang an nei duh hle bawk.

BP sang nei te hi damdawi ei an ngaihthah fo mai a. Chu bakah chuan an in monitor regular lo fo bawk. BP sang inhre tir te hi tam zawkah chuan nunphung thlak danglam zawnga enkawlin an tha ve leh fo thei a. Ei leh in fimkhur, exercise lak leh rihna ti hniam zawnga hmalak te hian an tha ve leh fo thei. Damdawi an mamawh anih erawh chuan an dinhmun azirin BP damdawi engemaw ber an chawh a, chu chu regular taka an ei a ngai a ni. BP damdawi ei te hi lifestyle tih danglam bawk chuan engemaw hnuah chuan damdawi ei ngai lova tha leh te pawh an awm. Tam zawkah chuan ei reng a ngai thin. Ei pawhin hriat chang changa ei ni lovin hunbi mumal leh regular taka ei a tul thin a ni.

BP sang, control that loh hian thluak lama thisen zam a ti buai thei a, chu chuan thluak function a tih buai zeuh zeuh thin avangin i rawn sawi ang insawiselna hi an nei thin. Transient ischemic attack (TIA) an ti mai a, thluak a thisen supply a tih tlem zeuh zeuh avangin luhai hi an nei ta thin a. Enkawl vat loh chuan thisen zam puak emaw thisen leak a rawn thlen a, anih loh pawhin thisen zam a in block a, thluak a hmun thenkhatin thisen an dawng ta lova, chu chu Stroke kan tih chu ani ta a ni. Stroke bakah hian thisen sang control that loh hian heart attack a thlen duh hle bawk.

Stroke nei te hi a lo awm tak tak hma hian hriat lawk theih dan a awm thin a. Hmai chanve sawi, hmui chet dik lo, tawng bahlah emaw tawngvai ang deuh te, ban chet mumal thei lo, kal pai, ang te hi a lo lan chhuah hmasak dan chu a ni fo. Heng zinga engemaw ber hi an neih chuan stroke hi nei hnai tihna a ni thin. Luhai zeuh zeuh i rawn sawi ang hi chu TIA kan tih kha anih duh hmel mah a. Chutiah rualin i BP control a that tho si chuan i mit lam emaw beng lam fel lohna avang te pawh ani thei tho mai.

Pawimawh ta ber chu i BP hi monitor tha la, regular check up nei thin la. Ei leh in lam uluk a pawimawh viau mai a, a bikin mawm leh al ei tlem a, chi lakluh tihtlem a pawimawh hle. Taksa sawizawi tam a pawimawh a, hna nei i nih chuan lirthei a chuan aiin ke te pawhin kal tam thei la, chu chuan BP control a pui tha thei hle bawk. BP sang hian kal (kidney) a khawih buai duh viau mai a, chuvang chuan kum khatah vawi hnih vel chu test (Lipid Profile, Kidney Function Test leh ECG) ti thei la a tha hle. I la ti lo anih chuan ECHO te pawh lo ti tel thei la a tha hle. I damdawi ei lai chu regular takin ei la, a control that loh chuan a dose san emaw damdawi danga thlak te pawh a tul thei bawk ang.