Zawhna: Kum 49 ka ni a, blood sugar avangin zing leh tlai chaw ei dawnin voglibose 0.2 ka ei a, tin zing leh tlai chaw ei khamah metsmall 500 ka ei bawk. Heti chung hian ka sugar chu fasting ah 92, pp ah 200 ala ni. Voglibose hi 0.3-ah min san a, heti chung hian Random test-ah 240 a la ni tho mai. Engtia tih chi nge ni ang, a hlauhawm em?

Chhanna: Zunthlum natna (Diabetes Mellitus) hi kan ziak ve fo tawh a, a nei laklawh tawh tan chuan damdawia inenkawl mai piah lamah nunphung thlak danglam, a bik takin ei leh in tih danglam te, rihna ti hniam tura taksa sawizawi te hi a pawimawh em em a ni. Natna inkaichhawn theih loh (Non-Communicable Disease) zingah chuan a common ber pawl a ni awm e. Mizote zingah pawh hian he natna nei hi kan thahnem sawt viau mai.

Zunthlum natna hi chi hnih a awm a, pakhat zawk Type 1 (Insulin Dependent Diabetes Mellitus) an tihah chuan an taksa a thlum sawngbawltu Insulin Hormone hi a insiam thei lo va; chuvangin, Insulin pek an ngai nghal thin. Hetiang zunthlum hi chu inthlahchhawn a tam ber. A dang leh chu Type II (Non Insulin Dependent Diabetes Mellitus) an ti a, hetah hi chuan insulin siamtu pancreas hian insulin siam mah se a va hnathawhna turah khan hna a thawk tha thei lova, tichuan taksaah thlum a lo insiam/inkhawl tam ta mai thin a ni. Type II hi a tam ber chu a ni a, inthlahchhawn theih tho a ni a, chutih rualin naupan laia thau lutuk vang te, puitling ah pawh rit lutuk (obese) vang te, ei leh in uluk loh vangtein a awm thei a ni.

Metsmall damdawi hi Metformin a ni a, thin (liver)-in thlum a siam hnem tur a control a, chu mai bakah insulin hnathawh a tichak bawk. Voglibose hi chuan kan thil ei a thlum tam lutuk tur leh, thisen a thlum rawn lut tam tur kha rilah a lo chawk darh thung a ni. Zunthlum damdawi, a ei chite hi a chunga kan tar lan tak angin anmahni lawng chuan hna an thawk kimchang thei lo va, thin lamah thlum insiam a tam loh nan thin function tha a pawimawh a, pancreas-in insulin a siam that theih nan ei leh in a thlum leh mawm tihtlemte a pawimawh leh bawk.

Zawhna hmasa zawk hi han chhang ta ila, zunthlum damdawi ei chungin blood sugar a la hniam hlei thei lo a ni a, damdawi dose hi adjust uluk a ngai a ni thei a; tin, Insulin Injection a mamawh tawh a ni thei bawk. |henkhat chu inchiu loh hram an duh lutuk vangin an blood sugar control tha thei tawh lo mah se a ei chi an ti hram hram thin. Doctor-te hian a tul anih loh chuan Insulin inchiu hi an chawh zen zen lo. Damdawi ei chi hmanga blood sugar control a that theih loh chuan Insulin Injection hi lak a ngai a ni tlangpui thin. Tin, lak har lutuk a, blood sugar control a that theih bawk si loh chuan harsatna dang, a bik takin kidney function buai te, mit lam te thlengin a khawih pawi thei a ni. Chuvangin I doctor hi review tir leh la a tha hle mai.

Zawhna pahnihna hi chu zunthlum nei zawng zawng hi an thau vek lova, cher leh zang tak chunga zunthlum nei hi an awm fo a ni. Mahse chuti chung chuan thau na na na ah chuan zunthlum neih a awlsam zawk a, ei leh in control that loh chuan zunthlum neih a awm bakah blood sugar control pawh a har zual bawk thin. Ei leh in insum hi a pawimawh kan tih rual rualin kan taksa mamawh zat kan ei a kan in nitin a pawimawh a, zunthlum nei chunga thau belh hlau lutuk vanga mahni a ei leh in lo inhrek vak te an awm zauh zauh; chung mite chuan weight loss nasa tak an neih phah fo thin. Chuvangin, I diet control danah mi thiam zawk te lo rawn thei la i tangkaipui ka beisei.