Thai para-athlete (kuttualleichham infiam mi), sipai hlui ni bawk chuan a nupui neih ni-ah a nupui thar leh mi dang pathum a kap hlum a, amah a inthat bawk niin police-in an sawi.

Kum 29 mi, Chaturong Suksuk leh kum 44 mi, Kanchana Pachunthuek te hi Thailand hmarchhakah Inrinni khan an innei.

An inneih lawmna (wedding party) atangin a chhuak tau va, silai nena kirin a nupui bakah a pizawn thar, kum 62 leh a nupui laizawn kum 38 mi a kap hlum a ni.

Inneih lawmnaa tel ve dang pahnih pawhin silaimu an tuar a, damdawi inah lak niin pakhat hi a thi zui bawk.

Police chuan Chaturong-a hi ‘a rui hle’ niin an sawi a; mahse, hetianga a chet chiam chhan erawh an la hre lo va. Nikum khan silai leh puak thei dangte hi phalna nei lovin a lei niin an sawi bawk.

Thai chanchinbuten party-naa telten police hnena an sawi an chhuah dan chuan an nupa hian party lai hian an intithinrim a. Chaturong-a hi a nupui thar, Kanchana-i nena an kum a inthlauh avang hian a rilru a nuam chiah lo a ni.

Police erawh chuan he thil hi titi mai mai a la ni rih tih an sawi a, finfiahnate lakhawmin a chhan an hriat chhuai thuai an beisei tih an sawi.

Chaturong leh Kanchana te hi an inneih hma hian kum thum lai an lo cheng dun tawh niin Thai chanchinbute hian an sawi.

Chaturong-a hi nikuma Indonesia-a Asean Para Games-ah khan tuihleuhvah silver medal a la a. Thla thara an rama World Abilitysport Games-ah pawh tel ngei tura ngaih a ni.

Thailand ramria duty thin, paramilitary light infantry-a a tel laiin a ke ding lam lo chân tawh a ni.

Thailand-ah hian silai neih ching hle mah se inpawngkah ang chi hi a thleng tlem hle.

Thla hmasa khan Bangkok-a bazarpui changkang takah mi pathum kah hlum an ni a. October thla khan police-a tang thin pakhatin silai leh chem nen Thailand hmarchhaka nursery beiin naupang 37 zet a lo that tawh bawk.