(‘Thianpa, hei hi eng nge? Khawia mi nge?’ ka ti chùl a. Eng mah sawi lo chuan ngawi rengin chü sai-ip bag chu a hláng thla nawlh a. ‘1 – 2 – 3’ tiin amah zàwnpui tùrin a mit mengin min hrilh. Kan inah chuan ka zäwn lût ta a ni … tihah kan tàwp a nih kha)

Mi fel Fela 

Ka thianpa Fela nèn hian High sikul kan kal lai atanga inkàwm tan kan ni a; unau ang maia inkàwm ngeih kan ni. Kei, pianpui unau dang nei lo leh ani, an unaua mipa awmchhun ni bawk chuan thian dang kan ngai meuh lo. B Com kan zir zawh hnuah sumdàwnna bul kan tan ve ve a. Ani’n motor spare parts lam a buaipui a; keiin, ka sawi tawh ang khán ei chawp leh thawmhnaw lam ka buaipui kha a ni a. 

Kei chu ka hausa tawh hle mai a. Mizoram district tin deuhthawah ram ka nei diai duai a. Thawmhnaw company lian leh lâr tak tak showroom hawngin thawktu mi eng emaw zât ka ruai ta. Ka thianpa ve thung chuan hausak a tum ve hran lo a, a ngai rengin a la awm. Ei khawp hlépah a lungawi mai a, a inla lian thúr thúr ve lo.

Mi tù paw’n ka thiana hi chu an ring ngam a; kohhran inkhâwmnaah lám duai duaiin thu sawi vak vak kher lo mah se la, mi piang thar dik tak hmuhin an hmu a. A pa Kohhran Upa a nih avànga Upaa thlan ve inbeisei kher mî a ni lo a; kohhran thalai páwl leh an véng YMA leh thiltihna lamah pawh a mawi tâwka inhman a duhtâwk mai a. An sàwm avànga hruaitu ni ve châkna lah a nei ngai lo. Chuti chung chuan an kohhran member leh an véng mîten, mi dik leh mi tha hmuhin an hmu vek thung. A nupui felzia leh an nupa hmuhnawmzia te, fa enkawl kawnga nupa entawn tlâk an nihzia chu anmahni hre chiangte hrilh fâk a ni. 

Ka sum thuh rûkna tùr vànin … leh, amah tanpuina ni pah fàwmin, khaw chhak leh vai ram lama ka thawhpuite chu a account-a pawisa rawn thun tùrin ka ti ve thìn. Chuta Fela chan awmchhun chu, SMS-a pawisa lût lo lût zât lo chhiar chauh chu a ni! Chûng a sum dawn zawng zawng chuan, an pindan chhúng ril chhuara an sum báwm chu sawi loh, a wallet takngial pawh an thleng pha ngai lo a lo ni a!

Fela thil ken

Thaw hlawi hlawia thut pindana kan thut fel rual chuan Fela chu choka lamah a phei a. Fridge-a tui vawt bottle leh chemte va lain tui chu a in khawlh khawlh a. Kei chuan ngawi rengin ka lo thlír ringawt a.

Muang fán zet hian, ‘Kum sarih dáwn a ni ta a, a pung pawh a tam tawh khawp a nia,’ a ti ringawt.

‘Eng chu!? Sawi chiang teh. Eng thil nge i rawn ken hi? Ka hawng…’

Fela chuan ka thu sawi lai chu pawtchatin, ‘Thianpa, lawk,’ tiin ka ding hluai chu min rawn kuah a. A rucksack atang chuan bank hran pahniha a pass book-te chu phawrhin min pe a. Kei chu ka hawi ä ho mai!

‘Engati nge min pêk lêt leh i tum? I chan ve tùr … ih … i tána ka tih ve theih tâwk…’ ka sawi zo hman lo leh.

‘Ka dawng thei lo a ni, thianpa. Min hre thiam mai teh. Ka hminga a awm hi tha ka ti tawh tlat lo bawk. Ka nun hlimna leh ka zalennate hi, sum leh paia hralh ka phal thei lo! Chhúngkuaa kan neih ang ang hlimpuia kan lungawina hi kan duhtâwk a ni. Hêng hi, i thawh chhuah, i sum a ni a, i tä tùr a ni e,’ tiin Fela chuan sai-ip chu a hawng a.

Sai-ip chhúngah chuan suitcase a lo awm a. Suitcase a ni tih thup nán a ti nge ni, thil chi hrang hrangin suitcase chu a tuam vak mai a ni. Chü suitcase chhúng chu chéng zanga tlang hlïrin a lo khat vek mai!

‘A va mak ve aw … thianpa,’ ka ti vawng vawng ringawt! 

Hnuai lam ka bih reng a; sawi theih leh sawi tùr ka hre ta lo a ni lo a, sawi tùr pakhat mah ka nei lo a ni zâwk!

Ka mi rin ber mai, kum kha leh chen ka sum chheprelh nána a bank account min hmantírtu, ka thianpa Fela hian a account-a “sum thianghlim lo” awm zawng zawng chu la chhuakin ka kutah min rawn hlàn a; a hminga account ka siamsak pawh ti tàwp (closed)-in ka kutah pass book pawh min rawn hlàn thlap a nih hi! Ka thiana hian ka pawisa chéng khat pawi a ei eih lo!

Pass book en pah chuan, ‘Thianpa … engati nge … chéng khat pawh i tán i lâk…?’

‘Kan ni tin ei khawp bâk sum kan mamawh lo, ka tih thin kha. Chu bâk chu Pathian hnênah pawh kan díl ngai lo. Kan thawh chhuahin a lei phâk bâk mamawh neih kan duh hek lo. Chu chu kan pí leh púte atang tawha kan chhúngkaw inzirtírna pawh a ni a; kei hi a bawh chhetuah ka tang thei lo a ni.’

‘Mahse … kawl chi ka…’

‘Thil dang a awm lo. I duh leh i Mél-hla ramah te, hmun hrang hranga i huanahte chheprelh la… I duh leh, TV show te siam leh la. A nih loha leh, damdawi in hrang hranga dam lo bill pe thei lote tanpui nán damdawi in neitute hnênah te pe la… I thu thu a ni tawh e.’

Ka thianpa Fela hnênah hêng sum fai zawng zawng hi pêk lêt leh chî rual a ni lul lo tih ka hre chiang. Mahse, a chhe ber pawh lo thleng palh ta ila, amah hi a him kher ang em? Chu chu ka hre lo!

Hla chu

Ka pindan chhúngrila pawisa kan dah fel hnu chuan kan thut pindanah kan lêt leh a. Ngawi rengin Fela chuan kan woofer lian chu a on a. A cell phone-a bluetooth ti nungin woofer nèn chuan a thlun zawm a. Kan tleiràwl chhuah tirha kan kan hla duh êm êm thin—Queen-ho hla, an tingtangpu, Brian  May-a phuah, “Too Much Love Will Kill You” chu a zaitír ta a. He hla hi May-a’n a nupui duh tak leh a hmangaih êm êm thin, Christine Mullen kalsana a bialnu thar leh a nupui hual—lem chan thiam Anita Dobson-i táng a belh hnua a rilru hrehawm leh tâwt lutuk a inbun ruahna hla a ni, tih te pawh kan hre ve vuai vuai a.

‘Thianpa, he hlaa “love” tih hi nang chuan, “sum” tiin ngaithla ang che,’ Fela chuan min ti hmasa të tè a. Cháng khatna a thunawn chu ngawi rengin kan ngaithla a:

I’m just the pieces of the man I used to be/ Too many bitter tears are raining down on me / I’m far away from home/ And I’ve been facing this alone for much too long, oh…

I feel like no one ever told the truth to me / About growing up and what a struggle it would be/ In my tangled state of mind/ I’ve been looking back to find/ Where I went wrong…

Too much love will kill you / If you can’t make up your mind/ Torn between the lover and the love you leave behind/ You’re headed for disaster ’cause you never read the signs/ Too much love will kill you every time…

Ka kun ngaih a. A hla thu ka hre chiang—a phuah chhan nèn lam! Ani chu a hmangaih hmasa a bàn tâk avàngin a rilru a hah ngang mai a. May-a kha ka khawngaih thìn; mahse, vawiinah chuan, kei hi—“mahni zalènna hralhtu” May-a ka ni ve ta! Hêng sum leh pai neitu, engkim teh nána sum hmang ta vek mai, hausak thut thlahlel kei hian, ka hring nun zin kawng ka ti tàwp mék a lo nih hi!

Ka naupan lai, kan retheih laia ka nu’n Bible thu min vawntír thin, Lal Isua Krista thu sawi, “Sum ngah hi mihring dam chhan a ni lo ve,” (Lk 12:15 ) tih te: Zawlnei Isaia’n “Kut tling lova hausa a teh khinna, “Varung mahni tui ni lote awp keu” a tih, “A dam laiin amah an hransan ang a, a tàwpah mi ä a lo ni ang,” a tihte kha ka hre chhuak a.     Chü kan chhúngkaw thuvawn ni thìn chu, tün hnu hian kan chhiar khát ta hle … a ni mai lo a, kan rilru atangin kan delete ta lek lek hial! Chhiar kha tül kan ti vak tawh lo—a zah pawh a zahthlâk! Ni e, hmänlai kan nun, kan “home” kha kan hlat ta hle a nih hi!

Zawi sapin Fela chuan, ‘Mî chuan an hmangaihna hmasa an bàn avàngten lungngaiin an inchïr a. Thianpa, nang ve thung chu i thil neih hlu tak, Pathianin zalenna a pêk che i bosàl avàngin i lungngai ta a nih hi! I insiam thata i sim loh zawngin i la tuar dáwn chauh! I nun hmasa—nun zalèn leh engto nei loa i thawven thinna leh, tüna i buaipui sum i hmangaihna hi—i rilruah an insual mék a—a chak zâwkah i tang lo khawp ang! Ni tin chhiat rupna leh mualphona i hnaih zêl a ni tih inhre teh,’ min ti ta a!

Cháng hnihna a zaitír leh a: ka ngaithla tha peih tawh lo. Mahse, a zai reng tho a:

I’m just the shadow of the man I used to be … / And it seems like there’s no way out of this for me … Too much love will kill you / Just as sure as none at all / It’ll drain the power that’s in you / Make you plead and scream and crawl / And the pain will make you crazy / You’re the victim of your crime … Yeah-yeah, too much love will kill you / It’ll make your life a lie … You’d give your life, you’d sell your soul / But here it comes again, Too much love will kill you… tia Freddy Mercury zai chu ka hria…

A ni, sum neih nán, hausak thut nán ka nun ka hlàn a, ka thlarau hial ka hralh ta! Keimaha theihna leh chakna awm zawng zawng rûksak ka ni zo tawh a, mi ä ang mai ka lo nih tâk hi! Ka chung thu rèlsak ka nih ní chuan, hêng ka thil tihte hi ka hmaah phawrh lan an ni ang—thiam loh min chantír tùrin!