Aizawl: Nikum 2020-2021 chhung khan Mizoramah thisen unit 26658 pek/lak a ni a, heng zinga 89.66% hi mi tlawmngai ten a thlawna an pek a ni.

Mizoram State AIDS Control Society hnuaia State Blood Transfusion Services te chhinchhiah danin nikum 2020-21 chhung khan Mizorama blood bank hrang hrangah thisen unit 26658 pek/lak a ni a, heng zinga 23911 hi mi tlawmngai te pek (voluntary donation) a ni a, a bak unit 2747 hi thisen rulhna atana pek a ni. Nikum chhung vek khan camp tum 530 huaihawt a niin hemi a thisen lak zat chu unit 15277 a tling bawk.

Mizoramah blood bank 11 awmin chung zingah chuan Civil Hospital, Aizawl ah thisen pek a tam ber a, unit 13222 pek a niin heng zinga unit 12288 hi mi tlawmngai te pek a ni a, voluntary a pek zat hi 92.94% a tling a ni. Blood bank hrang hranga thisen pek dan chu Synod hospital, Durtlang unit 2777, District hospital, Champhai 1473, District hospital, Kolasib 1210, Civil hospital, Lunglei 2508, Christian hospital, Serkawn 1122, District hospital, Serchhip 1270, District hospital, Lawngtlai 1229, District hospital, Siaha 1205 leh District hospital, Mamit 447 te an ni a. Blood bank zingah Zoram Medical College ah thisen pek a tlem ber a, unit 195 pek niin, an pek zawng zawng hi tlawmngaia pek (voluntary) vek a ni thung. 

Thisen pek lama hma latu Mizoram State AIDS Control Society (MSACS) Project Director Dr. Lalthlengliani chuan Mizorama a thlawna thisen pek chu kum hmasa lam ai chuan a tlem hret niin Zalen a hrilh a. "Hripui leng avangin thisen pe tura kalkhawm a harsa a, inhawrkhawm a remchan loh avangin kum hmasa lam chu kan pha lo deuh a, mahse kan phak lohna hi a sang lo hle a ni," a ti. Mizoram chu India ram state zingah a thlawna thisen pe tam zingah a tel tih sawiin, "A thlawna thisen pek kawngah a sang pawl kan ni," a ti bawk. Kumin chhunga an kal dan tur chu a chiang hrih lo nia sawiin MSACS Project Director chuan, "Kum dangah chuan National AIDS Control Society hnuaiah kan awm thin a, mahse kuminah erawh chuan sawrkar laipuiin a kaldan ti danglamin a enkawltu tur pawh thlak a tum a. Ruahmanna chu nei mah ila kan kutah a awm zel dawn em tih kan chian loh avangin engmah kan sawi thei lo a ni," a ti bawk.