Russia mipui sang telin Inrinni khan Soviet Union ram hruaitu hnuhnung ber, muanawm taka Cold War titawptu, Mikhail Gorbachev-a chu a tawp nan zahna an hlan.

House of Unions-a Columned Hall chhungah thlahna rimawi tihrik a ni a. Black & white rawngin Gorbachev-a lem lian tak chu a balcony-ah zar a ni bawk.

President hlui hi a kuang inhawngah dah a ni a, zahna chibai buk reng a ni.

A fanu leh a chhungte dang chu miin thlahna pangpar an dah mawlh mawlh laiin a sirah an thu a ni.

A thlahna hnuhnung hmanna hmunah tho hian Gorbachev-a hmaa Soviet hruaitu dang - Lenin, Stalin leh Brezhnev te pawh zalh an lo ni tawh.

Russian tam tak chuan Gorbachev-a hi an ram kalphung a siam that danah demin an eibar dinhmun tihniamtu leh Soviet Union a darh chhanah an puh.

Hetih rual hian Hall of Unions chhehvelah chuan Muscovite tam tak, thalai leh upa lam pawh thui tak tak zahna hlan turin an intlar thung.

Gorbachev-a hun hnuhnungah hian President Vladimir Putin-a erawh a tel lo va. Kremlin chuan hun a neih loh thu an sawi.

Putin-a a tel lo hi tun hma lama an inkar tha vak lo nia sawi a lan chhuahna nia ngai an awm a. Tun hmain vawi khat chu Putin-a hian USSR keh darh ta kha ‘kum zabi khat chhunga ram chhiatna lian ber’ tiin a lo sawi tawh a ni.

Moscow-a a thihna damdawi in chuan Gorbachev-a hi Thawhlehni khan rei tak a lo nat tawh hnuah a thi tih an puang a, a thih chhan tak an sawi lo.

Tun hnaiah a hriselna hi a tlahniam nasain damdawi in a lut chhuak deuh reng a. June thla khan chanchinbute chuan a kal lam a fel lo hle tih an lo sawi tawh bawk.

Inrinnia thlahna hnuhnungah hian Hungarian Prime Minister Viktor Orban pawh a tel a, ani hi Putin-a thian tha a ni a, ram dang hruaitu ani bak tel an awm lo.

Putin-a thawhpui tho, Gorbachev-a thlaktu, Dmitry Medvedev pawh a tel bawk.

Tunge Mikhaill Gorbachev chu

Gorbachev-a hian kum 1985 khan thuneihna chang tanin an ram kalphung tam tak a tidanglam a, USSR chu ram dangte nena inpawh turin kawng a hawng.

Hetih rual hian kum 1991-a union keh darh tur erawh a dang thei lo va, Russian tam tak chuan a kalphung vangah an puh a ni.

President Putin-a nena an inkar pawh a tha vak lo thin a, hmaichhana an inhmuh hnuhnung ber pawh kum 2006 daih tawh kha a ni.

Tun hnai lawkah Gorbachev-a hian Russia-in Ukraine-a rûn pawh tha a tih loh thu a lo sawi tawh a, hetih rual hian kum 2014-a Ukraine-a Crimea peninsula an luah erawh tha a ti thung.

Soviet a darh hnuah Gorbachev-a hi politics-a tal lovin hun a hmang zui ta zawk a, kum 1996-a president a chuh leh pawh khan vote tla 0.5% chauh a hmu a ni.

Ngaisang lotu tam tak karah Russian tam tak pawhin an ngaisang a, a hun hnuhnungah zahna an hlan hlawm.

Russia pawn lamah erawh zah a kai hle a, UN Secretary General António Guterres chuan ‘khawvel chanchin kalhmang thlaktu’ tiin a sawi a, US President Joe Biden pawhin ‘amah ang hruaitu awm zen zen lo’ niin a sawi.

Khawthlang ramte chuan kum 1991-a Cold War boruak titawptu niin an sawi a, Cold War hi Soviet Union leh khawthlang ramte intlansiakna a ni.

Khawthlang leh khawchhak inkungkaihna a tihthat avang hian kum 1991 khan Nobel Peace Prize hlan a ni.