Zawhna: Ka pu, mipa ka ni a, ka zun zawh hnu lawk hian zun rawn far nawn leh hi engvanga lo awm nge ni ang? Zunkawng that loh vang a ni thei em? A dang leh, ka pu, ka baw chhuakah hian thisen a tel thin a, a chang chuan ka zunte hi a var deuh nawi angte a awm thin bawk a, engnge a chhan ni thei ang? A hlauhawm em? (pahnih lak kawp)

Chhanna: Tun tum hian mipa zun lam insawiselna chi hnih zawhna ka dawnte ka rawn chhang rual nghal dawn a. Ka han sawi hmasak duh chu zawhna zawttute hian mipa nge hmeichhia kan nih, kum zat, nupui pasal neih leh neih loh, natna benvawn nei, a bikin zunthlum leh thisen sang neite an nih chuan sawi tel bawk se, damdawi ei lai an neih chuan sawi tel bawk se, chhan dan a felfai lehzual thei ngei ang.

Mipaah hian kan zunkawng, kal (kidney) atanga zun rawn chhuah chhukna dawt (ureter) te, chumi ureter chu phing (bladder)-ah a invuah lut leh a. Phing atang hian kan sazu/zang hnuai lamah a rawn chhuahna dawt (urethra) a awm leh bawk. Phing hnuaiah hian thal chi khat, Prostate Gland chu a awm bawk a, he gland hian mipa baw (semen) a tuihnang a lo siam thung a ni. Chuan tilmu (testicle) hian mipa chi a siam a, chumi chu tuiril nen inpawlhin pipe chi dang (Spermatic Cord) kal tlangin baw chu a rawn pe chhuak a, prostate gland hnungah rawn lutin zun chhuahna lai ber, urethra-ah a rawn invuah leh bawk a ni.

Zawhna hmasa zawk hi phing control buai vanga awm a nih duh hmel viau. Chutiang chu Urinary Incontinence kan ti. Phingah zun a lo tling khawl a, puitlingah chuan a tlangpuiin 200 ml aia a tam hnu hian zun chhuak kan feel tan a. Mi tam zawk chuan kan zun hi 480 ml aia tam mah kan nghak khawl thei a; mahse, 500 ml a pelh tawh chuan insum a har viau tawh thin. Zun chhuak kan lo feel-a kan han zun tan chiah khan phing tihrawl a sang mar a, zun chhuahna dawt nen an inzawmna laiah hian valve a awm a, chumi chu a lo zawi a; tichuan, kan lo zung chhuak ta thin a ni. Hemi control-tu hi kan nerve (thazam) an ni a, chutiang avang chuan nerve tha lo, entir nan Spinal Cord injury vanga zengte hian hemi control hi an nei thei ta thin lo a ni.

Mipa hi kan kum a lo tam a, kum 50 (a tam zawkah chuan 60) kan pelh chhoh hian prostate gland hi a lo thang ve tial tial thin a (a ni vek chuang lo). Chu chuan phing kha a rawn nek a, Urinary Incontinence (UI) kha a rawn thlen ta thin a ni. A lan chhuah dan a inang lo fo a, tuna zawhna zawttu insawiselna bakah hian zung chhuak thei lo, sang vak pawha far fep fep lekte a awm thei a, pum sang mar (khuh te, rit chawi lait e) vangtein zun kha a rawn far thin bawk. Hei bakah hian UI lan chhuah dan dang lehte chu sex hman laia zun rawn chhuakte a ni bawk.

Prostate lian kher lovah pawh hian zunkawng infection avang te, phing a lungte emaw bawk (tumour) awm vangtein zun leak hi a awm thei bawk a. Chuvangin, investigation tih ngei a tul hmel. Ultrasound hmangin zunkawng vel enchiantir ta la, infection a awm leh awm loh hriat nan Urine Routine Examination (R/E) lo ti tel bawk la, urine report-ah hian WBC/Pus Cell hi a tam chuan Urine Culture (hrik to tir) a tul leh thei bawk. Heng investigation pahnih hi zawhna hnuhnung zawk zawttu pawhin a tih ve a tul ang.

Baw (semen) a thi telte hi eng emaw inhliam palh (injury) avang a ni thei a, infection vang pawhin a awm thei bawk (a bikin TB rule out a ngai ngei ang). Two wheeler khalh nasa, a bikin long run nasate hian an nei duh viau bawk. Baw hi urethra a lo luh khan a let zawngin phingah a lehluh thei a, chutiang chuan retrograde ejaculation an ti a, zun a var nuai awm thin pawh hi chutiang chu a nih duh hmel viau. Engpawhnise, Surgeon Doctor te entir ngei a tha ka ti. A chhan chiang taka hriat chhuah tum hmasak kha a pawimawh.