Aizawl Sahuan a savawm dahna hmun enclosure ah thing a tlu lut a, chuta tang chuansavawm a chhuak, hetihlai hian sahuan chhungah ngei a la awm a, zanin ah pawh man tumin hmalak mek a ni. He thil thleng chungchang hi Lungverh Local Council lam pawh hriattir an ni tawh.

PUBLIC NOTICE

Ni 30.03.2024 leh ni 31.03.2024 a thli leh ruah thawk avang khan Aizawl Zoological Park chu thing tlu leh thingzar tla ten harsatna tam tak min thlen a, visitors te kal kawng hnawk leh animal enclosure chhunga thing tlu lut te chawpchilh taka thenfai nghal ni mahse power supply line te thleng a, a chhiat avangin, vawiin thlengin chin fel theih ala ni rih lo a ni.

Hetiang anih mek lai hian ni 1.04.2024 (Monday) zing lama thli leh ruah rawn thawk nawn leh avang khan savawm enclosure pawn lam atanga thing tlu lut atangin kan savawm pakhat hi a chhuak ngei niin hriat a ni a, zingkar atangin chhuizui hna thawh a niin, vawiin ni 01.04.2024 zan lam thlengin Zoo area chhung ngei ala awm a ni tih finfiah a ni.

Tranquilizer Gun, College of Veterinary Sciences and Animal Husbandry, Selesih ten phal taka min hman tir leh Zoo trap / thang hmang a chan mek zel a ni. Savawn awmna hmun in a zir loh avangin Tranquilizer Gun hmanna hun remchang pawh la awmlo in, zanin thlengin tranquilizer gun leh trap / thang hmanin Zoo staff ten an la vil reng a ni.

Hetiang a harsatna hrang hrang kan tawh avangin ni 02.04 2024 ( Tuesday) hian Zoo hi visitors te tan khar rih ala ni dawn tih kan in hriattir a ni. Mipuite hriathiamna kan ngen e.

Sd/- PC LALTANPUIA

Deputy Conservator of Forest

Aizawl Wildlife Division

&

Director

Aizawl Zoological Park

Mizoram