Kum a lo tam hian kan that lai huna kan tih theih tam tak kan ti thei lo fo a, hei bakah hian a hmaa kan hriat ngai lem loh insawiselna neuh neuh pawh kan nei thar fo thin. Mahse kan hnam zia ah hian upat lama insawiselna tam tak hi “Tar Hri” tih mai kan ching a, tam tak chu a nih theihna lai awm mahse a ni vek kher lo va, chu mai ni lovin heng insawiselna neuh neuhte hi chik a pawimawh a, a phenah natna eng emaw tam tak a inphum thei a ni. Kum 70 ral kai tawh hrisel taka an la khawsa hmuh hi chuan Pathian malsawmna an va dawng bik tak em! Mit insawiselna: Kum 40 pelh hnu hian feet 2 aia hnai thil hmuh fiah hi a har tial tial niin mithiamte chuan an sawi a. Kum a lo tam telh telh hian a hriat tawlh tawlh bawk. Chu chu Presbyopia tiin kan sawi a, lehkha chhiar na bik tarmit a ngai thin a ni. Hei aia buaithlak zawk; mahse, enkawl dam theih si chu Cataract hi a ni. Mit naute a enlenna (Lens) hi a lo chang a, eng lut tur a tibuai thin. Kum upa zual deuhah hian a awm duh a, chhungte’n kan lo chikpui loh chuan Tar Hri angah kan ngai fo. Hei hi a zai dam theih a, kum 60 pelh tawh chinah phei chuan mit check up hi kum tin neih theih nise a tha hle. Ri hriatna lam harsatna (Hearing Loss): A bikin kum tamah chuan ri ki sang (high frequency) hriatna a tlahniam a, hmeichhia leh naupang aw te hriat a har zual thin. Hei hi Presbyacusis an ti a. Beng chhunga ruh no tereuhte te a lo khawng tial tial vang te a ni bawk. Beng kiu an neih erawh chuan entir vat ni thei se a tha hle. Pumpui lawng: Kum a lo tam hian pumpui lawng (Gastritis/Ulcer) hi a awm duh zual a, pumpui a acid insiam chaw kawnga irh chho (Acid Reflux Disease) hi a common leh zual. Antacid an ei tam phah a, ek buai phah pawh an awm fo. Kum a lo tam hian stress a tam ve tial tial a, chu chuan loh theih lohin heng harsatna hi a lo thlen ve thin a ni. Kan ramah phei chuan pum/chaw kawng cancer hi kan tam a; chuvangin, kum 40 pelh hnuah phei chuan kum tin Endoscopy hmanga in-checkup theih nise a tha hle. Kum tam lamah hian an taksa a chet tlem vangin an chaw kawng leh rilte a lo che muang zual a, antacid ei nasat hian ek a tikhal duh zual hle a, Constipation harsatna nei hi an tam viau. A nazawnga ei loh theih nise, insawiselna a nasat zual chuan doctor-te rawn hma a tha ang. Ruh chuktuah na/sil (Joint Pain): Arthritis tia kan sawi mai thin hi ruh chuktuah lam fel lohna a ni a, kum a lo tam hian a tinaltu tuiril bakah a kara thamtu a lo ral ve tial tial thin a, ruh leh ruh kha direct takin a innawk ta thin a, chu chuan na a siam a, a tivung bawk thin a ni. Kum 65 hnu lamah phei chuan Osteoarthritis natna hi a common lehzual. Chet a tinuam lo va, ni tin khawsak harsat a thlen fo bawk. Chutih rual chuan upat vanga neih kher tur tihna a ni chuang lo va, taksa sawizawi uluk te, chhuk chho kal tlem te, rit chawi loh te hi a invenna pawimawh tak a ni. Ruh chuktuah vung a awm chuan doctor-te entir ngei nise. Zun kawng lam insawiselna: Mipaah chuan kan phing hnuaia thal chi khat, Prostate Gland hi a thang thin a, a len zual chuan phing atanga zun chhuahna pipe Urethra a nek zim a, chu chuan zun harsatna a thlen thin. An zun a chhuak ngun a, zung zo thei lo anga inhriatna te, zung tur chuan san vak vak te a ngai thin. Insawisel miah lova Prostate liante pawh an awm tho bawk. Enkawl a ngai thin a ni. Zai lova tih dam theih pawh a awm fo. Hmeichhe lamah chuan serh chhung sawng (Vaginal Atrophy) hi thi hul hnuah an nei duh a, chu chuan an zun chhuahna Urethra kha a va khawih buai thei a, zun chhuak sek leh zung zo lo anga inhriatna te, zun farfep te an nei duh. Hmeichhe fa nei tamah phei chuan phing atanga zun chhuahna control-tu Bladder Sphincter buai a awm fo bawk. Enkawl theih a ni. Tisa châkna tlahniam: Upat vanga sex hi hmang tawh lo tura ngaihna te a awm fo thin. Hrisel thaah chuan kum 70 pelhah pawh hlim takin an la hmang thei. Chutih rual chuan hman châkna Sex Drive tlahniam erawh a awm fo. Hmeichhiaah phei chuan thi hul vanga serh tuihnang tlem emaw ro te a thlen a, chu chuan sex hman châk lohna a siam fo. Harsatna nei kan awm chuan doctor-te rawn a tha; enkawl theih a ni fo. Hmai chuar/zur leh Hmul to dan dik lo: Hmai chuar hi chu protein tlakchham tial tial vanga vun pawt martu tha tlemin a thlen a ni a. Vun a lo pan tial tial bawk a; chuvangin, kum upatin a rawn hrin a tih theih ang. Nalh duh vangin thenkhat chuan hmaichuar venna facial exercise te an ching a, a tangkai lem lo. Pawimawh zawk chu tui in tam, zan mut that, meizial zuk loh, zu in loh te leh, pawn chhuah dawn a sunscreen lotion hman uluk te hi a ni. Hmul bikah chuan sam a tla/tlem tan a, hmeichhiain an hmui velah an nei duh a, mipain hnar leh beng hmul an ngah duh thung. Hormones rawn thlen a nih vangin tih danglam vak theih ani lo thung. Mut (Sleep): Kum a tam hian mut mamawh tlem tial tial tur angin kan hre thin a, mihringin mut kan mamawh zat hi kan dam chhungin a inthlak lo niin mi thiamte chuan an sawi. Chutih rual chuan kum a lo tam hian muthilh mai harsat te, taksa hahdam taka mut hunbi (sound sleep) tlem te, zan lama harh thut thut te a awm tam hret hret fo. Upa in mut harsat an sawi fo chuan Depression vang a ni thei a, doctor-te entir thuai a tha hle. Rilru lam: Kan thluak hi kum 20 pelh hnu atangin a sawng hret hret tan a, thisen kal pawh a tlem tial tial thin. Kan hriat reng theihna Memory pawh a tlahniam tial tial niin an sawi a, haihawt pawh hi chumi vang te pawh ani duh viau. Amaherawhchu, thil awmzia hriatna leh khawsak phung hriatna erawh a tlahniam kher lo. Chahbi tih bo fo hi a normal a, chahbi hmanna tur theihnghilh erawh a normal lo tiin an sawi thin. Chutianga kan awm chuan Dementia/Alzheimer natna kan nei tan te pawh ani thei e; in-check-up thuai a tha.