February 10, 2023; Academic session thar 2023-24 atangin Mizoramah sawrkar enkawl school ah uniform inang tlang (Common Uniform) hman a ni dawn a. Tun dinhmun ah sawrkar school ah zirlai 1,28,927 awmin, mimal leh kohhran enkawl school ah zirlai 1,26,314 an awm a, sawrkar school a zirlai tam zawkna hi 2,613 a tling.

Vawiin Assembly Session zawhna leh chhanna hunah member te zawhna leh zawh belhna te chhangin Education minister Lalchhandama Ralte chuan, school uniform inang neih chu naupang intluktlanna atan leh discipline tha zawk an neih theihna tur te, awlsam zawk a naupang hriat hran theihna tur te, awlsam zawk leh man man zawka uniform lakkhawm a nih theihna tur te bakah kum laklawh a zirna hmun insawn ngaite tan a awlsam zawkna tur a ni tih a sawi.

Education minister tarlan danin, tun dinhmun ah sawrkar school, primary ah zirlai naupang 58,866 an awm a, middle ah 44,607 leh high school leh higher secondary school ah zirlai 25,434 an awm. Sawrkar school a zirlai awm zawng zawng 1,28,927 niin, mimal leh kohhran enkawl school ah 1,26,314 an awm a, Primary - HSS a zirlai awm zawng zawng zat chu 2,55,341 an tling.