Luangliam

ZIAKTU CHU CHHIARTU A NI HMASA TUR A NI!

Zirsangkima - Aug 10, 2022

‘Mipui chhiar tùra thu ziaktu chuan, a ziah aia tam lehkha leh chanchinbu a chhiar nasa zâwk tùr a ni,’ tih hi, ka hnár hnuaia ka hnapthlêng a awm tih ka rin ang leh Pathianin Mosia hnêna thu sâwm pêk (JF-a ngaih dàn takin ‘thupêk sàwm’) ka awih tluk zeta ka awih, ka din kumkhuana tùr a ni. Ziaktu chu chhiartu a ni hmasa tùr a ni, ka tihna a nih ber chu. 

‘Mipui chhiar tùra thu ziaktu chuan, a ziah aia tam lehkha leh chanchinbu a chhiar nasa zâwk tùr a ni,’ tih hi, ka hnár hnuaia ka hnapthlêng a awm tih ka rin ang leh Pathianin Mosia hnêna thu sâwm pêk (JF-a ngaih dàn takin ‘thupêk sàwm’) ka awih tluk zeta ka awih, ka din kumkhuana tùr a ni. Ziaktu chu chhiartu a ni hmasa tùr a ni, ka tihna a nih ber chu. 

Phuahchawp thu (fiction) ziaktu zíngah te, thawnthu phuahchawp hlang (novel) ziaktu zíngah pawh, lehkha chhiar zau leh chhiar tam chu an kut chhuakah a hriat tlat thin. Khawvêl hian kin ni a hmuh hma zawnga ‘novelist ropui’ tia a chhàl tawh tùr Jane Austen (1775–1817) te kha lehkhabu chhiar taima a ni. A lehkhabu ngainat ber pawh, volume sarih zet, a pian hma daih 1754-a chhuah, ‘The History of Sir Charles Grandison’ Samuel Richardson-a epistolary novel kha a ni. William Cowpera poetry te kha a ngaina ngiang mai a… 

Chuti chuan, lehkhabu ropui paruk a ziak thei a. Sawi vek sèn mah ni suh se la, ‘Pride and Prejudice’, ‘Emma’, ‘Sense and Sensibility’ te hi chu sawi loh an har—chuai thei tawh ngai lo tùr lehkhabu an ni miau a! 

‘I sawi hmanlai êm mai!’ min ti a nih chuan vawiina ziaktu hausa ber, ‘Harry Potter’ ziaktu JK Rowling lehkhabu ngainat ber leh a chhiar tam ber chu, Jane Austin-i ‘Emma’ tho hi zu nia! Pi Rowling-i hian, Harry Potter a ziah hma daih, naupang tê a nih lai atang tawh rêngin, 1968 kuma naupang thawnthu, Paul Gallico ziah, epic narrative novel, ‘Manxmouse: The Mouse Who Knew No Fear’ te kha a lo tuipui daih tawh a. Anna Sewelli 1877 novel ‘Black Beauty’ te, 26 June 1997-a ‘Harry Potter and the Philosopher's Stone’ a’n tih chhuah hnu fé, 2005-a Pulitzer Prize dawng pha ngat lehkhabu, Doris Kearns Goodwin ‘Team of Rivals’ kha a la tuipui reng thei nia—khawvêla ziaktu hausa ber hian! 

Sawi zêl dáwn chuan sawi tur a ting an khat hmer hmur mai dáwn si a. Entir nán mai, a taka tawngtute hming kan han lam ri mai a ni. 

Hetih rual hian, hei hi hriat a tha ngawt mai: hêng ziak mi leh chhiar mite hian an thil chhiar ang hi, a tùnlai tawng takin, an ‘copy pase’ ve ngawt lo! An ‘plagiarize’ ve lo. An suangtuahna (imagination) ti zautu atán te, a changtu leh an nihna (characterization) zir nán te, thil awm dàn leh thil thlen dàn (situation) te leh thil tam tak zir nán an lehkhabu chhiarte hi an lo chhawr tangkai thin zâwk a ni. 

Hlahril (poetry) ziaktu (phuah aiah ziak ka ti zâwk ang e!) poet zíngah pawh, poetry dang chhiar thang chu an lo hriat leh tho thin. English poetry ti hausatu pahnih—Robert Browning leh Elizabeth Barrett te khân poetry hmangin an inhmangaihna mei-ling de vê vê chu meipui-ah an chantíri mup mup mai a. Kum 1844-a Elizabeth-i poems dahkhâwmna bu an tih chhuah, a aia kum 6-a nuapang Robert-a’n a lo hmuha January 10, 1845- a Elizabeth-i hnêna lehkha a thawn, “I love your verses with all my heart … and I love you, too,” tih thu tê khân an khawvêl a her danglam bâwih a ni tih hre loa lo inlâk poet ve chiam hi a fuh ber ang em le aw, ka ti fo mai!

A … thlang Sâppui ziaktu chanchin kan sawi tam dâwn e; kan khua paw’n hetiang mi hi kan ngah ve alãwm maw‘n le!

Kan thiampuipa JF Laldailova kha kum 10 mi âwrh a nihin Zoram chhuahsanin vai ramah lehkha a zir—páwl 8 thleng. Chutih chhúng chuan English novel, saptawng un leh khun pui pui a tuipui tawh a. Kum naupang tê khân William Shakespearea thu leh hla ulh leh un tak tak kha a tuipui hle tawh a ni. Mahse, chhuti-a Zorama a lo hàw meuh chuan Mizo tawng a ‘mik-a-mak’ pawh a hre tawh lo hial! A hnuah vai ramah kum 25 mi a nih thleng a awm leh. Mizo tawng thiam chu a har khawp ang le! Mahse, a inzir tha leh a, tar leh thalai, naupang inkhualtelem-ho bulah a tâp tam a … a hnuah tunge a ni tih kan hre vek …sawi zui a ngai lo’ng e! 

Kan ziaktu hmasa: C. Thuamluaia, L Biakliana, Zikpuii Pa, Thanpuii Pa leh mi dang dangte khan kan hnam rohlu lehkhabu ziak tùr khan lehkhabu eng zât tak chhiar hmasa ang maw? 80s-90s chhoa Mizo thalaite tuipui, Cowboy bu—‘Sudden’ te leh ‘Wild Bill Hickok’ te leh a dang dang min hluitu Pu Sangliana lehkha chhiar nasat tùrzia te kha! An chhiar hmasa fé a, an ziak ve chauh zâwk thin a lo ni! 

Tûn hnai i’n sawi leh teh ang. Ka mi ngaih sàn êm êm, Book of the Year tum hnih dawng thei C Lalnunchanga chanchin hi. Tawng mawi lo leh a huat thu ni lul suh se la, keini thangthar MA Mizo/English zir chhuakte angin ani chuan zirna sáng a kai pha ve hauh lo! Mahse, a lehkhabu, ‘Pasalthate Ni Hnuhnung’ leh ‘Ka Mi Huaisen leh Ka Pasalthate’ chauh pawh kha chhiar la; a Mizotawng hman i hriat thiam loh kha pen tui senin han thai zêl teh! Phêk tin chu a sen ráng rei ruai ang! A inchhiar nasa a; mi a kàwm tam a ni mai. 

Sawi hmaih phal loh chu Mafaa a ni. Ani pawh a ziah aia a chhiara hun hmang tam zâwk a nihzia a kut chhuakah a lang. ‘Engati nge mite hian Mafaa kut chhuak hi heti teh fakauha an ngainata an lawma an entawn?’ kan tih chuan, ani chuan, essay a ni emaw thawnthu tawi a ni emaw—a kár lakah—a hmeh rem tùr thu, a lehkhabu lo chhiar tawha mi a zep fuh chaih chaih thei zêl a ni—a tawngkauchheh thiamna chu thuhran ni se. Ka û leh ka thianpa a nih angin ani aia Mizo ziaktu zínga lehkhabu chhiar tam leh ngaina hi, ka dam rualpui zíngah ka la hre mang mang lo!

Kan politician zíngah hian, (min lo politicise sak lo hrãm ula) ngaih sàn deuh mai ka nei—tùna Mizoram Pradesh Congress Committee-a an President ni ta Pu Lalsâwta hi. Kumina ‘That Loh Theih Lohna Bâwm’ ti chhuaktu kha. Pu Sâwta hi politician a nihna angin ka sawi lo; a lehkha chhiar peihna leh a thil chhinchhiah peihna hi kan legislator-te hian entawn teh u khai. Ani chuan ni tin chanchinbu a vawn that peih chu thuhran ni se, tùl leh chhinchhiah ngai a tih chu a chep thla a, a note buah a tár zêl thin zu nia—ani kum ang tawhah! 

F Vanlalrochana te, HC Vanlalruata te, Lalhruaitluanga Chawngte thuziakte hi chhiar satliah loin chîk teh. An lunglèn thu an ràkpui satliah lo a; anni chuan a taka an tawn te, an lehkhabu/chanchinbu chhiar atanga an hriat leh chhinchhiah atang ten a ni, thu an ziah thin ni. Chûng thu ziak chuan belhchian a dâwl nge nge thin. 

A tâwp lam i’n hnaih tawh te’ng: Indian ziaktu chhuanawm leh chhuanvàwr Khushwant Singh hmang hian hmáwr bàwk ka duh. Ani pawh hian a ziak ngawt lo; a ziah aiin a lehkhabu chhiar a tam zâwk daih, tih te hi, Zofa ziaktu chawrnote hian hre teh ang u. Amah hi fictional writer a nih angin, ‘Non- fiction ai chuan fiction lam hi ka chhiar nasa zâwk,’ a ti. Lehkhabu paruk a pum tawh chungin, an interview-na pakhat ka chhiarah chuan, fiamthu ti tak deuh hian, ‘Ka laptop-ah hian sawmruk leh a chanve vêl tih chhuah loh a la awm!’ zu ti a! ‘

A nih leh Pu Singh, lehkhabu emaw magazine emaw website emaw chhiar atana tha bîk min hrilh thei em?’ tia zawhna a dawn chu, Khushwant Singh-a chuan, ‘Ka hre bik lo … tak tak! Nangmah awmtlei theitu ber, thuziak tha, belhchiandâwl nia i hriat chhiar la tha berin ka hria,’ tiin a chháng. 

Tlipna: Ziaktu hlawhtling ni tùr chuan a chhiar lam kan taimâk a ngai takzet zet. An thuziak entawn dîk diak tùrin ka tihna a ni lul lo a; ngaihtuahna leh suangtuahna thar kan neih theih nân lehkhabu chhiar hi i uar zêl ang u. Ziak mi lo mahin lehkhabu chhiar an peih phawt chuan, a ziak mi chuan a lêh-lí-a tam lehkhabu chhiar hi a bat, a tih mâkmawh a ni dáwn lo’m ni?

Share now