Inhnial luai luaina karah sawrkarin kan ram dinhmun atana a tha ber tur nia an hriat danin zu chungchangah dan thar an siam tar up mai a. Lawm an awm ang a, lawm lo an awm ang. Tan lam nei miah loin zu chungchanga thudik kan titi pui ve mai mai teh ang. Zu hi damdawi atana hmanna awm ve bawk mahse a tam lo khawp mai a. Tu ten emaw damdawi atana mamawh intia daktawr lehkha nena han kawl rupna tur natna hi a vang khawp! Pu Tlawmlova’n mi pakhat zu chungchang sawi dan min hrilh hian hengho zu kawl chhan hi a sawifiah tawk viau. “Zu hi tui ka ti pawh a ni lo, ka mamawh em em pawh a ni lo, a thawh dante hi ka duh reuh em a ni,” zuk ti a! Zu tha leh tha lo a awm. Zu tha chi tia kan sawi mai, mihring in theiha siam ‘ethyl alcohol’ ah pawh hian a quality hniam deuh leh sang deuh, man tlawm deuh leh to deuhte a awm. A fir dan azirin a thliar hran theih naa, in tam leh in rei chuan mihring taksa tichhe thei leh nun zawng zawng tibuai tham an ni vek. Zu tha chi hian lu chhip atanga ke ler thlengin taksaah ngawng tha lo a nei vek a ni mai. Thluak timur (cell) a tichhia a, hriatreng theihna a tichhia a, rilru kim lohna te, atna te leh kaihte a thlen a. Chaw dawt leh pumpuiah lawng leh pan a siam a, pum na, luak chhuak leh thia luak thlengin a thlen a, Ka atanga pumpui inkar khawi laiah pawh cancer a thlen thei. Thinah thau a chhek khawl a, thin a lian a, a vung a, a hnathawh a buai a. Mitliam nasa tak leh pum puar a thlen a. A tawpah chuan thin sawng leh thin ro a thlen thin. Chuap a tichak lo a, Awmna chi hrang hrang – Pneumonia te, TB te a kaichhuak thei a, chu chuan chuapa tui tlingte a siam leh zel a. Thawk a tibuai vak thei bawk. Lung tihrawl a tichak lova, lung na a thlen a. BP a tibuai a, lunga thisen kal a tibuai a. Heart Attack a thlen thei. Hriatna thazam a khawih chhia a. Kut ke mu churh churh te, chawmawlh te, kut ke hmawr na te a siam a, kal that theih lohna a thlen fo. Sex ah harsatna a thlen a. Mipaah chuan tilmu a tisawng a, chi a titlem a, tisa chakna a tihniam a, mipat theih lohna a thlen thei. Mipa hnute te a tium a, hmul a titla kawlh thei bawk. Hmeichhiaah chuan chi a tibo a, thi a tihul hma. Chinna a thlen thei a ni.Tihrawl a tichhia a, tha chak lohna a thlen a. Vitamin tlakchhamna a thlen. Chu chuan rilru kim lohna te, hriatrengna tha lo te, mit chhiatna te leh vun natna a thlen thei.Taksa bung hrang hrangah Cancer a ti tam.Thisen zam a tihlen avangin hnar tawk hler hlur te, awm bawrah sen tiak tuak te a siam. Kawchhung lam thisen zam a tipan a, a puar a, a puak keh a, kawchhung thi put (internal bleeding) avangin thihna a thleng tam hle. Nu naute pai lai a khawih chhe thei. Nu naupai laia zu in vak chuan naute pian fel lo a hring duh. Chutiang naute ‘Fetal Alcohol Syndrome’ an tih mai chu – Lu chik ret, hnar ngul tawi deuh, er chho terh, hmui chunglam pan hlawng, hnapthleng chiangkuang lo, mit zim sen mai leh biang thawp set an ni duh. Chu bakah an than a tha lo a, rilru kim lohna an nei duh. Lung pawp a tam bik a, kutchuk an nei a, tila ril tla (hernia) leh zun kawng fel lo an nei duh bik. Zu hi nghei thut chuan rilru leh taksaah harsatna - ‘nghei thut nghawng’ (withdrawal syndrome) an nei thin. Lu a na a, luak a chhuak a, an luak bawrh bawrh a, pum a na thei. BP a sang a, kut a khur a, an thlan a tla bawrh bawrh thin. An muhil thei lova, an lum pup pup a, ngaihtuahna a fim lova, an hlauthawng a. Ramhuai an hmu a, tawng ri mak pui pui an hria a, an buai viau thei thin. An thil hriat leh hmuhte chu a tak emaw an tih si avangin an nun a buai hle thin. Mahni intihlum ta hialte pawh an awm thin. A then chu an kaih (chiri) thin. Chiri avanga lua thi tling khawpa insawh leh hliam dang nei te, lei seh chhum dawn ta hialte an awm fo. Zu tha chi hi in tura siam, ruih theih a ni. A in duh kan awm chhung chuan a rem dawn lo. Zu tha chi kan tih hi tawk awm lo leka in chuan a lo tha lo khawp mai. Zu chhe in avanga thi aiin zu tha chi in avanga thi hi khawi ramah pawh an tam zawk vek. Zu tha chi avanga buaina leh harsatna hi zu khapna ram leh khap lohna ramah pawh rapthlak tham tak a ni. A khap leh khap loha buai chiam lo hian a chunga thudik khi uluk takin ngaihtuah zui la. “Ka pu Vawma tui tui, i in ngam leh in la, i dawt ngam leh dawt rawh” I thu thu a ni e.