Zawhna: Ka pu, ka pa hi kum 97 mi a ni a, tiang nen a la kal  chhuak ve zeuh zeuh thei a, a vun thak vak vak thin hi a mangang khawp mai a, engtia enkawl tur nge ni ang? Damdawi ei leh hnawih chi te pawh min chawh theih.chuan kan lawm khawp ang.

Chhanna: Kum a tam hian kan vun hi a ti hnawmtu a lo tlem tial tial a, an tui/tuiril lakluh a lo tlem tial tial bawk thin avang te tui tlakchham (dehydration) insawiselna nei em em si lo hian an nei fo thin a. Chutiang avang chuan an vun a lo ro tial tial a (dry skin), thak hi an nei hma duh ta thin a ni. A chhan dang te pawh a awm thei a, taksa chhung lam leh pawnlam inthlak danglam vangin upa te hian vun lam insawiselna an nei duh thin a, chu chu intrinsic and extrinsic ageing tiin an sawi bawk thin.

Intrinsic ageing an tih mai hi chu kum a tam a lo thleng ve hrim hrim, natural process a ni a. Vun timur insiam a lo muang a, vun timur te hi an thi then ve reng a (kan taksa peng hrang hrang ang bawkin), vun tihnawngtu tuihnang siamtu timur (cells) te a lo tlem tial tial bawk a, chu chuan hrik vanga harsatna pawh a thlen duh tial tial a. An taksa natna dotu a lo chak lo tial tial bawk a, vun hnuaia thau awm pawh a lo tlem tial tial bawk (vun chuar te pawh hi chutiang vang chu a ni thin). Vun chawmtu thisen zam lamah chak lo a tam chho a, thisen supply an dawng tlem hret hret bawk thin (chu chuan an taksa lumna vawn kawngah harsatna a siam hma a, khaw vawt leh lum an tuar thei lo zual tial tial bawk thin.

Thlan (sweat) pawh a lo insiam tlem telh telh a, vun hriatna (sense) pawh a lo chau hret hret a, intihkan (burn injury) pawh an awlsam phah fo thin a ni. Pawn nisa vanga Ultraviolet rays (ni zung ti ta mai ila) te pawh an tuar chak tawh lova, khawlai bal/bawlhhlawh leng a lo tam zel bawk avang te pawhin an vun lamah insawiselna an nei hma fo thin a ni. Heng kan han tarlan te hi natural ageing process kan tih, kum tamin a ken tel a ni hlawm.

Chutiang avang chuan upa te hi an vun enkawl uluk a pawimawh hle a. Khaw ro ah vun tihnawm tura moisturiser an hman uluk a pawimawh a, nisa lutuk lakah an vun ven a ngai fo bawk. Hei bakah hian taksa/rilru hahna an neih te, an khawharna te hian anmahni ah delhrittu an sawi mai loh an tawng fo (stress). Zan mut a lo harsa ve tial tial a, ei leh in lamah nise a hma angin an chaw ei leh lakluh a lo tlem hret hret bawk nen, chung te chuan vun lam ageing process hi a thlen hma duh bawk a ni.

A chhan dang leh ah chuan thil huat (allergy) vangin vun thak hi a awm leh duh hle. Kum tam lamah phei chuan a hmaa an huat lem loh huat thar hi an nei fo thin a ni. Thil huat an neih leh neih loh chikpui an ngai fo thin. Bal leh bawlhhlawh te hi an haw hma bik a, chuvangin an awmna hmun hi a thianghlim a pawimawh lehzual. Hrik vanga vun harsatna zingah hian fungal infection hi a common pawl a ni a, hmuar leh thawmhnaw ro tha lo te hi an haw hma bik bawk. 

Damdawi ei lamah hian fimkhur pui an ngai viau bawk. A chhan chu an damdawi ei kha taksa in a mamawh bak chambang hi an taksa atangin a inpaihfai har bik a, chuvang chuan overdose te, an thil dang ei in te nena inhal emaw hua te pawh an nei hma bik a, doctor chawh loh phei chuan nachhawkna mai mai pawh a nazawnga pek mai chi an ni lo thin. Zunthlum leh thisen sang natna nei ah te hian vun lam insawiselna an nei hma hle bawk a, chuvangin a theih phawt chuan thla thum li dan velah te hian an blood sugar leh BP check sak theih te hi a tha hle a ni. 
    
Engpawhnise, kan han sawi tak atang khian pawimawh zual chu an vun enkawl uluk a pawimawh hle tih a hriat anga. Moisturising cream an inhnawih uluk a tul a, nisa lutuk hnuaia pawn chhuah loh emaw nihliap hman tir te a pawimawh bawk. An thawmhnaw a ro that a tul a, dehydration an neih loh nan tui in tam tir a pawimawh viau bawk ang. Natna benvawn engemaw tak a lo nei palh thei a, chuvangin Skin Doctor te enchian tir theih nise a tha hle.