June 19, 2023; Vawiin Mizo Hnam Runah chhung inkhawm ah Dr. Vanlaltanpuia, MLA, Adviser MNF Gen.Hqrs. leh MYC Chairman ni bawk chuan thusawiin, kum 2018-22 inkarah khan MYC coaching atanga zirchhuak mi 141 ten sorkar hna an hmu tawh tih a sawi.

Heng bakah hian Bank a thawk turin mi 38 an lut tawh a, Private company leh Insurance company ang chi-ah mi 42 an lut tawh a ti. CIJW Vairengte nen MoU ziah a ni tawh a. MYC chuan Sipai lak runpuiah thalai, sipaia tang duh an buaipui a. MYC Coaching kaltlanga sipaia lut hi 70 chuang an ni tawh tih a sawi bawk.

Dr. Tanpuia chuan, Covid hrileng avanga state danga hnathawkte chu Supreme Court in an home state ah haw se, State sorkarin chhawmdawlna pe rawh se tiin order a chhuah a. Covid avanga state danga hnathawk lokir lehte tanpui nan Chief Minister in Vbc. 6 min pe a, hemi sum hian kan thalaite tanpuina kan pe ta a, covid kian hnuah an thawhna lamah an let leh tawh hlawm a ni, a ti. 

Vawiin vek khan UPSC exam prelims tling Mizo thalai 13 te nen inkawmhona nei bawkin, MYC chairman chuan July ni 10, 2023 ah super IAS exam an buatsaih leh dawn tih a sawi a, chumi atan chuan ruahmanna pawh peihfel vek a ni tawh niin a sawi.