Zawhna: Pa kum 55 mi ka ni a. Thawhah ka nei a, ka kawng kal hi ka hahin ka thaw seng lo a, ka zan mu hi ka thaw ri tiap tiap thin. Ka hrawk hi khakin a hnawh vangin a hnawk thin a, khak ka chhakchhuah that chuan ka clear duak thin; mahse a hnu rei vaklo ah a lo awm leh mai thin. Khak insiam tur venna leh chhakchhuah that theihna tur damdawi min hrilh thei em?

Chhanna: I insawi dan atang hian chuap lam natna Chronic Obstructive Pulmonary Disease (COPD) engemaw ber i nei anih hmel a (Emphysema leh Chronic Bronchitis tih te hi kan hriat lar ani mahna), anih loh pawhin thawhah tia kan sawi mai thin Bronchial Asthma i nei a ni thei bawk. Heng chuap natna te hi an benvawn duh viau a, tin, a tihdam mai theih loh a, chuvangin a zual zel tur ven hi a enkawl dan chu ani ber awm e. Doctor te i la inentir lo nge ni i sawi hranpa lova, i lo entir tawh anih chuan i natna hi eng ber nge tih te pawh an hriat tawh a rinawm.

Kan thawkna dawt, hrawk atanga chuap chhung a insemdarh te hi a lining hian a nal nan tuihnang an siam ve reng a, chu chu hrisel tha pangngai ah chuan amahin a in clear ve mai a, kan khuh (cough) hian chutiang tuihnang inkhawl deuh te chu khak angin kan khuh chhuak ve thin bawk. Khuh (cough) hi chi hnih in kan then deuh ber a, khuh hnawk (productive cough) leh khuh ro/hul (non-productive cough) tiin kan sawi thin. Khuh hnawk hi chu thawkna dawt ti buai thei infection emaw allergic reaction vanga tui-hnang insiam khal in a hnawh thin vanga chumi khuh chhuak tura khuh chu ani a, khuh ro/hul hi chu a tlangpuiin thawkna dawt irritation vanga awm a ni thin.

Khuh damdawi ah pawh hian khuh hnawk leh khuh ro atana hman tur a hrang a awm a, khuh hnawk atan hi chuan thawkna dawt ti zau thei (bronchodilator) te leh tuihnang khal (mucus) ti nem thei (mucolytic) inchawhpawlh hi an hman thin tlangpui chu a ni a. Khuh ro ah erawh chuan khami irritation ti nep/bo turin allergy damdawi te ani tlangpui bawk. Heng damdawi thenkhat te hian lungphu a ti rang thei a, chuvangin lung tha lo nei ah te chuan hman mai mai loh tur a ni. Tin, allergy damdawi telna ho hian mut a ti chhuak duh a, chuvangin chutiang damdawi ei lai chuan lirthei khalh loh a him bawk.

I insawisel dan atang hian doctor i rawn tawh anih ka ring deuh a, inhaler an chawh che em i sawi tel lova. Heng inhaler te hi chi hrang tam tak a awm a, chuap dawt ti kau chi te, allergy control thei chi te an ni bawk. Nebulizer kan hriat common tak hi a awmzia chu chung thawkna dawt ti zau thei damdawi te chu khawl hmangin a hu (mist) ah an siam a, chumi chu an hip luh tir thin (tuiso hu hip luh ang hi a ni ber). Engpawhnise, i nat dan/chhan tak hriat a tha hle mai a, X-Ray te pawh tih a tul ka ring a, I kum ngaihtuahin lung lam check (cardiology) te pawh i mamawh a rinawm viau. Chest Medicine lam thiam tak tak an awm tawh a, lo in check tir phawt la a tha hle mai.