Chawhchawrawi

A mi thah lung chhumin a thah leh turte eitir!

Admin - Mar 21, 2021

Tualthaktu raw va leh maksak

United States-a state pakhat, Oklahoma-a mi pakhat, mi pathum lai thattu chuan a mi thah hmasak taksa zai thlerin a lung a la chhuak a, alu nena chhumin a mi thah hnuhnungte ei turin a chhawpsak niin an ram chanchinbute chuan an tar lang.

Mi thattu nia an puh hi Lawrence Paul Anderson a ni a, Oklahoma City News 4 TV leh Oklahoman chanchinbu chuan an thenawma mi hi vit hlumin a taksa pengte chu a chan darhsak niin an tar lang.

A lung chu a patea inah kengin a patea leh a nupui ei turin a siamsak tih Grady County Court, Chickasha-ah a chhuitute chuan an sawi niin an tar lang bawk.

Anderson-a hi February 9 khan a patea leh a tunu kum li mek chu a that zui a, a patea nupui pawh na takin a hliam bawk nia puh a ni.

Thil thlen dan chhuitute chuan court-ah hian, “Alu nen lung chhumin a chhungte hnenah hian ramhuai hnawh chhuah nan a eitir,” tiin an tar lang.

Anderson-a laka thubuai hi Oklahoma Governor Kevin Stitt-an mi ngaihhnathiam theihna dan a neih anga lung in atanga a chhuahtir hnu lawka thleng a ni a. A hmain rei tak thubuai neia lo tang tawh a ni.

Kum 2017 khan ruihhlo avangin kum 20 tang tura tih a ni a. Mi pathum a thah thu hi court-ah pawh a inpuang tawh niin chanchinbute chuan an tar lang bawk.