August 25, 2022; Mizoramah kum 1997 atanga kumin July ni 21 thleng khan zu chhe in kaihhnawih (Spurious liquor related death) vanga thi mi 158 an awm a, hemi hunchhung a zu chhe in kaihhnawih vanga thi tam ber kum chu 2017 niin, mi 57 an thi.

Excise & Narcotics department (END) chhinchhiah danin, tunhnai kum 2019 atanga nikum 2021 thleng khan zu chhe in kaihhnawih vanga thi chhinchhiah an awm lo a, hetihlai hian kumin 2022 ah zu chhe in kaihhnawih vanga thi 1 a awm.

Kum 1997 atanga kumin July ni 21 thlenga zu chhe in kaihhnawih a thi hi Aizawl district ah mi 59 an awm a, Lunglei district ah 2, Siaha district ah 7, Champhai district ah 10, Serchhip district ah 1, Kolasib district ah 77 leh Mamit district ah 2 an awm. Kumin a zu chhe in vanga thi chhinchhiah 1 chu Siaha district mi a ni.

1997 atanga kumin thlenga zu chhe in kaihhnawih vanga thi tam ber kum 2017 ah Aizawl district ah mi 4, Champhai district ah 1 leh Kolasib district ah mi 52 an thi a. 2016 ah mi 23 zu chhe in vanga thi awmin, 2015 ah 9, 2014 ah 9 leh 2013 ah 2 an awm. Kum 2018 atanga kumin 2022 (July ni 21 thleng) chhungin zu chhe in kaihhnawih a thi chhinchhiah mi 7 thi (2018 ah 6, 2022 ah 1) an awm.

END chhinchhiah danin, 1997-2022, July ni 21 thlenga zu chhe in kaihhnawih vanga thi chhinchhiah mi 158 zinga mi 35 te chu Methylated spirit vanga thi niin, Pethidine 2, BEDC 6 leh IMFL nge rakzu tih finfiah theih loh in vanga thi mi 115 an awm. 

Hemi hunchhunga zu chhe kaihnawih in vanga thi zingah hian kum 18 hnuailam an awm lo a, kum 18-72 inkar an ni.