Hmeichhia chuan an hmeichhe nihphung ah thi "Menstruation" an nei a, chu chu an taksa a hormones vanga lo awm ani a. Thi neih hi hnawk leh ninawm chang awm mahse an hmeichhe nihna ti kimtu, naupai thei an ni tih lan tirtu, an hmeichhe taksa bung hrang hrang vawngtu, hnute tui thlenga buatsaihtu ani a, a pawimawh em em mai a ni. Chuvang tak chuan thi nei thei lo te, thi nei mumal lo te, thi hul te hian harsatna chi hrang hrang a thlen thei a. Thi hul hi hmeichhe nih dan phung, an kum a lo tam a, fa neih hun an lo pelh tawh hnu a an taksa inbuatsaihna hmanrua pakhat ani kan ti leh thei awm e. Thi hul hun aia tlaia hmeichhia in thi a la neih reng hian harsatna hrang hrang an tawk thei a, a hul hma lutuk in harsatna an nei thei bawk. Dan naran in kum 45-50 hi thi hul hun pangngai anga ngaih a ni. Kum 40 hma emaw kum 55 hnu lama thi a hul chuan engmaw fel lohna a awm theih avangin in check up a tha hle. Hmeichhia chu an chi bawm "Ovary" ah chi a lo tlem tial tial a, chu chuan an hormones bik "Estrogen leh Progesterone" a lo siam tlem tial tial khan an chhul chhung bang a lo pan tial tial a, an thi a lo hul chhunzawm ta mai thin a ni. Thenkhat thung chu thi hul zet tawh hnua nei leh lailawk te an awm fo bawk. Hetiang hi normal process ni tho mahse engemaw chhul lam fel lo a awm leh awm loh in check chian erawh a tha viau. Thi a lo hul chuan an chhul pawh a lo sawng te tial tial bawk a, an chi bawm pawh chi insiam tur a awm loh chuan a sawng ve chhunzawm mai thin bawk. Kan tarlan tak angin thi neih hi hormones piah lamah thluak lam function nen a inzawm thuk em em mai a, chuvangin thi hul tur hi mi thenkhat chuan an la na a, depression nasa tak te a thlen thei a. Sense hrang hrang, rim hriatna te, thil tui leh tui lo tih zawng inthlak danglam te a thlen thei bawk a, rilru put hmang inthlak thut thut "Mood Swings" te pawh a thlen duh hle bawk. Thenkhat chu an pasalte haw tlat te an awm bawk a, dawh thiam an ngai hle. Rilru buai te pawh a thlen hial thei a, a nasat phei chuan psychiatrist in entir te hial pawh a tul thei. A dang leh ah chuan thi a lo hul hian an taksa ah calcium insiam leh vir vel a ti buai a, ruh ah calcium tlakchhamna a thlen a, chu chuan ruh mawih "Osteroposis" a thlen thei a, thenkhat phei chu ho te te ah ruh ti tliak an awm fo a ni. Chutiang avang chuan hmeichhe thi hul chu calcium supplements te an chawh thin reng a ni. Thluak lam a khawih buai kan tih avang khan zan mut theih loh te, peripheral neuropathy (nerve chak lo/fel lo) vanga ke sa vak va te, chaw ei tui lo te pawh a thlen fo bawk. Hormones tlakchham vanga thleng anih vang hian Hormone Replacement Therapy (HRT) a enkawl te pawh an ngai fo thin. A dang leh ah chuan an serh chhung a lo ti ro a, tuihnang a tlem a, sex hman nawm lohna te a thlen a, thenkhat chu an pasal te nen an inti thiam lo fo thin a ni. Chu mai bakah chuan lung lam fel lohna Heart Disease te pawh an nei duh viau mai a, heart check up te pawh neih a tha hle. Thyroid lam fel lo hi hormones lam thil bawk ani fo a, thi hul ah te hian a awm duh zual hle. Chuvangin thi hul insawiselna nei nasa deuh te chu health check up kimchang tak neih ni thei se, harsatna thleng thei lakah an him zual phah dawn a ni.