Zawhte hi tapchhakah hian an mu zan zan a, zawi em em hian ni lum hi an ai dawr dawr reng tak asin! An mu tho lah hi an tho them them a, an zi mar ian ian a, zawite hian a kal zan zan a, a tin tat hriam niawm tak hian thingte hi a ham mai mai a. An zawi hmel tehlul nen hian sazu an hmuh thung erawh chuan an che that a, rang em emin an man hman zel lawi si! Mu zen zen niawm taka lang, hrisel bawk si, fit tho bawk si zuk ni tlat a!

Zawhte hi an hrisel phian ni tur a ni. Eveready battery hian an tlo zia fakna niawm takin 9 chhunga zawhte zuang lai lem niawm tak an hman hi! Zawhte hrisel lo tak, zawhte kawchhung na nei ni awm tak, zawhte muhil thei lo, zawhte lungngai, zawhte depression nei hmel hi an vang phian tak asin! A hriselna thuruk hi zir tham a awm hmel tlat.

Zawhte hian hrisel pui tham khawpin mut a hmu tha a niang! Mut that hi kan mamawh reng a ni. Kan mut hlan hian kan taksa a lo hahdam a, rilru a hahdam a, chhun lama taksa inhmang rim chu a lo insiam tha a, a tuk atana chakna kan mamawh a lo insiam belh thin. Puitling hian ni khatah darkar 6 atanga darkar 9 vel mut kan mamawh. Hriselpui tham khawp mut hmuh tur a nih chu! Khua a lo thim hian mut tichhuak thei thil melatonin chu taksaah a lo insiam tam thin. Zana mu tura duan kan nih chu. Mut hun taka kan mamawh tawk theuh mut hi damreina tur a ni.

Tapchhaka zawhte mu hi a va’n mu zawi thiam tehlul! Tang lai eih awm hauh lo hian hahdam leh zawi zawi em em hian a mu zawi der mai a ni. A mut zawi rengna bulah hian tul takin hna thawkin vei suau suau mah ila, an lo che chang ve chuang lo reng reng. Inhau bawrh bawrh pawh ni ila, an lo phili ve hauh lo! Zawhte hian a inrawlh ve lohna tur ah chuan a inrawlh lo reng reng a, a tel ve a tul lohna ah hian a inham buai lo reng reng! A rilru hi a hah mang hauh lo ang!! Hrisel lo chi a ni lo.

Keini chu kan tel ve a tul lohna pawh hi kan ngaihven a, kan inrawlh tul lem lohnaah pawh hian kan tel ve hram a. Chu chuan stress min siam hnem a, min tihah a, pumpui na, lu na, lung tha lo, leh rilru lam harsatna kan neih phah!! Mu chung hian kan chawl chuang lo a, a tuk atan kan lungkham a, kan tang tung mai a, hahdam hunah pawh kan chawl thiam lo tlat! Ral atang hian engkim kan lo ngaihven ve zel a, mi kal mai maite hi kan lo hahpui thei nia! “A incheina chu..a make up chu..a va’n hur hmel..ka pawi a sawi miah lo naa a hmel khu ka ngei zawng tak,” te hi kan lo ti zel a!! Hrisel tlak pawh kan ni lo e!

Zawhte nilum ai hi a nakah han zen ila, han chawi kang ila, a lu lam leh mawng lam hi a uai zawi reng tho e an tia lawm. Tha a thawh ve a tul loh hunah hi chuan a va han hahdam thiam tehlul em! A chawituin a chawi lai khan a lo tan ve a ngai lo a, a dahsawntuin a dahna hmun turah a dah thleng khan a chawitu kha a ring hmiah mai! Hahdam a tul hunah hi chuan mi dang hi a ring thiam em! Lo tan ve a ngaih lohnaah hian a lo hah ve duh lo reng reng!

Keini chu kan tihtheih awm ve miah loah hian kan lo hah ve vak zel. Motor khalhtu ring zo lo niawm takin kan lo invuan bet ve tung mai a. Mi nunahte hian ro va rel ve phet kan tum a. Thihna chunga thunei hauh si lo hian kan thla a lo phang lawk a. Tute khualzin emaw ni, motor chhungah pawh ipte la hnung puak ul thin an sawi ang mai hian hahdam theih hunah pawh kan inring to mai a. Kan nun a hahdam lo a, a hrisel theih loh.

Kan mamawh tawk mut tur a ni. Mut hunah chuan enghelh nei hauh loin mu mai ila. Tha kan thawh a ngaih ve loh hun hi chuan hahdam thiam ve teh ang u. Mahni hna chin chinfel pawh hahthlak a nih laia tul lova kan inham hnawk nasa thin hi chauhpui tham a ni thin.

Zawhte hi a mu mai mai na a, a in-fit tlat si hi!