Zawhna: Ka pu, tunlai hri (Covid-19) hi a symptoms anga an rawn sawi zawng zawng hi positive hian a nei vek kher em? Nge ni, a symptoms insawi zinga pakhat a lan hian?

Chhanna: Tun tum hripui leng, Covid-19 zet hi chuan khawvel mi thiamte a tibuai nasain inhnialna pawh a thlen nasa hle mai. A hri kai darh dan chungchang te, a lo lan chhuah dan (symptoms) bakah lang chhuak si lova hri kai te (asymptomatic), heng asymptomatic hian mi dang an kai chhawng thei nge thei lo tih te, a inven dan kawngah te, a enkawlna leh enkawl dan thleng hian vawiin thlengin, “Hei hi a ni ngei e,” han tih fak fak theih a la tam lo hle. Chiang taka kan sawi theih erawh chu, he hri leng hi inkai a awlsam hle a, a inven kawnga fimkhur dan kan inzirtir fo te hi a tangkaiin nunphunga nei hma apiang an him tlang fo a ni.

Covid case awm tawh atanga a natna lang chhuak (symptomatic)-te zinga an insawiselna common ber berte chu – khawsik sang, thawhah, khuh ro/hul, tihrawl na, kawthalo, chauh ngawih ngawih, mit na, lu na, vun vual thut thut leh rim hriatna hloh te hi a ni awm e. Thlasik kan thleng chho dawn a, hritlang len hun lai a nih chhoh dawn avang leh, chuap lam natna nei sa – entirnan asthma neite hi boruak inthlak hun laiah hian thawhah hi a zual duh hle mai. Hritlangte pawh a awm duh hun a ni a, khawsik sang lem lote a ken tel fo avangin Covid vang nge hritlang vang tih pawh thliar thiam a har fo dawn a ni. Chutiang thawhah leh khuh ro emaw, khuh hul te pawh chuap lam natna nei asthma te, allergy vanga chuap lam insawiselna nei thin allergic bronchitis-ah hian Covid vang nge an natna neih sa vang tih thliar pawh a har hle dawn a ni.

Covid hri kai zingah insawiselna dang nei miah lova kawthalo ringawt neite pawh an lo awm ve leh thei bawk. Viral infection (virus kai vanga natna) chi hrang hrangah hian tihrawl kham them thumte hi a awm duh viau mai a. Tin, sinus lam harsatna nei sinusitis kan tih maite hi allergy vanga nei an tam a, hnar ping thut, rim hriatna pawh buai phahte a awm fo mai a, chungte thleng pawh chuan Covid vang a ni nge ni lo thliar a har duh viau dawn a ni. Heng kan sawi bak a lan chhuah dan chi dang dang mak tak takte pawh a la awm bawk. Chung zingah chuan thluak lam a khawih avanga rilru buai ang deuh te, thinrim thut thut te, mental disorder symptoms thenkhat – anxiety, depression, sleep disorder (zan mut that theih loh) te thleng hian a thlen thei a. A thenah chuan lung lam natna zawngte (lungphu buai), thluak vung (encephalitis) te pawh a thlen thei a ni.

Hetiang teh duah a nih vang hian insawiselna nei damdawi in pan ngai te, doctor te clinic pan ngaite pawh kan fimkhur a tul hle mai. Doctor lamte pawhin khawsik reng reng chu a chhan eng pawh nise Covid a ni lo tih chian hmasak kan duh fo thin. Awlsam taka in-test theihna hmun remchang nei tam thei ila chu a tangkai zual khawp ang. Doctor emaw, damdawi in emaw pantute pawhin hei hi kan hriat a pawimawh hle mai. Engmah zep lovin screening-naah te kan chinchang fiah fel taka sawi thei tura inbuatsaih lawk a tul tihna a ni. Kai theihna chance ka nei em? Covid positive emaw, rinhlelh emaw bulah ka lo awm hnai/inkawm/titi tawh em? Quarantine lai ka ni em? tih te hi kim taka kan sawi lawk theih a pawimawh. A chhan pawh kan doctor-ten an kai hlauh chuan mi dang tam tak inentir duh tan kawng kan tihpinsak tihna a ni.

TV discussion-ah te kan rawn sawi tawh angin rilru hian taksa a kaihruai nasa thei hle a. Lockdown avang te, hna thawh mumal theih loh te, kan thalai rual tha za pawn chhuak thei lo leh insawizawi thei lo te, nu leh pa ei zawnna buai avanga rilru hah te hian stress a siam nasa thei a. Chu chuan rilru lam harsatna, a bikin Anxiety Disorder a thlen duh hle. Naupang lamah pawh a awm fo mai bawk. Heng mental disorder avang hian Covid symptoms nei tlata inhriatna te a thlen thei. Rilru lam buai hian thawhahte hi a thlen duh em em mai bawk a. Chuvangin, chhungkuaa kan tan rual a, kan inngaihsak tlan a, intihhlim dan kawng pawh kan dap hram hram a pawimawh hle a ni.

Engpawhnise, engchen nge he hri leng hian min chenchilh dawn hre lo mah ila, dawhthei takin nung ila, fimkhur zual sauh sauh ila, a invenna kan sawi fo – mask hman regular, kut silfai ngun te leh, tul lova pawn chhuah loh, thenawmte tlawh mai mai loh te, puipunna a tel loh hi i chhunzawm zel ang u.